وتكەن اپتانىڭ سوڭىندا ەلوردا تورىندەگى ەڭسەلى داڭعىلداردىڭ ءبىرى «اباي» كوشەسىنىڭ بويىندا ورنالاسقان دانا-عۇلاما ەسكەرتكىشى الدىندا ويشىل اقىننىڭ تۋعان كۇنىنە ارناپ, قالالىق مادەنيەت جانە سپورت باسقارماسىنىڭ تاپسىرىسىمەن «شاراپات» الەۋمەتتىك قىزمەت كورسەتۋ ورتالىعى «اباي – بۇكىل حالىق پەن بۇكىل ادامزات بالاسى» اتتى ادەبي-مۋزىكالىق كەش وتكىزدى.
ۇيىمداستىرۋشىلاردىڭ پايىمىنان اڭعارعانىمىز, عۇلاما-اقىننىڭ تۋعان كۇنى قارساڭىندا, ونى ەسكە الىپ, قازاقتىڭ رۋحاني سۋسىنىنا اينالعان قارا سوزدەرى مەن پاراساتتى جىرلارىن ناسيحاتتاپ, سونىمەن قاتار دانالىقتىڭ قاينار سوزىنە اينالعان اقىن ۇلاعاتىن بولاشاق ۇرپاقتىڭ بويىنا ءسىڭىرۋ بۇگىنگى كۇننىڭ اينىماس پارىزى.
وسى ورايدا, اقىن كەشىنە جينالعان قالا تۇرعىندارى مەن كوپشىلىككە جاس تالانت ءداستۇرلى ءانشى اقەركە يباش اقىن اتامىزدىڭ «وزگەگە كوڭىلىم تويارسىڭ» ءانىن ناقىشىنا كەلتىرە ورىنداپ بەرسە, ورتا مەكتەپ وقۋشىسى ماقپال راحاتقىزى دانانىڭ تالىمگە تولى 28-ءشى قارا ءسوزىن مانەرلەپ وقىپ شىقتى. سونداي-اق, جوعارىداعى «شاراپات» الەۋمەنتتىك قىزمەت كورسەتۋ ورتالىعىنىڭ مۇشەلەرى ۆ.زوتوۆا جانە ل.كوزلوۆا اپايلار اباي اتامىزدىڭ جىرلارىن ورىسشا ورعىتسا, جاس بۇلدىرشىندەر مۇرسال, اقبوتا اسلانقىزدارى, مەدەۋ اقىلبەك اقىن اتاسىنىڭ ولەڭ-وسيەتتەرىن ورىنداپ, كورەرمەنگە كوزقۋانىش سىيلادى.
ءماندى كەشكە ماڭىز قوسقان دۇنيە ەلدوس ماقسات ۇلى مەن دانيار كەنجەبەك ۇلىنىڭ مانەرلى جىرلارىمەن قاتار, تالاپتىڭ تۇلپارىن ءمىنىپ جۇرگەن اقىن قارىنداستارمىز قارلىعاش قاباي مەن جۇلدىزاي ىسقاقتىڭ اقىن اتاسىنا ارناپ جازعان جىرلارى كوپتىڭ كوڭىلىنەن شىقتى.
شارا سوڭىن قورتىندىلاعان ۇلى ابايدىڭ جيەن ۇرپاعى, ناقتىراق ايتساق اقىلبايدىڭ الىمق ۇلىنان تۋعان قاۋاشتىڭ قىزى ءلايلا مۇقلىسوۆنا ۇلى اتاسىنىڭ جىرلارىن وقىپ, ءوزىنىڭ ۇلكەن اتاسى سالىقتىڭ اكەسى بايمۇقامەت ەكەنىن بۇل ادامدى بىلايعى ەل-جۇرت پەن اقىن شىعارماشىلىعىن زەرتتەۋشى عالىمدار «ابايدىڭ ەرتەگىشىسى» رەتىندە بىلەتىنىن جەتكىزدى.
بەكەن قايرات ۇلى,
«ەگەمەن قازاقستان»
