قازاقستان مۇسىلماندارى ءدىني باسقارماسىنىڭ وسكەمەن ايماعى وكىلدىگىنىڭ يمامدارى «مەكتەپكە – جول» اكتسياسى اياسىندا وبلىستىق حاليفا التاي مەشىتىندە ەكى جۇزگە جۋىق وقۋشىعا وقۋ قۇرالدارى مەن سومكەلەردى تابىس ەتتى. بۇل كۇنى از قامتىلعان جانە كوپ بالالى وتباسىنان شىققان, جەتىم جانە اتا-انا قامقورلىعىنسىز قالعان بالالار مەكتەپكە قاجەتتى قۇرال-جابدىقتاردى الىپ, ءبىر قۋاندى.
«بالالاردىڭ بارلىعىنا بىردەي مەيىرىممەن قاراپ, قامقورلىق تانىتۋ كەرەك. كەزىندە پايعامبارىمىزدىڭ (س.ع.س.) نەمەرەلەرىنىڭ ءبىرىن ءسۇيىپ جاتقانىن كورگەن اقرا يبن حاابيس (ر.ا.): «مەنىڭ ون بالام بار, ەشقايسىسىن دا ءالى ماڭدايىنان سيپاپ كورگەن ەمەسپىن» دەپتى. سوندا پايعامبارىمىز (س.ع.س.) وعان: «سەن باسقاعا مەيىرباندىق كورسەتپەسەڭ, ساعان دا اللا مەيىرباندىق كورسەتپەيدى», دەپ جاۋاپ بەرىپتى. سول سەبەپتەن, جاقسىلىق جاساساڭىز, الدىمەن بالالارىڭىزدان باستاڭىز», دەيدى وبلىستىق حاليفا التاي مەشىتىنىڭ نايب يمامى داۋلەت قابيدولدين.
وسكەمەن قالاسىنىڭ تۇرعىنى الماگۇل تۇقمايلوۆانىڭ قىزى ديليارا ق.نۇرعاليەۆ اتىنداعى №43 مەكتەپ-ليتسەيىندە وقيدى. «جالعىزباستى انامىن. بالام ەكەۋمىز پاتەر جالداپ تۇرامىز. سول سەبەپتەن بىزگە وسىنداي قامقورلىق تانىتىپ, قولداۋ كورسەتكەن ۇيىمداستىرۋشىلارعا العىسىم شەكسىز», دەيدى ول.
ازامات قاسىم,
«ەگەمەن قازاقستان»
وسكەمەن
