ۇلان – جىلدىڭ ۇزدىك فۋتبولشىسى

ەلىمىزدىڭ فۋتبول فەدەراتسياسى جىلدىڭ ەڭ مىقتى ويىنشىسىن انىقتادى. ول – قازاقستان ۇلتتىق قۇراما كومانداسىنىڭ تالانتتى ويىنشىسى, جامبىل وبلىسىنىڭ تۋماسى جانە بىرنەشە جىل «تاراز» فۋتبول كلۋبىنىڭ نامىسىن قورعاعان, بۇگىندە قاراعاندىنىڭ «شاحتەر» كومانداسى ساپىندا ادەمى ويىن ورنەگىن تانىتىپ جۇرگەن ۇلان قونىسباەۆ بولىپ تابىلدى. قوڭىر كۇزدە تۇركيا مەن قازاقستان قۇراما كوماندالارىنىڭ كەزدەسۋى بولعانى بەلگىلى. سول تارتىستى ويىندا ۇلاننىڭ تۇرىكتەر قاقپاسىنا الىستان قيعاشتاي سوققان گولىن الەمدىك فۋتبول جانكۇيەرلەرى ەرەكشە شەبەرلىك دەپ باعالاعان بولاتىن. سونداي-اق, ۇلان «شاحتەر» كومانداسىنىڭ بيىلعى ەل چەمپيونى اتانۋىنا دا ۇلكەن ۇلەس قوستى. سوندىقتان بولار, ەلىمىزدىڭ فۋتبول تىزگىنىن ۇستاعان بىلىكتى ماماندار 2011 جىلى ەلىمىزدە ۇلانعا تەڭەسەتىن فۋتبولشى جوق دەپ ۇيعارىپتى. ارينە, ءبىز مۇنى وتە ورندى جانە ءادىل شەشىم دەپ قابىلدايمىز. «شاحتەردىڭ» شەبەر ويىنشىسى ۇلان قونىسباەۆتى ۇزدىك فۋتبولشى دەگەن اتاعىمەن قۇتتىقتاي وتىرىپ, ودان الداعى جىلداردا دا جەڭىستى ويىندار كۇتەمىز. كوسەمالى ساتتىباي ۇلى. تاراز قالاسى. سۋرەتتە: ۇلان قونىسباەۆ (سول جاقتا) كەزەكتى شابۋىل ساتىندە.