جاڭا وقۋلىقتاردا – QR-كود
تاياۋ كۇندەردە قازاقستانداعى مىڭداعان مەكتەپتە قوڭىراۋ سوعىلىپ, جاڭا وقۋ جىلى شاكىرتتەرگە جارقىن شابىت سىيلايدى. وقۋ جىلى باستالعانعا دەيىن وقۋشىلارعا وقۋلىقتاردى جەتكىزۋ ۇدەرىسى كەلىسىمشارتتار بويىنشا بەكىتىلگەن مەرزىم ارالىعىندا ىسكە اسىرىلۋى كەرەك. ياعني وقۋلىقتار مەن وقۋ-ادىستەمەلىك كەشەندەرىن ءبىلىم بەرۋ ۇيىمدارىنا جەتكىزۋ جۇمىستارى اعىمداعى جىلدىڭ 25 تامىزىنا دەيىن تاسىمالدانىپ ءبىتۋى كەرەك بولاتىن. بۇل ماسەلەنى مينيسترلىك باستى نازاردا ۇستاپ, كۇندەلىكتى مونيتورينگ جۇرگىزىپ وتىر. دەسەك تە بىرقاتار وڭىردە تاسىمالداۋشىلاردىڭ ءوز مىندەتتەرىن دۇرىس ورىنداماۋىنا بايلانىستى وقۋلىقتاردىڭ ۋاقتىلى جەتكىزىلمەۋى بايقالدى.
ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا, اقمولا وبلىسىنىڭ 6 اۋدانى, قوستاناي وبلىسىنىڭ 3 اۋدانى, شىعىس قازاقستان وبلىسىنىڭ
2 اۋدانى, قىزىلوردا وبلىسىنىڭ 1 اۋدانى وقۋلىقتاردى ءوز كۇشىمەن تاسىمالداۋعا ءماجبۇر. بۇل جۇمىستار بويىنشا جامبىل, تۇركىستان, باتىس قازاقستان, قاراعاندى, سولتۇستىك قازاقستان وبلىستارى مەن شىمكەنت قالاسى وقۋلىقتارمەن تولىق قامتىلعان. جالپى, بيىلعى وقۋلىقتاردىڭ وتكەن جىلدارداعى وقۋلىقتاردان ايىرماشىلىعى – ونىڭ ەلەكتروندى نۇسقالارىنا قولجەتىمدىلىگىن قامتاماسىز ەتۋ ءۇشىن QR-كود ورنالاستىرىلۋىندا دەسەك بولادى.
مينيسترلىكتىڭ ءباسپاسوز قىزمەتىنىڭ حابارلاۋىنشا, رەسپۋبليكا بويىنشا ورتا ەسەپپەن باسپالاردان وڭىرلەرگە وقۋلىقتاردىڭ 98,2%-ءى جونەلتىلگەن, 92,5%-ءى ءبىلىم بەرۋ نىساندارىنا جەتكىزىلگەن. باسپالاردان شىققان كىتاپتاردىڭ ساپاسىنا كەلەر بولساق, فورماتى مەن سالماعىنا قويىلاتىن تالاپتار ورىندالعان.
«جالپى رەسپۋبليكا بويىنشا 2018-2019 وقۋ جىلىنا جاڭارتىلعان ءبىلىم مازمۇنىنا كوشەتىن 3, 6 جانە 8-سىنىپتارعا ارنالعان 12 ملن-نان استام وقۋلىق ساتىپ الىندى. 3, 6, 8-سىنىپ وقۋشىلارىنا وقۋلىقتار ساتىپ الۋ ءۇشىن 28,6 ملن تەڭگە بولىنگەن. اتالعان سىنىپتارداعى وقۋشىلار سانى – 906 مىڭ. قازىرگى كەزدە بارلىق ءبىلىم بەرۋ سۋبەكتىلەرى وقۋ ادەبيەتىن جەتكىزۋ ماسەلەلەرىمەن بەلسەندى تۇردە اينالىسۋدا. وقۋلىقتاردى جونەلتۋ جانە جەتكىزۋ پروتسەسى ءوڭىر اكىمدىكتەرى مەن ءبىلىم باسقارمالارى باسشىلارىنىڭ قاتاڭ باقىلاۋىندا», دەيدى ە.ساعاديەۆ.
72 جاڭا مەكتەپ پايدالانۋعا بەرىلەدى
ەلىمىزدەگى دەموگرافيالىق جانە ميگراتسيالىق جاعدايلارعا بايلانىستى وڭىرلەردەگى كەيبىر مەكتەپتەر ءالى كۇنگە دەيىن ءۇش اۋىسىمدا وقۋعا ءماجبۇر. بۇل جاعداي حالىقتىڭ جىل سايىن ەلىمىزدىڭ مەگاپوليستەرىنە كوپتەپ اعىلۋىنا بايلانىستى ءىرى قالالاردا ورىن الۋدا. ايتالىق, بىلتىر استانانىڭ وزىنە 17 مىڭنان استام بالا كەلگەن. ياعني بۇل استانادا وتكەن جىل ءۇشىن كەمىندە قوسىمشا 15 مەكتەپ سالۋ كەرەك دەگەندى بىلدىرەدى. ءبىلىم جانە عىلىم ۆيتسە-ءمينيسترى اسحات ايماعامبەتوۆ اتاپ وتكەندەي, ءۇش اۋىسىمدى مەكتەپ ماسەلەسى ءبىر ساتتە شەشىلمەيدى.
ء«بىز مەكتەپتەر سالىپ جاتىرمىز. تەك بيىلدىڭ وزىندە رەسپۋبليكالىق بيۋدجەت ەسەبىنەن 110 مەكتەپ قۇرىلىسى جۇرگىزىلۋدە. جىل سوڭىنا دەيىن 72 جاڭا مەكتەپتى پايدالانۋعا بەرەمىز دەپ كوزدەپ وتىرمىز» دەيدى ا.ايماعامبەتوۆ.
ۆيتسە-ءمينيستردىڭ ايتۋىنشا, جىل سايىن ەلىمىزدە رەسپۋبليكالىق بيۋدجەت ەسەبىنەن 100-دەن استام مەكتەپتىڭ سالىناتىنىنا قاراماستان, ماسەلە تولىق شەشىلمەي وتىر. قازاقستاندا ءالى كۇنگە دەيىن ءۇش اۋىسىمدىق, اپاتتى مەكتەپتەر بار. وسىعان بايلانىستى ەلىمىزدە جان باسىنا شاققانداعى قارجىلاندىرۋدى ەنگىزۋدى قولداۋ ماسەلەسى وتە وزەكتى. جان باسىنا شاققانداعى قارجىلاندىرۋ جەكە سەكتوردى جاڭا مەكتەپتەر سالىپ, اشۋعا ىنتالاندىرادى. بۇگىندە قاناتقاقتى جوبا باستالىپ, جەكەمەنشىك مەكتەپتەردىڭ اشىلىپ جاتقانىن كورۋگە بولادى. سونداي-اق اتالعان جوبا نەگىزىندە قازاقستاندا مەكتەپكە دەيىنگى مەكەمەلەردى سالۋدىڭ وڭ تاجىريبەسى جۇزەگە اسپاق.
«بىرنەشە جىل بۇرىن مەكتەپكە دەيىنگى بىلىممەن قامتۋ ەلىمىزدە نەبارى 60% ەدى, قازىر – 93%. بۇعان جەكە سەكتوردى تارتۋ ەسەبىنەن قول جەتكىزىلدى. مەملەكەت باسشىسى «بالاپان» باعدارلاماسىنا باستاما ءبىلدىردى. مەملەكەتتىك – جەكەمەنشىك ارىپتەستىك جۇمىسى جانداندى. ماسەلەن, بيىلعى 7 اي ىشىندە ەنگىزىلگەن 40 مىڭ ورىننىڭ 30 مىڭى جەكە كومپانيالاردىكى» دەدى ۆيتسە-مينيستر.
سونىمەن قاتار الداعى ۋاقىتتا جەكەمەنشىك مەكتەپتەردە مەملەكەت مەملەكەتتىك تاپسىرىستى ورنالاستىراتىن بولادى. مينيسترلىكتىڭ ءباسپاسوز قىزمەتىنىڭ حابارلاۋىنشا, بۇگىنگى تاڭدا ەلىمىز بويىنشا مۇعالىمدەر سانىنىڭ جەتكىلىكتى ەكەنى ايتىلعان. پەداگوگتاردى دايارلاۋ ساپاسىنا ەرەكشە كوڭىل ءبولىنىپ وتىر. قازىر ەلىمىزدەگى ۇستازدار سانى – 285 مىڭ ادام. جىل سايىن ۋنيۆەرسيتەتتەردە 35 مىڭ ادام پەداگوگ ماماندىعىن الىپ شىعادى. اعىمداعى جىلى مەملەكەتتىك ءبىلىم گرانتىمەن وقىعان 6 مىڭ مامان وقۋ بىتىرگەن.
ميراس اسان,
«ەگەمەن قازاقستان»
