نۇرسۇلتان نازارباەۆ تۋريستەرمەن اڭگىمەلەسۋ بارىسىندا كاسپي شيپاجايلارىندا دەمالۋدىڭ ارتىقشىلىقتارىن, سونىڭ ىشىندە باعانىڭ قول جەتىمدىلىگىن, سۋعا شومىلۋ ماۋسىمىنىڭ ۇزاقتىعىن, اقتاۋ قالاسى ينفراقۇرىلىمىنىڭ جاقىندىعىن, قوناق ءۇي سانىنىڭ كوپتىگىن اتاپ ءوتتى.
– مەن بۇعان دەيىن الاكولدە, بالقاشتا, بۋرابايدا بولدىم. بۇل دەمالىس ايماعى وتاندىق ءتۋريزمدى دامىتۋ ءۇشىن جاڭا مۇمكىندىكتەر بەرەدى. ءبىز وسى سالانى ىلگەرىلەتۋدى جوسپارلاپ وتىرمىز. اقتاۋ قالاسى كەلەشەكتە قازاقستاننىڭ انتالياسىنا اينالاتىن بولادى, – دەدى مەملەكەت باسشىسى.
ءبىر ماۋسىمدا 140 مىڭعا جۋىق ادامدى قابىلداۋعا مۇمكىندىگى بار دەمالىس ايماعى 5,7 گەكتاردى قامتيدى جانە اقتاۋ قالاسىنان 25 شاقىرىم جەردە ورنالاسقان. تۋريستىك نىسانعا تارتىلعان ينۆەستيتسيانىڭ جالپى كولەمى – 485,2 ميلليون تەڭگە.
