«قانشاما الاش قايراتكەرلەرى باسشىلىق ەتكەن باسىلىمنىڭ 100 جىلدىق تاريحى بار. ەلىمىزدىڭ ءىرىلى-ۇساق مەرزىمدى باسپاسوزدەرىن گازەتتىڭ شىعارماشىلىق-وندىرىستىك الەۋەتىمەن تانىستىرۋ تۋرالى ۇسىنىس بۇدان بۇرىن ايتىلعان بولاتىن. بۇل – ەلىمىزدىڭ اقپارات كەڭىستىگىنىڭ اياسىن كەڭەيتۋگە ىقپال ەتەتىن قادام. ويتكەنى, گازەت – تىلدىك ءورىستىڭ ايقىن كورىنىسى», دەگەن «Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالى عاسىر بەدەرىندەگى باسىلىمنىڭ بۇگىنگى مازمۇنى مەن جاڭاشا باعىت-باعدارىنا كەڭىنەن توقتالىپ ءوتتى. باسقارما توراعاسىنىڭ ايتۋىنشا, قاشان دا وقىرمانمەن قالتقىسىز قارىم-قاتىناس ورناتۋدى كوزدەگەن باسىلىم جاستار اۋديتورياسىنا باسا ءمان بەرىپ وتىر.
– ماتەريالداردىڭ بەرىلۋى تۇرعىسىنان عانا ەمەس, مازمۇندىق جاعىنان اۋديتوريامىزدى دۇرىس ايقىنداۋدى ۇيعاردىق. سوڭعى ساراپتاۋلارىمىز بويىنشا, ءبىزدىڭ وقىرماندارىمىزدىڭ 67 پروتسەنتى 18 بەن 34 جاس ارالىعىندا. بۇل – وتە جاقسى كورسەتكىش, – دەيدى ول.
سونداي-اق, باس باسىلىمنىڭ 100 جىلدىق قارساڭىنداعى قول جەتكىزگەن وزگە دە تىڭ جاڭالىقتارىمەن حاباردار ەتە كەلە, ەل ءومىرىن كەڭىنەن تانىستىرۋدا جانە شەشىلۋى ءتيىس ۇلتتىق جانە مەملەكەتتىك مىندەتتەردىڭ ءاردايىم باستى نازاردا ەكەنىن اتاپ ءوتتى. اۆتورلىق باعانداردى لاتىن الىپبيىمەن جاريالاي باستاعان گازەت الداعى كۇندەرى «رۋحاني جاڭعىرۋ» سىندى تۇتاستاي ءبىر بەتىن لاتىن گرافيكاسىنداعى قازاق الىپبيىمەن باسۋدى قولعا الماق.
شىعىسقازاقستاندىق جۋرناليستەر مەن باسىلىم ۇجىمى كەزدەسۋ بارىسىندا جۋرناليستيكانىڭ بۇگىنگى مىندەتى, گازەتتىڭ ديزايندىق ەرەكشەلىگى مەن مازمۇندىق-يدەيالىق الۋاندىعى تۇرعىسىندا ءوزارا وي-پىكىر الماسىپ, جان-جاقتى ماعلۇماتقا قانىقتى. ايماق جۋرناليستەرى ەل ومىرىندە ايرىقشا ورنى بار ىرگەلى باسىلىمنىڭ زامان اعىمىنا ساي جاڭاشا تۇرلەنۋىنىڭ قۇپتارلىق قادام ەكەنىن ايتا كەلە, بولاشاقتا دا وسى بيىكتەن تابىلا بەرسىن دەگەن نيەتتەستىگىن جەتكىزدى.
ايا ءومىرتاي,
سۋرەتتى تۇسىرگەن ەرلان ومار,
«ەگەمەن قازاقستان»
