«وڭىردەگى بارشا مۇسىلماننىڭ ەسىنە سالار ءبىر جايت, قۇربان شالۋ تەك ايت نامازى وقىلعان سوڭ بارىپ قانا جۇزەگە اسىرىلادى. بۇدان ەرتەرەك شالىنسا, قۇرباندىق شالعان بولىپ ەسەپتەلمەيدى. شىعىس قازاقستان بويىنشا بارلىق جەردە ايت نامازى تاڭعى ساعات جەتىدە وقىلادى. بيىل وبلىستىق مەشىتتىڭ اۋلاسىنا ارنايى ءۇش كيىز ءۇي تىگىلىپ, باۋىرساق تەگىن تاراتىلادى, ءتۇرلى ويىن-ساۋىقتىق شارالار ۇيىمداستىرىلىپ, سپورتتىق جارىستار وتكىزىلەدى. بيىل ءبىز قۇربان ايت مەرەكەسىن تويلاۋدى قايىرىمدىلىق جاساۋدان باستادىق. ەڭ الدىمەن مەرەكە الدىندا «كوكتاۋداعى» ء«ۇمىت» بالالار ۇيىندەگى 200-دەن استام بالاعا قايىرىمدىلىق كورسەتىپ, داستارحان جايدىق, ءتۇرلى ءتاتتى-دامدىلەردى سىيعا تارتتىق», - دەگەن د.تىلەۋحان ۇلى مەرەكەنىڭ ءۇشىنشى كۇنىندە ءۇش جۇزدەي ادامعا قۇرباندىق ەتىن تاراتۋدى, «مەكتەپكە جول» اكتسياسى اياسىندا 200 بالاعا كومەك كورسەتۋدى جوسپارلاپ وتىرعاندارىن جەتكىزدى.
قۇربان شالۋ كەزىندە مەيلىنشە تازالىققا ءمان بەرىلمەك. ۇيدە شالىنسا تازا جەرگە شالىپ, باسىن قۇبىلاعا قاراتۋ كەرەك, پىشاق مەيلىنشە قايرالعان وتكىر بولعانى, مالدىڭ قينالماعانى دۇرىس. ارنايى قاساپشىلار قىزمەتى دە بولادى. قۇقىق قورعاۋ سالاسىنىڭ وكىلدەرى دە ول جەردە ءۇش كۇن بويىن كەزەكشىلىك جاسايدى. ونىڭ ۇستىنە قازاقستان مۇسىلماندارى ءدىني باسقارماسىنىڭ وسكەمەن ءوڭىرى بويىنشا وكىل يمامى, وبلىستىق حاليفا التاي مەشىتىنىڭ باس يمامى ەرمەك قاجى مۇقاتاي وڭىردەگى مال وسىرەتىن شارۋاشىلىق يەلەرىنە قۇرباندىققا سويىلاتىن مالدىڭ باعاسىن تىم قىمباتتاتپاي, ورتاشا باعادا ساۋدالاۋعا ۇندەۋ تاستاعان. «قۇرباندىق شالۋدىڭ ماعىناسى اللاعا جاقىنداۋ دەگەندى بىلدىرەدى. اللا تاعالاعا ءبىزدىڭ مالىمىزدىڭ ەتى, قانى قاجەت ەمەس, ءبىزدىڭ شىنايى نيەتىمىز قاجەت. قۇرباندىق قۇبىلاعا قاراتىپ شالىنادى. ەڭ باستىسى, ىسىراپشىلدىققا جول بەرىلمەۋ كەرەك. ەتىن الىپ باسىن, سيراعىن تەرىسىن, ىشەك-قارنىن تاستاپ كەتپەۋ كەرەك. تەرىسىن وتكىزىپ, اقشاسىن قايىرىمدىلىققا جۇمساسا, ول دا دۇرىس بولادى. سونداي-اق, قارىزعا مال الىپ شالعان دا دۇرىس بولمايدى, ودان دا كەلەسى جىلى اقشا جيناپ, ءوز نيەتىڭمەن قۇرباندىق شالعان دۇرىس. قۇرباندىققا ەكى جاستان اسقان قوي, ءىرى قارا مال, بەس جاستان اسقان تۇيە سويىلادى. سيىر مەن تۇيەنى جەتى وتباسىعا دەيىن بىرىگىپ شالادى, ەتتىڭ ۇشتەن ءبىرىن ادامدارعا تاراتقان دۇرىس», – دەيدى نايب يمام.
ازامات قاسىم,
«ەگەمەن قازاقستان»
وسكەمەن
