ايماقتىق فورۋمدا ءىرى باستاۋىش پارتيا ۇيىمدارىنىڭ توراعالارى مەن استانا, الماتى قالالارىنىڭ, قوستاناي جانە قاراعاندى وبلىستارىنداعى اۋماقتىق فيليالدار توراعالارىنىڭ ءبىرىنشى ورىنباسارلارى قاتىستى.
فورۋم جۇمىسى 4 سەكتسيا بويىنشا جۇرگىزىلدى. ءبىرىنشى سەكتسيادا پارتيا حاتشىسى تامارا دۇيسەنوۆانىڭ قاتىسۋىمەن باستاۋىش پارتيا ۇيىمدارىنىڭ بەلسەندىلىگىن ارتتىرۋ تۇجىرىمداماسى تالقىلاندى. قاتىسۋشىلارعا پارتيانىڭ بارلىق قىزمەتىن تسيفرلاندىرۋعا, پارتيا مۇشەلەرىنىڭ بىرىڭعاي بازاسىن قۇرىپ, قۇجات اينالىمىن ازايتۋعا جانە پارتيا قىزمەتىنىڭ تيىمدىلىگىن ارتتىرۋعا باعىتتالعان «تسيفرلى پارتيا» جوباسى تانىستىرىلدى.
ەكىنشى سەكتسيادا قاتىسۋشىلار پارتيالىق ءبىلىم بەرۋ جۇيەسىن, بپۇ مەن پارتيا مۇشەلەرى قىزمەتىن بەلسەندى ەتۋ تۇجىرىمداماسىن تالدادى. ءۇشىنشى سەكتسيادا پارتيانىڭ يدەولوگيالىق جوبالارى, تسيفرلاندىرۋ, حالىقتىڭ ساندىق ساۋاتىن ارتتىرۋ, بيزنەستىڭ گەواقپاراتتىق ونلاين-سەرۆيسى, كىشى جانە ورتا بيزنەستى دامىتۋ, مەملەكەتتىك جاستار ساياساتى, «رۋحاني جاڭعىرۋ», ت.ب. باعدارلامالاردى قولداۋ جانە جۇزەگە اسىرۋعا باعىتتالعان پارتيالىق 22 جاڭا جوبانى جۇزەگە اسىرۋ بويىنشا جۇمىس فورمالارى مەن ادىستەر تالقىلاندى.
«جاڭا جوبالار – بىركۇندىك اكتسيا نەمەسە كەڭسەلىك شارالار ەمەس. پارتيا مۇشەلەرىنىڭ قىزمەتى ناتيجەسىندە قازاقستاندىقتاردىڭ ءومىرى مەن تۇرمىسى جاقسارۋى ءتيىس», دەدى ت.دۇيسەنوۆا.
ءتورتىنشى سەكتسيا جۇمىسى ادامي رەسۋرستاردى باسقارۋ مەن پارتيانىڭ كادرلىق رەزەرۆىن قالىپتاستىرۋ ماسەلەسىنە, باستاۋىش پارتيا ۇيىمدارى مەن پارتيا مۇشەلەرىنىڭ دەرەكتەر بازاسىن بەلسەندى ەتۋ, باستاۋىش پارتيا ۇيىمدارىن ىنتالاندىرۋ مەن جەتىلدىرۋ ءۇشىن باعالاۋ جۇيەسىن ەنگىزۋگە ارنالدى.
ايماقتىق فورۋمنىڭ قاتىسۋشىلارى ءۇشىن «نۇر وتان» پارتياسىنىڭ ورتالىق اپپاراتىنىڭ قۇرىلىمدىق بولىنىستەرىنىڭ جەتەكشىلەرى, پارتيانىڭ ساياسي مەنەدجمەنت اكادەمياسىنىڭ وقىتۋشىلارى, تانىمال ترەنەرلەر مەن ساياساتكەرلەر ءارتۇرلى باستاۋىش پارتيا ۇيىمدارىنىڭ وكىلدەرىنە ارناپ «شەشەندىك ونەر», «ساياسي كوممۋنيكاتسيا» جانە ت.ب. تاقىرىپتار بويىنشا ترەنينگىلەر وتكىزدى.
قايرات ءابىلدا,
«ەگەمەن قازاقستان»
قاراعاندى
