كەزدەسۋ بارىسىندا ەكونوميكا, ساۋدا-ساتتىق جانە ينۆەستيتسيالار, دوستىق قارىم-قاتىناستى نىعايتۋ سالالارىنداعى ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى. سونداي-اق, ەلشى دج. كرولدىڭ قازاقستانداعى ديپلوماتيالىق ميسسياسىنىڭ قورىتىندىسى شىعارىلدى.
«مەملەكەت باسشىسى ن. نازارباەۆتىڭ ۆاشينگتونعا جۇمىس ساپارىنان كەيىن بايلانىس ودان ءارى نىعايا ءتۇستى. جالپى العاندا, اتقارىلعان جۇمىستار ارقاسىندا ءبىزدىڭ ءوزارا قارىم-قاتىناسىمىزدىڭ ەكونوميكالىق قۇراۋشىسى بۇرىنعىدان جوعارى دەڭگەيگە جەتتى», — دەدى پرەمەر-مينيستر باقىتجان ساعىنتاەۆ.
بۇگىنگى تاڭدا قازاقستان مەن اقش اراسىنداعى ەكىجاقتى قاتىناستار كەڭەيتىلگەن ستراتەگيالىق ارىپتەستىك دەڭگەيىنە شىقتى. قر پرەمەر-ءمينيسترى ب. ساعىنتاەۆتىڭ وتكەن جىلى ءساۋىر ايىندا كاليفورنيا مەن نيۋ-يورككە جاساعان جۇمىس ساپارىنىڭقورىتىندىسى بويىنشا سان-فرانتسيسكودا باس كونسۋلدىق اشىلدى. وندا تسيفرلاندىرۋ باعىتى بويىنشا «زەردە», «استانا حاب» كومپانيالارىنىڭ, «الاتاۋ» تەحنوپاركىنىڭ بىرىككەن وكىلدىكتەرى جۇمىس ىستەيدى. باس كونسۋلدىق جۇمىسى اياسىندا قازاقستاننىڭ اقش-تىڭ وڭتۇستىك-باتىسىمەن, سونىڭ ىشىندە كرەمني القابىندا ورنالاسقان جەتەكشى امەريكالىق كومپانيالارمەن ىنتىماقتاستىعى دامۋدا.
بۇدان وزگە, كەزدەسۋ بارىسىندا ەكى ەل اراسىنداعى ىسكەرلىك قارىم-قاتىناستى ودان ءارى دامىتۋ جونىندەگى جۇمىس جوسپارلارى تالقىلاندى.
ءوز كەزەگىندە, دج. كرول قازاقستان پرەزيدەنتى ن. نازارباەۆتىڭ بارلىق مەملەكەتتەرمەن دوستىق ءوزارا قارىم-قاتىناستى دامىتۋ مەن نىعايتۋ جولىنداعى ستراتەگياسى مەن ەرەكشە ءرولىن اتاپ ءوتتى.
«قازاقستاننىڭ بۇۇ قاۋىپسىزدىك كەڭەسىندەگى ءرولى ەلەۋلى اسەرگە يە. قازاقستان – 26 جىل بۇرىن كەڭەس وداعىنىڭ قۇرامىندا بولعان ەل, ال بۇگىندە ايماقتاعى جانە جالپى الەمدەگى كوش باستاۋشى ەلدەردىڭ ءبىرى. قازاقستان پرەزيدەنتىنىڭ ساياساتى قارىم-قاتىناستى تۇراقتاندىرۋ ءۇشىن كورشى مەملەكەتتەرگە وتە ماڭىزدى», — دەدى قر-داعى اقش ەلشىسى.
دج. كرول قازاقستان رەسپۋبليكاسىنداعى امەريكا قۇراما شتاتتارىنىڭ ەلشىسى رەتىندە 2015 جىلعى 8 قاڭتاردان باستاپ جۇمىس ىستەيدى.
