ءىس-شارانىڭ اشىلۋىندا مەملەكەتتىك حاتشى راسىمگە قاتىسۋشىلارعا ەلباسى ن.ءا.نازارباەۆتىڭ قۇتتىقتاۋ ءسوزىن وقىپ بەردى. وندا وتباسى ينستيتۋتىن نىعايتۋ تاۋەلسىزدىك جىلدارى مەملەكەتىمىزدىڭ الەۋمەتتىك ساياساتىنا اينالعانى ايتىلعان. بۇل باعىتتا ماڭىزدى شەشىمدەر قابىلداندى. ەلىمىزدە جىل سايىن وتباسى كۇنى مەيرامىن اتاپ ءوتۋ, «مەرەيلى وتباسى» ۇلتتىق كونكۋرسىن ۇيىمداستىرۋ داستۇرگە اينالدى.
بۇگىندە جۇزەگە اسىرىلىپ جاتقان «پرەزيدەنتتىڭ بەس الەۋمەتتىك باستاماسى» سياقتى جالپىۇلتتىق جوبالار قازاقستاندىقتاردىڭ ءال-اۋقاتىن ارتتىرۋعا باعىتتالعان. ولار جاھاندىق ۇردىستەرگە سۇيەنە وتىرىپ, قامقورلىق پەن كومەكتى ۇدايى جالعاستىرۋدا. وتانسۇيگىشتىك, ەڭبەكقورلىق, مەيىرىمدىلىك پەن قايىرىمدىلىق سياقتى كيەلى قۇندىلىقتاردى بويىنا سىڭىرگەن وتباسىلاردىڭ وكىلدەرى كونكۋرس جەڭىمپازدارى بولادى.
سالتاناتتى ءىس-شارا اياسىندا مەملەكەتتىك حاتشى اقىرعى كەزەڭگە وتكەن ءاربىر وتباسىعا ديپلوم مەن باعالى سىيلىقتاردى تاپسىردى.
جەڭىمپاز وتباسى كونكۋرستىڭ 31 تامىز بەن 7 قىركۇيەك ارالىعىندا sms/ينتەرنەت ارقىلى داۋىس بەرىلگەن سوڭعى كەزەڭىنىڭ قورىتىندىسى بويىنشا انىقتالدى. جامبىل وبلىسىنان قاتىسقان نيازقۇلوۆتار اۋلەتى «مەرەيلى وتباسى» ۇلتتىق كونكۋرسىنىڭ 2018 جىلعى لاۋرەاتى اتاندى. وتاعاسى نيازقۇلوۆ ۇمەن (83 جاستا) 40 جىلدان استام ۋاقىت اۋىل مەكتەبىندە مۇعالىم, ديرەكتور بولىپ ەڭبەك ەتكەن. زايىبى نيازقۇلوۆا بايان (80 جاستا) 26 جىل باستاۋىش سىنىپ مۇعالىمى بولىپ جۇمىس ىستەگەن. اعا بۋىننىڭ پەداگوگيكالىق قىزمەتىن بالالارى مەن نەمەرەلەرى جالعاستىرۋدا. اۋلەتتىڭ 3 بۋىنىنىڭ جالپى پەداگوگيكالىق ءوتىلى – 198 جىل. ەرلى-زايىپتىلار 62 جىل بىرگە ءومىر ءسۇرىپ كەلەدى, 12 بالا, 32 نەمەرە, 20 شوبەرە تاربيەلەپ-ءوسىرىپ وتىر.
قر مەملەكەتتىك حاتشىسى گ.ن.ابدىقالىقوۆا جەڭىمپاز وتباسىعا سالتاناتتى تۇردە ەستەلىك مۇسىنشە مەن اۆتوكولىك كىلتىن تابىس ەتتى.
ماراپاتتاۋ ءراسىمى قازاقستاندىق تانىمال ەسترادا ارتىستەرى قاتىسقان مەرەكەلىك كونتسەرتپەن اياقتالدى.
