جاندار اساننىڭ ايتۋىنشا, بەسىنشى رەت ۇيىمداستىرىلىپ وتىرعان القالى جيىنعا تۇركيا, قازاقستان, ءازىربايجان, قىرعىزستان, وزبەكستان مەن رەسەيدەن 200-گە جۋىق عالىم, مەملەكەت جانە قوعام قايراتكەرلەرى قاتىسپاق.
سيمپوزيۋمنىڭ باستى ماقساتى – الەمدەگى عىلىم, ءبىلىم سالاسىندا تۇركى الەمىنە قاتىستى زەرتتەۋ جاساپ جۇرگەن عالىمداردىڭ باسىن قوسىپ, عىلىمي باعىتتا پىكىر الماسۋدى قامتاماسىز ەتۋ, جاڭا عىلىمي زەرتتەۋلەرگە جول اشىپ, تۇركى الەمى ادەبيەتى مەن مادەنيەتىنىڭ كەڭەيۋىنە ىقپال جاساۋ.
– باسقوسۋدا عالىمدار پەداگوگيكا, ءتىل, ادەبيەت, تاريح, مادەنيەت, ونەر, حالىقارالىق قاتىناستار, ەكونوميكا, فيلوسوفيا, الەۋمەتتانۋ, گەندەرلىك ت.ب. ماسەلەلەر جانە جاراتىلىستانۋ عىلىمدارى سالاسىندا پىكىر الماسىپ, بولاشاقتا تۇركى الەمىندە ورتاق عىلىمي جوبالاردى جۇزەگە اسىرۋ تۋراسىندا ۋاعدالاسپاق. سيمپوزيۋم ءتۇبى ءبىر تۇركى حالىقتارىنىڭ ءبىر-بىرىمەن باس قوسۋىنا, قارىم-قاتىناستارىنىڭ نىعايۋىنا سەپ بولىپ, الەمدە بەيبىتشىلىك پەن تىنىشتىقتىڭ قامتاماسىز ەتىلۋىن ماقسات ەتەدى, – دەپ اتاپ ءوتتى جاندار اسان.
سيمپوزيۋم «جاھاندىق باسەكەگە قابىلەتتى فيلولوگ مامان دايارلاۋدىڭ قازاقستاندىق جانە الەمدىك تاجىريبەسى», «رۋحاني جاڭعىرۋ: ادەبيەت ارقىلى ۇلتتىق سانانى كەمەلدەندىرۋ», «جاھاندىق ءبىلىم بەرۋ جۇيەسى: الەۋمەتتىك-گۋمانيتارلىق پاندەردى جاڭاشا وقىتۋ ادىستەمەسى», «لاتىن گرافيكاسى: تاريحى, تەورياسى جانە وقىتۋ ادىستەمەسى», «تۇركى قاۋىمى: تاريحى مەن مادەنيەتى», «قازىرگى زامانداعى ءبىلىم بەرۋ ءۇردىسىنىڭ ۇلتتىق جانە حالىقارالىق دامۋ تەندەنتسياسى» جانە «تۇركى تىلدەس مەملەكەتتەردەگى گەندەرلىك ءبىلىم بەرۋدىڭ وزەكتى ماسەلەلەرى» باعىتتارى بويىنشا وتكىزىلمەك. سيمپوزيۋمنىڭ رەسمي تىلدەرى – تۇركى تىلدەرى.
ايتا كەتەيىك, ومەر حاليسدەمير ۋنيۆەرسيتەتى, قازاق مەملەكەتتىك قىزدار پەداگوگيكالىق ۋنيۆەرسيتەتى جانە م. اكمۋللا باشقۇرت مەملەكەتتىك پەداگوگيكالىق ۋنيۆەرسيتەتى ۇيىمداستىرعان حالىقارالىق تۇركى الەمى زەرتتەۋلەرى سيمپوزيۋمى العاش رەت تۇركيانىڭ ومەر حاليسدەمير ۋنيۆەرسيتەتىندە 2014 جىلدىڭ 18-21 ناۋرىز كۇندەرى ارالىعىندا وتكەن بولاتىن. سونىمەن قاتار, شارا اياسىندا اتالعان جوعارى وقۋ ورىندارىنىڭ ستۋدەنتتەرىنىڭ ۇيىتقى بولۋىمەن ء«تۇبىمىز ءبىر تۇرىكپىز» فەستيۆالى دا تۇراقتى تۇردە ۇيىمداستىرىلىپ كەلەدى.
