بۇلايشا وكىنىشتى رايمەن ءسوز ساپتاۋىمىزعا «اكتەپ» جاۋاپكەرشىلىگى شەكتەۋلى سەرىكتەستىگىنە قاراستى شەت ەلدەن جەتكىزىلگەن اسىل تۇقىمدى انالىق 253 باس ءىرى قارا مالدىڭ ءبىر كۇندە قىناداي قىرىلعانى بولىپ وتىر. بۇل وقىس وقيعا اقتوبە ايماعىندا ءارى تۇتاستاي ەل ىشىندە ءارتۇرلى الىپقاشپا اڭگىمەلەردىڭ تارالۋىنا تۇرتكى بولدى. انگۋس اتاۋىن يەلەنگەن اسىل تۇقىمدى مالدىڭ جاپپاي ءولىم-جىتىمگە ۇشىراۋىنىڭ باستى سىرى نەدە؟ وتكەن جۇما كۇنى وقيعا ورىن العان حرومتاۋ اۋدانىنداعى قوپا اۋىلىنا ارنايى كەلگەن اۋىل شارۋاشىلىعى مينيسترلىگى ۆەتەرينارلىق باقىلاۋ كوميتەتىنىڭ وكىلدەرى مەن سالا ماماندارى بۇل ساۋالعا بارىنشا ناقتىراق ءارى تۇجىرىمدى جاۋاپ قايتارۋعا تىرىستى.
بۇل ورايدا ەڭ الدىمەن ايتايىن دەگەنىمىز, العاشقىدا جۇرتشىلىق اراسىندا اسىل تۇقىمدى انالىق مال اۋسىل, ءسىبىر جاراسى سەكىلدى اسا قاۋىپتى ىندەتتەردىڭ سالدارىنان قىرىلىپ قالعان جوق پا ەكەن دەگەن وي مەن كۇدىك باسىم تۇسكەن-ءدى. ايتسە دە رەسپۋبليكالىق ۆەتەرينارلىق زەرتحانانىڭ اقتوبە فيليالى جۇرگىزگەن جەدەل-زەرتتەۋ جۇمىستارىنىڭ ناتيجەلەرى بۇل جورامالداردى جوققا شىعارادى. ويتكەنى اتالعان ماسەلەگە قاتىستى الىنعان سىنامالاردا اسا قاۋىپتى ىندەتتى مال اۋرۋى تاياقشالارى كەزدەسپەگەن. ونىڭ ەسەسىنە, ماماندار مەن ساراپشىلار 253 باس اسىل تۇقىمدى ءىرى قارانىڭ حالىق اراسىندا ەسەكميا دەپ اتالىپ كەتكەن ۋلى شوپتەن جاپپاي ۋلانىپ, تىراپاي اسقانى جونىندەگى ۇيعارىمعا كەلىپ وتىر.
شارۋا قوجالىعىنىڭ جەتەكشىسى ورازاق سامۇراتوۆتىڭ مالىمدەۋىنشە, قولدان ۇرىقتاندىرۋ ءۇشىن بورداقىلاۋ كەشەنىنە قويىلعان اسىل تۇقىمدى انالىق مالدارعا «اكتەپ» جشس-نە كەلىسىمشارت بويىنشا مال ازىعى مەن جەم-ءشوبىن ازىرلەيتىن
8 بريگادانىڭ بىرىنەن اكەلىنگەن ءشوپ بەرىلگەن. وعان ەسەكميا ارالاسىپ كەتكەن كورىنەدى. مال مەن جەردىڭ جاعدايىن جاقسى بىلەتىن كونەكوزدەردىڭ ايتۋىنشا, اتالعان ۋلى ءشوپ دالالىق القاپتىڭ بارلىق جەرىندە ەمەس, تەك وزەن-كولدەردىڭ اڭعارلارى مەن ارنالارىندا وسەدى. ونى جەرگىلىكتى مال جەمەيدى. سوندا ارنايى بريگادا ازىرلەگەن جەم-ءشوپتىڭ قۇرامىنا ەسەكميا قالايشا ارالاسىپ كەتىپ ءجۇر؟ بۇل ساۋالدىڭ جاۋابى ازىرگە بەلگىسىز كۇيىندە قالىپ وتىر. قازىرگى كۇنى ماسەلەنىڭ ءمان-جايىن ودان ءارى تەرەڭىرەك زەرتتەۋ جۇمىستارى جۇرگىزىلۋدە.
بۇگىنگى تاڭدا قوپا اۋىلىندا ۋلانىپ ولگەن مالدىڭ ەتى مەن قاڭقاسى زالالسىزداندىرىلىپ جويىلعان. ايتسە دە وسىمەن بۇكىل ءىستى بىتتىگە ساناۋعا بولمايتىنى ايان. ەڭ باستىسى, اقتوبە ايماعىندا ورىن العان وقىس وقيعادان ەلىمىزدەگى تۇتاستاي مال شارۋاشىلىعى سالاسىنىڭ وكىلدەرى اششى ساباق الۋعا ءتيىس. بۇل جايت ەڭ الدىمەن مالدى ازىقتاندىرۋ مەن جەم-ءشوپتىڭ ساپاسىن قاداعالاۋ ماسەلەسىندە جاۋاپسىزدىق پەن سەلقوستىق كورىنىستەرى ورىن العانى ايقىن اڭعارىلادى. وسى ورايدا ەلىمىزدەگى مال بورداقىلاۋ مەن سەمىرتۋ كەشەندەرىندە مال ازىعىنىڭ ساپاسى مەن قۇنارىن قاداعالايتىن ارنايى ماماندار توبىن جاساقتاۋ قاجەتتىگى دە ايقىن كورىنەدى.
ەكىنشىدەن, سوڭعى جىلدارى ءتيىستى وكىلەتتى ورگاندار مۇحيتتىڭ ارعى جاعىنان مال ساتىپ الۋ ماسەلەسىن شەكتەن تىس اسىرا پايدالانىپ جۇرگەنىنە دە بىرجاقتى قاراۋعا بولمايتىنىن اقتوبەدە ورىن العان وقيعا دالەلدەي تۇسەدى. ونىڭ ەسەسىنە, وتاندىق اسىل تۇقىمدى مال سانىن وسىرۋگە كوبىرەك كوڭىل بولىنسە, ۇتىلا قويماسىمىز انىق. ويتكەنى «سىرىن بىلمەگەن اتتىڭ سىرتىنان جۇرمە» دەمەي مە دانا حالقىمىز.
تەمىر قۇسايىن,
«ەگەمەن قازاقستان»
اقتوبە وبلىسى,
حرومتاۋ اۋدانى,
قوپا اۋىلى
