جاسىراتىنى جوق, قازىر ۆوكزالعا بارساڭىز سەرگەلدەڭگە تۇسكەن جولاۋشىلاردان كوز سۇرىنەدى. دەنى اقشاسىنا بيلەت تاپپاي الەك. جيىنعا قاتىسقان كولىكتىك باقىلاۋ ينسپەكتسياسى دا, كولىك پوليتسەيلەرى دە ءتارتىپ ورناتۋدا قاۋقارسىز ەكەندەرىن مويىنداعانداي. جولسەرىكتەر مەن پويىز باسشىلارىنا قانشا جەردەن شارا قولدانىپ جاتسا دا, «باياعى جارتاس – سول جارتاس». كاسسالاردا بيلەت جوق بولعانىمەن, جولسەرىكپەن كەلىسۋگە بولادى, الايدا بيلەتتىڭ باعاسى اسپانداپ تۇر. قاجەت دەسەڭىز جولسەرىك ءوزىنىڭ جاتىن ورنى نەمەسە ءۇشىنشى قاباتتى دا بەرە سالادى.
جيىندا بۇعان دەيىن بىرنەشە رەت «جاسىرىن ساتىپ الۋشى» ادىسىمەن جۇرگىزىلگەن قوعامدىق مونيتورينگتىڭ قورىتىندىسى بويىنشا ناقتى دەرەكتەر كەلتىرىلدى. ال تەمىرجولشىلار زاڭ بۇزۋشىلىقتار ورىن الىپ وتىرعاندىعىن جوققا شىعارا المادى.
«قازاقستان تەمىر جولى» اق ماڭعىستاۋ وبلىستىق فيليالى جۇك تاسىمالداۋ بولىمشەسىنىڭ باسشىسى ناجمەدين عۇباشەۆ قازىرگى جاعدايدان حاباردار ەكەندىگىن جاسىرمادى. تۇراقتى تۇردە تەكسەرىستەر جۇرگىزىلىپ, جولسەرىكتەرگە جولاۋشىلاردى بيلەتسىز تاسىمالداماۋ جونىندە ۇدايى ەسكەرتىلەتىنىن ايتتى جانە الداعى ۋاقىتتا بۇل جۇمىستار جالعاسادى دەپ سەندىردى. سونىمەن قاتار جولاۋشىلار پويىزى ۆاگوندارىن جاڭارتۋ بويىنشا جۇمىس ىستەپ جاتىرمىز دەدى.
ال وبلىستىق كولىكتىك باقىلاۋ ينسپەكتسياسىنىڭ تەمىرجول جانە سۋ كولىگىندەگى باقىلاۋ ءبولىمى باسشىسىنىڭ مىندەتىن اتقارۋشى قۋاندىق اياپوۆتىڭ ايتۋىنشا, جىل باسىنان بەرى 38 جولاۋشىلار پويىزى تەكسەرىلىپ, 70 جولاۋشىنى بيلەتسىز تاسىمالداعان 17 جولسەرىك اكىمشىلىك جاۋاپكەرشىلىككە تارتىلعان.
ەلىمىزدىڭ 2015-2015 جىلدارعا ارنالعان سىبايلاس جەمقورلىققا قارسى ستراتەگياسىن ىسكە اسىرۋدى سىرتقى تالداۋ جانە باعالاۋ جونىندەگى ماڭعىستاۋ وبلىستىق ارنايى مونيتورينگتىك توپ ءتورايىمى رۋحيا الدوڭعاروۆا, جولاۋشىلار پويىزىنداعى سانيتارلىق جاعدايىن سىنعا الىپ, ۆاگونداردى جاڭارتۋ قاجەتتىگىن ايتىپ وتسە, ونىڭ ورىنباسارى اسەت مانوۆ قۇجاتسىز, بيلەتسىز جانە راسىمدەلمەگەن جۇكتەردى تاسىمالداۋعا توسقاۋىل قويۋ كەرەكتىگىن العا تارتتى. سەبەبى بيلەتسىز جۇرگەندەردىڭ اراسىندا اسا اۋىر قىلمىس جاساپ تەرگەۋدەن نەمەسە سوتتان بوي تاسالاپ, قارۋ تاسىمالداپ نەمەسە تەرروريستىك ۇيىمداردىڭ مۇشەلەرىنىڭ جۇرمەسىنە كىم كەپىل بولا الادى دەگەن ماسەلە كوتەردى. بۇل رەتتە جولسەرىكتەر بيلەتسىز جولاۋشىلار جانە راسىمدەلمەگەن جۇكتەر تاسىمالداۋىن دوعارماسا, بيۋدجەتكە كەلتىرىلەتىن شىعىندار تاعى بار.
اگەنتتىكتىڭ اۋماقتىق دەپارتامەنتىنىڭ باسشىسى جولاۋشىلار پويىزىنىڭ بريگاديرلەرى مەن جولسەرىكتەردى زاڭدا كورسەتىلگەن تالاپتاردى ورىنداپ, تارتىپكە باعىنۋعا شاقىردى.
ء"بىزدىڭ كوزدەگەنىمىز سىزدەردى جازالاۋ ەمەس, كەرىسىنشە وزدەرىڭىزدى زاڭسىز ارەكەتتەرگە بارماۋعا شاقىرۋ. راس, قازىرگى جاعداي ءماز ەمەس, سىزدەردىڭ ۇستىلەرىڭىزدەن شاعىم ايتۋشىلار كوپ. ورتادا جۇرگەن دەلدالدار دا انىقتالادى", دەدى دەپارتامەنت باسشىسى نۇرگۇل جاننازاروۆا.
قورىتا ايتقاندا جولسەرىكتەر وزدەرىنىڭ قىزمەتتىك مىندەتتەرىن, جولاۋشىلار مەن جۇكتەردى تاسىمالداۋ ەرەجەلەرىن ورەسكەل بۇزۋ فاكتىلەرىن دوعاراتىن ەمەس. سول سەبەپتى قوعام وكىلدەرى بيلەتسىز جولاۋشىلارمەن كۇرەسكە باعىتتالعان شارالاردى ءالى دە كۇشەيتۋ كەرەك دەگەن ۇستانىمدا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
