سىياقى قورىنىڭ جيىنتىق مولشەرى 5,5 ميلليون تەڭگەنى قۇرايدى. وتىنىمدەر 2018 جىلعى 1 شىلدەدەن باستاپ 1 قاراشاعا دەيىن قابىلدانادى. جەڭىمپازدار وسى جىلى جەلتوقساننىڭ ءبىرىنشى ونكۇندىگىندە جاريالانادى.
كونكۋرستىڭ قۇرىلتايشىسى جانە ۇيىمداستىرۋشىسى - قازاقستان رەسپۋبليكاسى تۇڭعىش پرەزيدەنتى - ەلباسىنىڭ قورى. كونكۋرستىڭ ارىپتەستەرى: قازاقستان جازۋشىلار وداعى جانە مەملەكەتتىك ءتىلدى دامىتۋ قورى.
«ۇزدىك پروزا», «ۇزدىك پوەزيا», «ۇزدىك دراماتۋرگيا», «بالالارعا ارنالعان ۇزدىك شىعارما» سياقتى ءۇش اتالىمدا وتەتىن كونكۋرسقا 18 بەن 35 جاس ارالىعىنداعى جاس قازاقستاندىق اۆتورلار قاتىسا الادى. بۇرىن ەش جەردە جاريالانباعان ەڭبەكتەر عانا قارالادى. وسى ءتورت نوميناتسيا بويىنشا ءاربىر جەڭىمپازعا 1,5 ميلليون تەڭگە بەرىلەدى. بيىل «استانانىڭ 20 جىلدىعىنا ارنالعان ۇزدىك شىعارما» ارنايى تاقىرىپتىق نوميناتسياسى قوسىلىپ وتىر.
كونكۋرستىق جۇمىستار مىناداي ولشەمدەر بويىنشا باعالانادى:
جانرعا سايكەستىگى, وزىندىك ويلاۋ قابىلەتى, اۆتورلىق ۇستانىمى, بايانداۋ بىرىزدىلىگى جانە كوزقاراسى, يدەيانىڭ سونىلىعى, ادەبي-كوركەمدىك قۇندىلىعى, قيالى مەن شىعارماشىلىق ءادىسى, ەموتسيالىق جانە ەستەتيكالىق اسەرىنىڭ تەرەڭدىگى. كونكۋرسقا تۇسكەن شىعارمانى وبەكتيۆتى باعالاۋ انونيمدىك پرينتسيپپەن قامتاماسىز ەتىلەدى, ەڭبەكتى وقىپ وتىرىپ جانە ول تۋرالى ءوزىنىڭ كاسىبي پىكىرىن قالىپتاستىرا كەلە قازىلار القاسىنىڭ مۇشەلەرى اۆتوردىڭ ەسىمىن تانىپ بىلمەيدى.
«التىن توبىلعى» جۇلدەسى جىل سايىن قازاقستان ادەبيەتىندەگى جاڭا ەسىمدەردى اشادى, جاستار مەن قاۋىمداستىققا جاس قالامگەرلەردىڭ ومىرلىك فيلوسوفياسىن بەينەلەيتىن قازىرگى زامانعى ادەبيەتتى دامىتۋعا كومەكتەسەدى. وسىنداي بىرەگەي ءىس-شارا پرەزيدەنتتىڭ «بولاشاققا باعدار: رۋحاني جاڭعىرۋ» ستراتەگيالىق باعدارلاماسىن ىسكە اسىرۋعا ىقپال ەتەدى.
تولىعىراق ۇيىمداستىرۋشى قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى سايتىنان بىلۋگە بولادى.
