وتكەننىڭ ءبارىن مانسۇقتاي بەرۋ دۇرىس ەمەس. كەڭەس وداعى كەزىندە جاس ورەندەردى بەيىمدىلىكتەرىنە قاراي ءتۇرلى سالالارعا دايىندايتىن «جاس تەحنيك» سياقتى ۇيىرمەلەر كوپ بولاتىن. ءبىرىن-ءبىرى قولعاپتاي تەز اۋىستىرعان «رەفورماتور» ءبىلىم مينيسترلەرى شەتەلدىڭ قاڭسىعىنا تاڭسىق بولىپ, وقۋ باعدارلاماسىنا جاڭالىق تىققىشتاپ ءجۇرىپ وسى جاقسى ءداستۇردىڭ ساباقتاستىعىن ۇمىتقان ەدى. «جاس تەحنيك» جەتىلە كەلە «جاس عالىم» باعدارلاماسىنا ۇلاسىپ, قانشاما جاڭاشىل ىزدەنىستەرگە جول اشاتىن. ونەرتاپقىشتار كوبەيەتىن.
سول جاقسى ءۇردىستىڭ الدى قىزىلوردا وبلىسىندا ىسكە اسىپ جاتىر.
ەراليەۆ سەرىكبول دەگەن جاس كاسىپكەر قالادا «Smart Generation» روبوتوتەحنيكا مەكتەبىن اشتى.
سەرىكبول كەز كەلگەن ادامنىڭ ءتىسى باتا بەرمەيتىن سالاعا جولدان قوسىلعان كوك اتتى ەمەس. ول بۇعان دەيىن قالاداعى قوسىمشا ءبىلىم بەرۋ وقۋ-ادىستەمەلىك ورتالىعىندا روبوتوتەحنيكا ورتالىعىندا جەتەكشى بولىپ جۇمىس جاساعان.
مەكتەپ اقىلى نەگىزدە. اپتاسىنا ءتورت ساعاتتان وقىتاتىن ارناۋلى مەكتەپكە بالالار التى جاستان باستاپ قاتىسا الادى. ال, مۇمكىندىگى شەكتەۋلى جاسوسپىرىمدەرگە تەگىن وقىتۋ ۇسىنىلادى.
جاس كاسىپكەر جاڭا مەكتەپكە 2,4 ملن. تەڭگە جۇمساعان. ونىڭ 500 مىڭ تەڭگەسىن «Samruk-Kazyna Trust» الەۋمەتتىك جوبالاردى دامىتۋ قورىنىڭ بايقاۋىندا جەڭىپ العان.
– مەكتەپتى زامان تالابىنا ساي اشىپ وتىرمىز. روبوتوتەحنيكا سالاسى وتە قارقىندى دامىپ كەلە جاتىر. زامان سۇرانىسى اقپاراتتىق تەحنيكا سالاسىنىڭ ماماندارى دەيتىن بولساق, بۇل مامانداردى قازىر دايىنداماساق كەش بولادى. مەكتەپكە قاجەتتى قۇرال-جابدىقتاردى ءار ەلدەن جيناقتادىق. ماسەلەن, كەيبىر قۇرالدار دانيا مەملەكەتىنەن الدىرىلدى. سول سياقتى قاجەتتى زاتتاردى رەسەيدەن, قىتاي, الماتى, استانادان الدىق. مەكتەپتى اشقاننان كەيىن كەشەندى جاساعان ءجون. سوندىقتان دا ماتەريالدىق بازانىڭ تولىق بولۋىنا كوڭىل بولدىك, – دەيدى سەرىكبول ەراليەۆ.
مەكتەپتىڭ اشىلۋ سالتاناتىنا كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ ارنايى كەلىپ, قۇتتىقتاۋ ءسوزىن ايتتى.
– قازىرگى تسيفرلانعان قوعامدى اقپاراتتىق تەحنولوگيا ماماندارىنسىز ەلەستەتۋ مۇمكىن ەمەس. بۇگىنگى كاسىپكەرلىككە قادام باسقان سەرىكبولمەن كوكتەمدە تانىستىق. سول كەزدە قالادا روبوتوتەحنيكا مەكتەبىن اشقىسى كەلەتىنىن ايتقان بولاتىن. راس, يننوۆاتسيالىق جوبالار بايقاۋىنا قاتىسقانىمەن, جوباسى جەڭىسكە جەتە المادى. دەگەنمەن, «قامىقپا, ءىسىڭدى تاستاپ كەتپە» دەپ كەڭەسىمدى بەردىم. بۇگىنگى مەكتەبىنىڭ اشىلۋ سالتاناتىنا شاقىرعاندا كەلۋگە قۋانا كەلىستىم. اياداي عانا بولمە دەپ جاس كاسىپكەردى سىناي كورمەڭىزدەر. بۇل شاعىن بولمەدەگى جاس بۇلدىرشىندەردىڭ قۋانىشىن, اتا-انالارىنىڭ قىزىعۋشىلىعىن كورىپ وتىرسىزدار. كۇنى ەرتەڭ وسى بۇلدىرشىندەردىڭ اراسىنان ەلىمىزگە پايداسى تيەتىن ماماندار ءوسىپ شىعادى. ءبىز دە ءوز تاراپىمىزدان قاراپ قالمايمىز. قولدان نە كومەك كەرەك, بەرۋگە ءازىرمىز», – دەدى ول.
زامان – بىلىمدىنىكى. ساندىق تەحنولوگيا جاڭا ماقساتتارعا قۇلاش ۇرعىزىپ جاتىر. ەلدىڭ ەرتەڭىن ەڭسەلى ەتەتىن كەلەشەككە جاڭا مەكتەپ وسىلايشا قازىعىن قاقتى.
باقتيار تايجان,
«ەگەمەن قازاقستان»
قىزىلوردا وبلىسى.
