جاس تولقىننىڭ ەل ەرتەڭى ەكەندىگى الميساقتان بەلگىلى. بۇگىن قوعامدى مازالاپ وتىرعان ماڭىزدى ماسەلە سول جاستارىمىزدىڭ رۋحاني جان دۇنيەسى, ءبىلىمى مەن بىلىگى, كوزقاراسى مەن كوڭىل كوكجيەگى قانداي دەڭگەيدە بولۋى كەرەك. زىمىراعان جۇيرىك زاماننىڭ جەتەگىنە ىلەسىپ كوشتەن قالمايتىن, كوپتەن وزاتىن ءبىر شوعىر ءبىلىمدى جاستار ءوز ونەگەلەرىمەن, قول جەتكىزگەن تابىستارىمەن قۇربىلارىنىڭ كوزايىمىنا اينالىپ, ادەمى مىسال بولسىنشى-اق دەيسىڭ. «زەرەن» دەمالىس ورتالىعىنداعى رەسپۋبليكالىق جاستاردىڭ جازعى ءبىلىم لاگەرىنىڭ ەكىنشى ماۋسىمى وتكىزىلۋدە. وعان جاستار ۇيىمدارىنىڭ كوشباسىشالارى, جاستار رەسۋرستىق ورتالىقتارىنىڭ ماماندارى, كاسىپكەرلەر مەن «قازاقستاننىڭ 100 جاڭا ەسىمى» جوباسىنىڭ جەڭىمپازدارى قاتىسۋدا.
وسى جاستار الدىندا قازاقستان رەسپۋبليكاسى پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا مەملەكەت پەن قوعام الدىندا تۇرعان اسقارالى مىندەتتەردى سارالاي كەلە, سول مىندەتتەردى شەشۋگە جاستاردىڭ دا بىلەك سىبانا ات سالىسۋ قاجەتتىگىنە توقتالدى. ءاربىر باعدارلامانىڭ وزىندىك ەرەكشەلىگى مەن تيىمدىلىگى تۋرالى تەرەڭنەن قوزعاپ ءتۇسىندىرىپ بەردى. سونىڭ ىشىندە اسىرەسە, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا كوپ توقتالدى. تورتكۇل دۇنيەنى تەگىس شارپىعان باسەكەگە قابىلەتتىلىككە ءبىز قالاي قول جەتكىزەمىز. ءورىسى كەڭەيگەن وركەنيەتتى ەلدەرمەن يىق تىرەستىرۋ ءۇشىن نە ىستەۋىمىز كەرەك؟ وسىناۋ ساۋالدار جالعىز مودەراتورلاردى عانا ەمەس, جينالعان جاستاردى دا تولعاندىرىپ جۇرگەندىگىن انىق بايقاۋعا بولادى. شەشەننىڭ ءسوزىن مۇقيات تىڭداعان ولار ءوز كوڭىلدەرىندەگى ساۋالدارعا تۇشىمدى جاۋاپ الدى.
جاستارمەن بىرگە ءبىر ساباعىنا ءبىز دە قاتىستىق. جاستار الدىندا ءسوز سويلەگەن بەلگىلى ساياساتكەر ايدوس سىرىم مەن «قازاقپارات» حاا باس ديرەكتورى اسقار وماروۆ ەل مەن جەر, ءتىل ءتارىزدى قۇندىلىقتار تۋرالى وي تولعادى. قىسقا قايىرىپ ايتقاندا, ۇزىن-ىرعاسى بەس كۇنگە جوسپارلانعان ءبىلىم لاگەرىنىڭ جاس تولقىنعا بەرەرى بەسباتپان.
بايقال ءبايادىل,
«ەگەمەن قازاقستان»
اقمولا وبلىسى,
زەرەندى اۋدانى.
