قازىرگى تاڭدا ماڭعىستاۋ وبلىسى قۇرىلىس قارقىنى بويىنشا استانا جانە الماتى قالالارىمەن بىرگە ۇزدىك ۇشتىككە ەنىپ وتىر. 2017 جىلدىڭ قورىتىندىسى بويىنشا قۇرىلىس جۇمىستارىنىڭ كولەمى 197 ملرد. تەڭگەنى قۇراسا, پايدالانۋعا بەرىلگەن تۇرعىن ءۇي كولەمى 833,022 مىڭ شارشى مەتردى قۇرادى. 2018 جىلدىڭ 6 ايىنىڭ قورىتىندىسى بويىنشا قۇرىلىس جۇمىستارىنىڭ كولەمى 75 ملرد. تەڭگە نەمەسە بىلتىرعى جىلدىڭ 6 ايىمەن سالىستىرعاندا 119%, ال تۇرعىن ءۇي كولەمى 649 مىڭ شارشى مەتر نەمەسە 128% بولدى.
اقتاۋ قالاسىنىڭ 33 شاعىن اۋدانىنداعى قۇرىلىسى كوپ جىلدار بۇرىن باستالعان تۇرعىن ۇيلەردىڭ 1-كەزەڭى اياقتالىپ تاپسىرىلسا, «وبلىستىق ونكولوگيالىق ورتالىق», اقتاۋ قالاسىنداعى №2 كاناليزاتسيالىق-تازارتۋ عيماراتى, «انا مەن بالا ورتالىعى» سياقتى نىسانداردىڭ قۇرىلىسى قولعا الىندى.
«نۇرلى جەر» مەملەكەتتىك باعدارلاماسى اياسىندا جالعا بەرىلەتىن تۇرعىن ءۇي قۇرىلىسى بويىنشا مۇنايلى جانە قاراقيا اۋداندارىندا 312 پاتەردى قۇرايتىن تۇرعىن ۇيلەردىڭ قۇرىلىسى جۇرگىزىلدى.
«وبلىس اكىمى ەرالى توعجانوۆتىڭ تاپسىرماسىمەن «تسيفرلىق قازاقستان» باعدارلاماسىنا سايكەس, رەسپۋبليكادا العاش بولىپ, ارقايسىسى 72 پاتەرلىك, 9 قاباتتى 4 ءۇيدى اقپاراتتىق مودەلدەۋ نەمەسە ءۆىم-تەحنولوگيامەن جوبالاۋعا تاپسىرىس بەرىلدى. بۇل تەحنولوگيا سالىناتىن نىساننىڭ قۇرىلىسىنىڭ تولىق اقپاراتتىق سيپاتتاماسىن جاساۋعا مۇمكىندىك بەرىپ قانا قويماي, جالپى شىعىنداردى 15%-عا دەيىن قىسقارتۋعا جانە دە بارلىق باقىلاۋ جۇيەسىن اۆتوماتتاندىرۋعا مۇمكىندىك بەرەدى. تۇتاستاي العاندا, قۇرىلىس سالاسىن اقپاراتتىق مودەلدەۋ تەحنولوگياسى اقپاراتتى باسقارۋ پروتسەستەرىنىڭ دۇرىستىعىن قامتاماسىز ەتەتىن بولادى» , دەدى ماڭعىستاۋ وبلىسى اكىمىنىڭ ورىنباسارى ر.ساكەەۆ.
شارا بارىسىندا ءوڭىردىڭ قۇرىلىس سالاسىنىڭ دامۋىنا زور ۇلەسىن قوسقانى ءۇشىن قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ «قۇرمەتتى قۇرىلىسشى» توسبەلگىسىمەن مەيرامبەك قىمباتوۆ - «بيسەنتين» جشس باس ينجەنەرى, ۆەرا ەفيمەنكو, گيدجران گابيبوۆ -«Le Pes»جشس پرورابى, گالينا كيم - «اليانس LTD» جشس ديرەكتورى, مەدەۋ كەنجەتاەۆ -«ايكوم لتد» جشس قۇرىلىس ۋچاسكەسىنىڭ باستىعى, سۇڭعات مۇڭالباەۆ - «اكتاۋ بس ستروي» جشس باس ديرەكتورى ماراپاتتالدى. سونداي-اق, ۇزدىك قۇرىلىسشىلارعا قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ قۇرمەت گراموتاسى مەن العىس حاتى, قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ, قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتىنىڭ العىس حاتى تابىستالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
