ءاجىباي اۋلىندا ءوسىپ-ونگەن, بۇگىنگى كۇندە وبلىس ورتالىعىندا قۇرىلىس جۇمىستارىمەن اينالىساتىن اعايىندى جىگىتتەر ءوز قاراجاتتارىنان 15 ملن تەڭگە جۇمساپ, نىساننىڭ قۇرىلىس جۇمىستارىن ەكى ايدىڭ ىشىندە ءبىتىردى.
نىساننىڭ اشىلۋ سالتاناتىندا ءسوز العان اۋدان اكىمى ابات شىنىبەكوۆ ءاجىباي اۋىلىنىڭ تۇرعىندارىن فەلدشەرلىك پۋنكتتىڭ اشىلۋىمەن قۇتتىقتاپ, جومارت ازاماتتارعا ەل اتىنان العىسىن ءبىلدىردى.
سالتاناتتى شارادا اسقار سىراليەۆ فەلدشەرلىك-اكۋشەرلىك پۋنكتتىڭ كىلتىن اۋداندىق ورتالىق اۋرۋحانانىڭ ديرەكتورى قايىرباي التاەۆقا تابىس ەتتى. ايتۋلى شاراعا ارنايى كەلگەن وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنارا ابدراحمانوۆا جومارت جىگىتتەرگە العىس حات پەن ەستەلىك سىيلىقتى تارتۋ ەتتى. ال وسىنداي يگى ىسكە ريزاشىلىقتارىن بىلدىرگەن اجىبايلىقتار اعايىندى جىگىتتەرگە شاپان جاۋىپ, سايگ ۇلىك مىنگىزدى.
سالتاناتتى شارادا جاڭادان سالىنعان نىساننىڭ لەنتاسى قيىلىپ, جينالعان كوپشىلىك فەلدشەرلىك-اكۋشەرلىك پۋنكتتىڭ ءىشىن ارالاپ كوردى. بۇگىنگى زامانعا ساي سالىنعان نىسانعا قاجەتتى كوممۋنيكاتسيالار جۇيەسى تارتىلعان, فەلدشەرلىك كابينەت, ەكپە بولمەسى, اكۋشەرلىك كابينەت, كۇندىزگى ەمحانا بولمەسى دە بار. كابينەتتەردىڭ ءبارى دە تولىقتاي جاڭا قوندىرعىلارمەن جابدىقتالىپ, بىلىكتى ماماندار اۋىل تۇرعىندارىنىڭ بارلىعىنا قاجەتتى مەديتسينالىق كومەك كورسەتۋگە ءازىر.
اسقار سىراليەۆ, كاسىپكەر: – ءبىز وسى جەردە وقىپ, ءبىلىم الدىق. ەڭبەككە ارالاستىق. ءوزىمىزدىڭ تۋعان اۋلىمىزعا كومەك جاساپ, وسىنداي ءبىر يگى ءىستى باستاۋدى كوپتەن بەرى جوسپارلاپ جۇرگەن ەدىك. سول جوسپارىمىزدى ورىنداۋدا قولداۋ كورسەتكەن جانە كەڭەستەرىن بەرگەن اۋدان, وكرۋگ اكىمى جانە اۋىل ازاماتتارىنا ريزاشىلىعىمىز زور. ەلگە كومەك كورسەتۋ ءاربىر ازاماتتىڭ بورىشى دەپ بىلەمىن.
مەڭسۇلۋ باتىرحانوۆا, زەينەتكەر: – مەن بۇل ازاماتتاردىڭ اتا-اناسىمەن جاقسى ارالاستىم. ەلگە سىيلى وتباسى ەدى. ەندى, مىنە, ولاردان تاراعان ۇرپاقتارى تۋعان اۋىلدارىنا ۇلكەن تارتۋ جاساپ جاتقانىنا كۋا بولىپ وتىرمىز. ەل اتىنان انالىق العىسىمدى ءبىلدىرىپ, اق باتامدى بەردىم.
گۇلزيرا تولەگەنوۆا, ءاجىباي اۋىلدىق فەلدشەرلىك-اكۋشەرلىك پۋنكتىنىڭ فەلدشەرى: – اۋىلىمىزدا ورنالاسقان بۇرىنعى فاپ-تىڭ توزىعى جەتىپ, ەسكىرىپ تۇرعان ەدى. بۇل ماسەلەنىڭ شەشىمىن تاۋىپ, ءوز قاراجاتتارىنا وسىنداي تاماشا عيمارات سالىپ بەرگەن اعايىندى جىگىتتەرگە ريزامىز. جاڭا عيمارات اۋىل حالقىنىڭ دەنساۋلىعىنىڭ جاقسارۋىنا ۇلكەن ۇلەس قوسادى دەگەن سەنىمدەمىز.
قايرات جاقىپ
باتىس قازاقستان وبلىسى,
قازتالوۆ اۋدانى
