الايدا ارادا وتكەن ۋاقىت قولدانىستاعى زاڭناماعا وزگەرتۋلەر مەن تولىقتىرۋلار ەنگىزۋدى تالاپ ەتىپ وتىر. پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ اتىراۋدا وتكەن كوشپەلى وتىرىسىندا وسى ماسەلە جان-جاقتى تالقىلاندى.
اتالعان كوميتەت توراعاسى گەورگي كيم مەدياتسيا راسىمدەرىن جۇزەگە اسىرۋ كەزىندە پروبلەمالاردىڭ بارىن اشىق ايتتى. «مەدياتسيا – قوعامداعى اگرەسسيانى جويۋ مەن داۋلىلىق اياسىن تارىلتۋ قۇرالى. ونىڭ جۇمىس ىستەۋى ءۇشىن ناقتى مەحانيزم كەرەك. مەدياتسيا كاسىپكەرلىك قىزمەتكە جاتپاعانىمەن, نارىق تۇرعىسىنان قاراۋعا ءتيىسپىز», - دەگەن گەورگي كيم جۇمىستى ۇيىمداستىرۋدا قۇزىرلى ورگاندار اراسىنداعى ءوزارا بايلانىستى ءالى دە جەتىلدىرۋ كەرەكتىگىنە توقتالدى.
اتىراۋ وبلىسىندا 40 كاسىبي جانە 10 كاسىبي ەمەس مەدياتور جۇمىس ىستەيدى. كەزدەسۋگە قاتىسقان وبلىس اكىمى نۇرلان نوعاەۆ مەملەكەت باسشىسىنىڭ تاپسىرماسى ايماقتا لايىقتى ىسكە اسىپ جاتقانىن ايتتى.
قر جوعارعى سوتىنىڭ سۋدياسى ۇلبوسىن سۇلەيمەنوۆا: «داۋلاردى سوتقا دەيىن رەتتەۋ باعىتتارى بويىنشا ءتيىمدى مەحانيزمدەر جاسالدى, - دەپ اتاپ ءوتتى. -كوپتەگەن داۋلار مەدياتورلاردىڭ, ادۆوكاتتاردىڭ رەتتەۋىمەن سوتقا جەتكەن جوق. سوتتاردا تاراپتاردىڭ كەلىسۋى, قۋىنىمنان باس تارتۋ, تالاپ ەتۋشىنىڭ ارىزى بويىنشا تالاپتاردى قاراۋسىز قالدىرۋعا قاتىستى جۇمىسى توقتاتىلعان ىستەر قاتارى كوبەيدى».
ەلىمىزدە مەدياتسيا ينستيتۋتى ەنگىزىلگەلى بەرى قۇقىقتىق مادەنيەتىڭ دەڭگەيى ءبىراز كوتەرىلگەن. ازاماتتار داۋدى سوتتان تىس كەلىسسوزدەر جۇرگىزۋ ارقىلى دا شەشۋگە بولاتىنىن تۇسىنە باستادى. بىتىمگەرلىك راسىمدەردى وزەكتى ەتۋ ءۇشىن جوعارعى سوت ءبىراز جوبالاردى قولعا العان. مىسالى, «تۇنگى سوت», «وتباسىلىق سوت» پيلوتتىق جوبالارىنىڭ ناتيجەسى جاقسى. «وتباسىلىق داۋلار بويىنشا مىندەتتى مەدياتسيا تيىمدىلىگىن كورسەتتى. جىل باسىنان بەرى 8703 ءىس (15,1%) تاراپتاردىڭ تاتۋلاسۋىنا بايلانىستى توقتاتىلدى. پيلوتتىق سوتتاردا پسيحولوگتار مەن مەدياتورلار اتا-انالارعا نەكە بۇزۋدىڭ قۇقىقتىق سالدارى, ونىڭ بالانىڭ العا قاراي دامۋىنا اسەرى تۋرالى كەڭەس بەرەدى»,- دەيدى ۇ.سۇلەيمەنوۆا.
جيىندا ءسوز العان سەنات دەپۋتاتى ۆلاديمير ۆولكوۆ: «مەدياتسيا تۋرالى زاڭ 2011 جىلى قابىلداندى, كوپ جايتتاردى قايتا رەتتەۋ قاجەت»,- دەگەن پىكىرىن ايتتى. «قازىر ەلىمىز بويىنشا 371 كاسىبي مەدياتور جۇمىس ىستەيدى. 3 مىڭنان استام مەدياتور كاسىبي ەمەس. وسى كاسىبي ەمەس دەگەن اتاۋدى قوعامدىق مەدياتور دەپ اۋىستىرۋ كەرەك. وقىتاتىن, سەرتيفيكات بەرەتىن ءار ءتۇرلى ۇيىمدار بار, بىراق بىرىڭعاي ورتالىق جوق. ولاردىڭ قالاي وقىتىپ جاتقانىن بىلمەيمىز, سوندىقتان الدا تۇرعان مىندەتتەردىڭ ءبىرى – ورتاق ىسكە جۇمىلدىرۋ. مىسالى, باعالاۋشى, ادۆوكات, نوتاريۋستار بويىنشا وسىنداي جۇمىستار جۇرگىزىلدى. قيىن بولدى, بىراق ورتاق جۇيەگە كەلتىردىك. قازىر ولاردىڭ جالعىز رەتتەۋشىسى بار, جەكە, تۇسىنىكتى, اشىق جۇمىس ىستەيدى. وسى ماڭىزدى ينستيتۋتتى دامىتۋ كەرەك, - دەدى ۆلاديمير ۆولكوۆ.
تالقىلانعان تاقىرىپ بويىنشا ۇسىنىستارىن قازاقستان حالىقتارى اسسامبلەياسى توراعاسىنىڭ ورىنباسارى لەونيد پروكوپەنكو, سەناتور سارسەنباي ەڭسەگەنوۆ, «مەدياتسيانى دامىتۋ ورتالىعى» رقۇ قۇرىلتايشىسى نازىم تولەكەەۆالار دا ورتاعا سالدى. «اتىراۋدا وتكەن بۇل كەزدەسۋ كەيىن پارلامەنتتە تالقىلايتىن كوپتەگەن سۇراقتاردى بەلگىلەپ بەردى دەپ ويلايمىن», - دەيدى قر پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى گەورگي كيم.
باقىتگۇل باباش,
«ەگەمەن قازاقستان».
اتىراۋ
