ەلوردا تۇرعىندارىنىڭ سانى جىل سايىن ارتىپ كەلەدى. وعان تۋ كورسەتكىشى مەن ىشكى كوشى-قوننىڭ ارتۋى اسەر ەتىپ وتىرعانى انىق. رەسمي دەرەكتەرگە سۇيەنسەك, باس قالادا ءار وقۋ ماۋسىمى سايىن مەكتەپكە باراتىن بالالاردىڭ سانى 10-15 مىڭعا ارتىپ وتىرادى. 2010-2011 جىلدارى استانا مەكتەپتەرىندە 74 مىڭ بالا وقىسا, وتكەن جىلى 145 مىڭ وقۋشى ءبىلىم العان. وسىعان بايلانىستى ەل استاناسىندا شاعىن مەكتەپتەردىڭ دە قاتارى كوبەيىپ كەلەدى. بۇل بىرىنشىدەن, بالالاردىڭ ساپالى ءبىلىم الۋىنا مۇمكىندىك تۋدىرسا, ەكىنشىدەن ۇستازداردىڭ جۇگىن جەڭىلدەتۋگە جول اشادى.
«SEED School» ماتەماتيكالىق-تىلدىك مەكتەبىندە 1-4-سىنىپ وقۋشىلارى قازاق جانە ورىس توپتارىنا ءبولىنىپ ءبىلىم الادى. وندا ماتەماتيكا جانە قازاق, اعىلشىن تىلدەرى تەرەڭدەتىپ وقىتىلىپ, روبوتتى تەحنيكا, راديوتەحنيكا جانە ينفورماتيكاداعى جاڭا تەحنولوگيالار دا ەگجەي-تەگجەيلى ۇيرەتىلەدى. وقۋشىلار تۇسكە دەيىن نەگىزگى پاندەر بويىنشا ساباق السا, تۇستەن كەيىن مەكتەپ ۇيىمداستىرعان 12 ۇيىرمەگە قاتىسادى. ونىڭ ىشىندە بالالاردىڭ مەملەكەتتىك ءتىلدى جەتىك مەڭگەرۋى ءۇشىن ۇيىمداستىرىلعان قازاق تىلىندەگى دراما ۇيىرمەسى جانە اعىلشىن تىلىندە جۇرەتىن جۋرناليستيكا ۇيىرمەسى بار.
ء«بىزدىڭ شاعىن مەكتەبىمىزدە ماتەماتيكا جانە قازاق, اعىلشىن تىلدەرى تەرەڭدەتىپ وقىتىلادى. بۇدان بولەك 12 ۇيىرمە مەن فاكۋلتاتيۆتى ساباقتار جۇرگىزىلەدى. بالالار تاڭعى 8.00-دەن 18.00-گە دەيىن وسىندا بولادى. مەكتەپتىڭ ءوز اسحاناسى بار, وقۋشىلار 3 مەزگىل تاماقتانادى», دەيدى «SEED School» مەكتەبىنىڭ وقۋ ءىسى جونىندەگى مەڭگەرۋشىسى بيبىگۇل نۇرىمعاليەۆا.
75 ورىندىق شاعىن مەكتەپتىڭ تاعى ءبىر ەرەكشەلىگى – ءار سىنىپقا 16 بالادان ارتىق وقۋشى قابىلدانبايدى. جاڭا مەكتەپتىڭ اشىلۋ سالتاناتىنا قاتىسىپ, قۇتتىقتاۋ ءسوز سويلەگەن «دارىن» رەسپۋبليكالىق عىلىمي-تاجىريبەلىك ورتالىعىنىڭ ديرەكتورى شولپان قيراباەۆا ەلوردادا شاعىن مەكتەپتەر مەن بالاباقشالاردىڭ وتە قاجەت ەكەنىن ايتىپ, وسىنداي ءبىلىم ورتالىقتارىنىڭ كوبەيۋى ءبىلىم ساپاسىن ارتتىرۋعا كومەكتەسەتىنىن جەتكىزدى.
ءبىلىم ورداسىنا جۇمىسقا شاقىرىلعان قىزمەتكەرلەردىڭ بارلىعى جاڭارتىلعان وقۋ باعدارلاماسى كۋرسىنان وتكەن ءبىرىنشى كاتەگوريالى ۇستازدار ەكەنىن ايتقان مەكتەپ ديرەكتورى گۇلسىم ەگىزباەۆا ساباق حالىقارالىق ادىسنامامەن ءۇش تىلدە جۇرگىزىلەتىنىن اتاپ ءوتتى.
ايتا كەتەيىك, SEED – ىزدەنۋ, زەرتتەۋ, ەكسپەريمەنت جاساۋ جانە جاڭالىق اشۋعا نەگىزدەلگەن وقۋ جۇيەسى. بۇل جۇيە بالالاردىڭ العان ءبىلىمىن تەوريالىق جانە پراكتيكالىق تۇرعىدا مەڭگەرۋىنە مۇمكىندىك بەرەدى.
مايگۇل سۇلتان,
«ەگەمەن قازاقستان»
