ۇلى ابايدىڭ تۋعان كۇنى تۇڭعىش رەت تاشكەنتتە تويلاندى

ادەبيەت • 14 تامىز، 2018

ۇلى ابايدىڭ تۋعان كۇنى تۇڭعىش رەت تاشكەنتتە تويلاندى

ەلباسى نۇرسۇلتان نازارباەۆ پەن وزبەكستان پرەزيدەنتى شاۆكات ميرزيەەۆتىڭ ءوزارا ىنتىماقتاستىقتى دامىتۋ جونىندەگى كەلىسىمدەرى اياسىندا باۋىرلاس وزبەك جۇرتى ارنايى قاۋلى قابىلداپ، 2018 جىلدى «؛وزبەكستانداعى اباي جىلى»؛ دەپ جاريالاعانى بەلگىلى. وسى كەلىسىم شەڭبەرىندە ۇلى ابايدىڭ تۋعان كۇنى بيىل تۇڭعىش رەت تاشكەنت شاھارىندا كەڭ كولەمدە اتالىپ ءوتتى. ايتۋلى شاراعا شىعىس قازاقستان وڭىرىنەن وبلىس اكىمىنىڭ ورىنباسارى اسەم ءنۇسىپوۆا باستاعان ارنايى دەلەگاسيا قاتىسىپ قايتتى.

Egemen Qazaqstan

وزبەك ەلىنىڭ استاناسىنداعى سالتاناتتى شارا اباي كوشەسىندەگى اباي ەسكەرتكىشىنىڭ جانىندا، قازاقستان ەلشىلىگىنىڭ ەڭسەلى عيماراتى الدىندا باستالىپ، وعان ەلىمىزدىڭ وزبەكستانداعى توتەنشە جانە وكىلەتتى ەلشىسى ەرىك وتەمباەۆ، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، وزبەكستان رەسپۋبليكاسىنىڭ ۇلتارالىق قاتىناستار جونىندەگى كوميتەتىنىڭ ءتوراعاسى رۋستام كۋربانوۆ سەكىلدى قۇرمەتتى قوناقتار قاتىستى. «؛بيىل ناۋرىزدا قابىلدانعان وزبەكستان پرەزيدەنتىنىڭ قاۋلىسىندا اباي شىعارماشىلىعى قازاقستانمەن قاتار، وزبەك حالقىنىڭ دا رۋحاني دامۋىنا زور ىقپال ەتكەنى اتاپ كورسەتىلگەن. اباي ەسكەرتكىشىنىڭ الدىندا اقىننىڭ تۋعان كۇنى قارساڭىندا ولەڭ وقۋ بۇدان بىلاي داستۇرگە اينالماق»؛، - دەدى شارانىڭ اشىلۋىندا ءسوز العان ەرىك وتەمباەۆ.

شىعىس قازاقستاننان ارنايى بارعان دەلەگاسيا تاشكەنتكە قۇر كەلمەپتى. وزبەكستان جازۋشىلار وداعىنىڭ عيماراتىندا وتكەن كونفەرەنسيادا بەلگىلى عالىم اراپ ەسپەنبەتوۆ «؛اباي الەمى»؛ سەرياسىمەن باسىلىپ جاتقان 100 تومدىق توپتامانىڭ العاشقى بەس كىتابىن وزبەكستاندىق ارىپتەستەرىنە تارتۋ ەتتى. سەمەي قالالىق تاريحي-ولكەتانۋ مۋزەيى مەن وبلىستىق امبەباپ كىتاپحانا قىزمەتكەرلەرى ازىرلەگەن كورمەنى تاشكەنتتىڭ زيالى قاۋىمى قىزىعا تاماشالادى.

اقىن ەسكەرتكىشى الدىنداعى سالتاناتتى شارادا قۇتتىقتاۋ ءسوز سويلەگەن وبلىس اكىمىنىڭ ورىنباسارى اسەم ءنۇسىپوۆا ۇلى ابايدى ۇلىقتاپ جاتقان باۋىرلاس مەملەكەتكە شىعىس قازاقستان حالقىنىڭ اتىنان العىسىن جەتكىزدى.

«؛تاشكەنت تورىندەگى تويعا ۇلى ابايدىڭ جەرلەس ۇرپاقتارى رەتىندە قاتىسۋ &ndash؛ ءبىز ءۇشىن ۇلكەن ابىروي. اقىننىڭ مۇراسى ءوزى تۋعان وڭىردە دە كەڭىنەن ناسيحاتتالۋدا. ونىڭ شىعارماسى بۇگىندە الەمنىڭ 28 تىلىنە اۋدارىلدى. قازاقستان پرەزيدەنتى نۇرسۇلتان نازارباەۆتىڭ باستاماسىمەن قولعا الىنعان «؛رۋحاني جاڭعىرۋ»؛ باعدارلاماسى دا ۇلى اقىننىڭ مۇراسىن تۇگەندەۋگە كوپ سەپتىگىن تيگىزۋدە. بيىلعى جازدا عانا 2000-نان استام مەكتەپ وقۋشىسى ۇلى اباي تۋعان جيدەباي وڭىرىنە ساياحات جاساپ، اباي الەمىمەن تىنىستاپ قايتتى. بۇل مازمۇندى ساياحاتقا وزبەكستان وقۋشىلارىن دا شاقىرامىز»؛، - دەدى ءا.نۇسىپوۆا.

شارا اياسىندا تاشكەنتتەگى قازاق جاستارى اباي ولەڭدەرىن قوس تىلدە جاتقا وقىسا، سەمەيلىك ءداستۇرلى ءانشى بەرىك وماروۆ ھاكىمنىڭ اندەرىن ناقىشىنا كەلتىرە شىرقاپ، كورەرمەننىڭ كوڭىلىن ءبىر سەلپىلتىپ تاستادى. ەلشىلىك الدىنداعى ءىس-شارا اقىن ەسكەرتكىشىنە گۇل شوقتارىن قويۋمەن تۇيىندەلىپ، وزبەكستان جازۋشىلار وداعىنىڭ عيماراتىنداعى كونفەرەنسيامەن جالعاستى.

ازامات قاسىم،

«؛ەگەمەن قازاقستان»؛