ومىرزاق شوكەەۆ جانە مينيسترلىكتەن كەلگەن كوماندا الدىمەن قوستاناي قالاسىنىڭ ىرگەسىندەگى بىرقاتار شارۋاشىلىقتاردى ارالاعاننان كەيىن, اۋىل شارۋاشىلىعى اكتيۆىمەن كەزدەسىپ, ءماجىلىس وتكىزدى. وندا اۋىل شارۋاشىلىعىن دامىتۋ, ەكسپورتقا ءونىم شىعارۋ, اسىرەسە مال شارۋاشىلىعىن وركەندەتۋ ماسەلەلەرى قارالدى. اگروونەركاسىپ كەشەنىن دامىتۋدىڭ مەملەكەتتىك باعدارلاماسىن جاڭارتۋ ماسەلەسى ءسوز بولدى.
«بۇگىندە ءومىر وتە تەز قارقىنمەن وزگەرىپ كەلەدى.وسىعان وراي ءبىز دە جۇمىس تاسىلىنە جاڭا كوزقاراس قالىپتاستىرۋىمىز قاجەت. مىسالى جىلىنا 20 ميلليون توننا استىق وندىرسەك, سونىڭ 12 ميلليون تونناسى ىشكى نارىققا جۇمسالادى, قالعانىن ەكسپورتقا شىعارۋىمىز قاجەت. الايدا سول 8 ميلليون توننا استىقتى سىرتقا ساتۋ وڭاي بولىپ وتىرعان جوق. بۇرىنعى قالىپتاسقان سىرتقى نارىق ءبىز ءۇشىن تارىلىپ كەتكەن. ەگەر استىقتى دۇرىس ساتا الماساق, ونى وندىرگەننەن نە پايدا؟ سوندىقتان بۇرىنعى ءداستۇرلى كوزقاراسپەن قالۋعا بولمايدى», دەدى ومىرزاق شوكەەۆ.
اۋىل شارۋاشىلىعى ءمينيسترىنىڭ ورىنباسارى ارمان ەۆنيەۆ اۋىل شارۋاشىلىعىنا بەرىلەتىن سۋبسيديانىڭ كولەمى ازايمايدى, قايتا وسەدى, بىراق ونىڭ سيپاتى وزگەرەتىنىن ايتتى. ول سۋبسيديا ەندى ءسۇتتىڭ ليترىنە, ەگىننىڭ گەكتارىنا ەمەس, اۋىل شارۋاشىلىعىنىڭ دامۋىنا ىقپال ەتەتىن ينۆەستيتسيالىق قارجى ەسەبىندە بولۋى كەرەكتىگىن ايتتى.
كەڭەستە ەت ەكسپورتىن دامىتۋعا بايلانىستى مال جايىلىمى, مالدىڭ ازىعىن دايىنداۋ, شاعىن, وتباسىلىق فەرمەرلىك شارۋاشىلىقتاردى دامىتۋ تۋرالى دا ماسەلەلەر كوتەرىلدى. ومىرزاق ەستاي ۇلى امەريكا قۇراما شتاتتارىندا 750 مىڭ فەرمەرلىك شارۋاشىلىق ەلدەگى ەتتىڭ 80 پايىزىن وندىرەتىنىن تىلگە تيەك ەتتى. سوندىقتان «كەڭەستىك قاتىپ قالعان كوزقاراس شەڭبەرىندە» قالىپ قويماي, مال شارۋاشىلىعىن, اسىرەسە, فەرمەرلىك شارۋاشىلىقتاردى دامىتۋدى مىندەت ەتىپ قوياتىنىن ايتتى.
«قازاقستاندىق ەت باعدارلاماسى تەك فەرمەرلەرگە ەسەپتەلگەن», دەدى مينيستر.
ء نازيرا جارىمبەت,
«ەگەمەن قازاقستان»
قوستاناي
