قىزىلجار وڭىرىندە قۇرىلىس يندۋسترياسى قارقىندى دامىپ كەلە جاتقانىن مىنا تسيفرلار ايعاقتاسا كەرەك. تەك بيىلدىڭ وزىندە الەۋمەتتىك سالالاردى قايتا جاڭعىرتۋعا 18,8 ميلليارد تەڭگە قارجى باعىتتالىپ, جىل سوڭىنا دەيىن 230 مىڭ شارشى مەتر تۇرعىن ءۇيدى تاپسىرۋ جوسپارلانعان. بۇل كورسەتكىش وتكەن جىلعا قاراعاندا 20 پروتسەنتكە ارتىق.
«جاس وركەن», «بەرەكە» سىندى زامان تالابىنا لايىقتالىپ سالىنعان شاعىن اۋدانداردا وقۋشىلار سارايى, 900 جانە 600 ورىندىق ەكى مەكتەپ, ءبىر اۋىسىمدا 250 ناۋقاستى قابىلداۋعا ارنالعان ەكى ەمحانا مەن 700 ورىنعا شاقتالعان كوپبەيىندى اۋرۋحانا, 500 ورىندىق قازاق سازدى دراما تەاترى تاعى باسقا الەۋمەتتىك-مادەني نىسانداردىڭ قۇرىلىسى جالعاسۋدا.
«وتكەن جىلى وبلىس ورتالىعىندا ون ءبىر كوپقاباتتى تۇرعىن ءۇي پايدالانۋعا بەرىلىپ, مىڭنان استام وتباسى قونىستوي تويلادى. بيىل بولىنگەن قاراجاتتىڭ 70 پروتسەنتى يگەرىلدى. قازىرگى قىزۋ قارقىنعا قاراعاندا, العا قويعان مەجە ءسوزسىز ورىندالادى», دەدى وبلىستىق قۇرىلىس باسقارماسىنىڭ باسشىسى سەرىك مۇحامەديەۆ. ونىڭ سوزىنە قاراعاندا «نۇرلى جەر» مەملەكەتتىك باعدارلاماسى شەڭبەرىندە 14,7 ميلليارد تەڭگە بولىنگەن. جالپى العاندا, 2018-2019 جىلدار ارالىعىندا 97 مىڭ شارشى مەتر تۇرعىن ءۇي كوپشىلىك يگىلىگىنە بەرىلىپ, 1,5 مىڭ وتباسى پاتەرمەن قامتاماسىز ەتىلمەك. بۇل – وڭىردە بۇرىن-سوڭدى بولماعان كورسەتكىش.
جۋىردا اتالعان باعدارلاما اياسىندا «ساتىپ الۋ قۇقىعىمەن جالعا بەرىلەتىن تۇرعىن ءۇي» باعىتى بويىنشا 116 پاتەر يەسىن تاپتى. جايلى باسپانانىڭ كىلتىن وبلىس باسشىسى قۇمار اقساقالوۆ سالتاناتتى جاعدايدا تابىس ەتتى. ۇلكەن قۋانىشقا جينالعاندار الدىندا سويلەگەن سوزىندە اكىم جاڭا پاتەرلەردىڭ ەلباسى باستاماشى بولعان «نۇرلى جەر» جوباسى اياسىندا تۇرعىزىلعانىن, ءبىرىنشى كەزەكتە كوپ بالالى انالار مەن وتباسىلارعا, جەتىم بالالارعا, مۇمكىندىگى شەكتەۋلى جاندارعا بەرىلگەنىن جەتكىزدى. «مەملەكەتتىك باعدارلامالار ارقاسىندا جەرلەستەرىمىز ءوز ومىرلەرىن ساپالى تۇردە جاقسارتۋعا تولىق مۇمكىندىك الىپ وتىر», دەدى ول.
«نۇرلى جەر» باعدارلاماسىنىڭ وپەراتورى «بايتەرەك» ۇبح» اق-تىڭ ەنشىلەس كاسىپورنى «قازاقستان يپوتەكالىق كومپانياسى» يۇ اق ەكەنى بەلگىلى. كومپانيا جىل سوڭىنا دەيىن 96 پاتەرلىك تاعى ءبىر ءۇيدى ىسكە قوسۋدى مەجەلەپ وتىر. ونىڭ باسقارۋشى ديرەكتورى ارمان مۇقاتوۆتىڭ ايتۋىنشا, ساتىپ الۋ قۇقىعىمەن جالعا بەرىلەتىن تۇرعىن ۇيلەر ءبىرىنشى كەزەكتە ءالسىز الەۋمەتتىك ساناتقا جاتاتىن توپتاردى قامتيدى. جالداۋ قۇنىنىڭ ءبىر شارشى مەترى ايىنا 772 تەڭگەدەن اسپايتىنى, باستاپقى جارنا مەن ارتىق تولەمدەردىڭ بولماۋى پاتەرلەردىڭ قولجەتىمدىلىگىن, وتباسىلىق قارجىلىق جۇكتەمەنىڭ ازدىعىن اڭعارتادى. جيىرما جىل مەرزىمگە بەرىلگەن پاتەر كەيىن جالعا الۋشىنىڭ باسىبايلى مەنشىگىنە وتەدى. باسپانا قۇنىن مەرزىمىنەن بۇرىن وتەۋگە دە بولادى. كومپانيا ەكى جىلدىڭ ىشىندە جالپى اۋماعى 22121 شارشى مەتر بولاتىن 410 پاتەردى كەزەكتە تۇرعان ادامدارعا تاپسىرعان.
9300 شارشى مەتر اۋماقتى قۇرايتىن, ساتىپ الۋ قۇقىعىمەن جالعا بەرىلەتىن تۇرعىن ۇيلەردى سالۋمەن «البات قۇرىلىس» سەرىكتەستىگى اينالىسىپ, 850 ميلليون تەڭگە جۇمساعان.
– قىزىم باسپانا كەزەگىندە 12 جىل تۇرعان ەدى. ەندى ەكى بولمەلى جايلى باسپاناعا قول جەتكىزىپ, قۋانىشىنا ورتاقتاسىپ كەلىپ وتىرمىن, – دەيدى اق جاۋلىقتى اجە التىنشاش رامازانوۆا كوڭىل تولقىنىسىن جاسىرا الماي.
بىلتىر ءالجۋاز ساناتتا پاتەرلى بولعان 400 وتباسى قونىستوي تويلاسا, بيىل 240 پاتەر سالىنۋدا. 2019 جىلى 442 پاتەرلىك 9 كوپقاباتتى تۇرعىن ءۇي تۇرعىزىلماق. ال قالا اۋماعىنداعى «سولنەچنىي» كەنتىندە ءۇش جىلدىڭ ىشىندە وسى زامانعى ساۋلەت ۇلگىسىمەن ەكى مىڭنان استام جەكە ءۇي بوي كوتەرۋگە ءتيىس.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
