بۇل سپورتشىلاردىڭ ەكەۋىنىڭ دە ەسىمدەرى جانكۇيەرلەرگە جاقسى تانىس. وسى كۇنگە دەيىن 30 جاستاعى جالعاس 14 جەكپە-جەك وتكىزىپ, 11 رەت جەڭىس تويىن تويلادى.
7 كەزدەسۋدى مەرزىمىنەن بۇرىن اياقتادى. 27 جاستاعى تاگير 6 رەت ايقاس الاڭىنا شىعىپ, بارلىعىندا باسىمدىق تانىتتى. 4 كەزدەسۋدى مەرزىمىنەن بۇرىن اياقتادى. قازىرگى كەزدە ول ەرەجەسىز جەكپە-جەك الەمىندە داڭقى دۇركىرەپ تۇرعان حابيب نۇرماعامبەتوۆتىڭ اكەسى ءارى باپكەرى ابدۋلماناپ نۇرماعامبەتوۆتىڭ قول استىندا جاتتىعۋدا.
تاعى ءبىر ايتا كەتەرلىگى, رەسەي سپورتشىسى بۇعان دەيىن قازاقستاننىڭ ەكى بىردەي ورەنىنە تىزە بۇكتىرگەن. 2016 جىلدىڭ كۇزىندە اسۋ الماباەۆتان ايلاسىن اسىرسا, بىلتىرعى جىلدىڭ قاڭتار ايىنداعى شىڭعىس قايرانوۆتى ۇپاي سانىمەن قاپى قالدىردى. قانداستارىمىزدىڭ جىبەرگەن سول ەسەسىن وسى جولى جالعاس جۇماعۇلوۆ قايتارادى دەگەن ويدامىز. كەشتىڭ باستى جەكپە-جەگىندە جەڭىسكە جەتكەن ساڭلاققا Fight Nights Global نۇقاسىنىڭ جەڭىل سالماقتاعى چەمپيوندىق بەلبەۋى تابىس ەتىلەدى.
استاناداعى جارىس دەلەبەنى قوزدىرىپ, اسا قىزىقتى وتەتىنى ەش كۇمان تۋعىزبايدى. سەبەبى, قوس سپورتشى دا قازىر بابىندا. ەكەۋى دە جەڭىسكە جەتۋ جولىندا ەش ايانىپ قالمايمىز دەپ جۇلقىنىپ تۇر. جەڭىسكە جەتكەن جىگىت Fight Nights Global ۇيىمنىڭ چەمپيوندىق بەلبەۋىن يەلەنەدى. بۇل دا قوسىمشا ستيمۋل. سونىمەن قاتار, سول كەشتە وتەتىن وزگە دە باسەكەلەر كوپشىلىكتىڭ قىزىعۋشىلىعىن تۋدىراتىنى ءسوزسىز. ويتكەنى, جارىس جولىنا شىعاتىنداردىڭ دەنى ءتۇرلى ءدۇبىرلى دودالاردا وزدەرىنىڭ مىقتىلىعىن مويىنداتىن جۇرگەن جالىندى جىگىتتەر, – دەيدى وسى ءتۋرنيردى ۇيىمداستىرۋشىلاردىڭ ءبىرى, «الاش پرايد» كلۋبىنىڭ پرەزيدەنتى دانيار قاسقاراۋوۆ.
«ەسىلدەگى ايقاس» تۋرنيرىندە جالعاس جۇماعۇلوۆ پەن تاگير ۇلانبەكوۆتىڭ ايقاسىنان بولەك, تومەندە ەسىمدەرى اتالعان سپورتشىلار اراسىنداعى كەزدەسۋلەردى تاماشالاي الاسىزدار:
سۇلتان جولداسبەك (قازاقستان) – باتىرجون تۇرسىنوۆ (وزبەكستان)
دانيار قويشىبەك (قازاقستان) – اۆليە ناميدوۆ (وزبەكستان)
ميرات بەكىشەۆ (قازاقستان) – ابدۋراسۋل قۇلداشەۆ (وزبەكستان)
نيكولاي سامۋسەۆ (قازاقستان) – يلسۋر حامزين (رەسەي)
فارحاد سارسەنبەكوۆ (قازاقستان) – ۆلاديمير يشمەنەۆ (رەسەي)
مۇحاممەد مەيراموۆ (قازاقستان) – اميندجون تەشابوەۆ (تاجىكستان)
داۋرەن ەرمەكوۆ (قازاقستان) – نۇرسۇلتان رۋزيبوەۆ (وزبەكستان)
اكىمجان جاسۇلان (قازاقستان) – رادجابالي فايزيدين (تاجىكستان)
جۇمان جۇمابەكوۆ (قازاقستان) – مۇحاممەد ەمينوۆ (رەسەي)
ءسابيت ءجۇسىپوۆ (قازاقستان) – فاريدجۋللا قۇربانوۆ (رەسەي)
باقتيار نەسىپبەك (قازاقستان) – ماقساتدجون يۋسۋپوۆ (وزبەكستان)
اسۋ الماباەۆ (قازاقستان) – دجوۆحار دوشۋەۆ (رەسەي).
ال وسى جارىستا ونەر كورسەتەتىن جالعىز قىزىمىز زامزاگۇل فايزوللانوۆانىڭ كىممەن ايقاساتىنى ازىرگە بەلگىسىز. قالاي بولعان جاعدايدا دا «بوپاي» دەگەن لاقاپ اتپەن تانىمال سپورتشىمىز ءوز جانكۇيەرلەرىن جەرگە قاراتپايتىنىنا سەنىمدىمىز.
عالىم سۇلەيمەن,
«ەگەمەن قازاقستان»
