كورمەنى ارالاعان اعايىننىڭ كوڭىلدەرى كوك جايلاۋعا قونعانداي كۇي كەشكەنى تالاس تۋدىرماسا كەرەك. كوريفەيدىڭ ءوزى كوركەمدەپ ورنەكتەگەن ءتۇرلى قۇمىرالار, تاباقشالار, ساۋىتتار, اڭ-قۇستار مەن ميفتىك بەينەلەر, تاڭعاجايىپ تابيعات كورىنىستەرى ەرىكسىز كوز سۇيسىنتەدى.
كورمەدە كورنەكى قۇرال رەتىندە قابىرعاعا ىلىنگەن پابلو پيكاسسو ءومىربايانىنان وقىعانىمىزداي, 1946 جىلى فرانتسياداعى ۆاللوريس قالاسىنا بارىپ, سوناۋ ريم زامانىنان كەراميكا وندىرىسىمەن اينالىساتىن «مادۋرا» شەبەرحاناسىنىڭ جۇمىسىمەن تانىسۋ بارىسىندا تاعدىرىندا كۇرت وزگەرىس باستالادى. سۋرەتشىلىگى مەن مۇسىنشىلىگى ازدىق ەتكەندەي, ەندىگى جەردە كەراميكانىڭ قىر-سىرىن مەڭگەرۋگە كىرىسەدى. سونىمەن قويشى, شالقىعان شابىت اۋانىمەن ءتورت مىڭنان اسا دەكوراتيۆتى كەراميكالىق پىشىندەر جاساپ, اتتىڭ باسىن ءبىر-اق تارتادى. ونىڭ بارلىعىنا «پيكاسسو قولىنان شىققان» دەپ ارنايى بەلگى سوعىلعان كورىنەدى. ولاردىڭ ءبىرازىن كوزىمەن كورىپ, قولىمەن ۇستاعان استانالىقتاردا دا ارمان جوق. قالاي بولعاندا دا ۇلىلىقپەن ۇشىراسۋ جورالعىسى ەمەس پە, بۇل دەگەنىڭىز.
كورمەدەگى قۇندىلىقتاردىڭ ەكىنشى ءبىر بولىگى – پيكاسسونىڭ يلليۋستراتسيالىق قولتاڭبالارى. ولاردى سەلەستينا سەرياسى دەپ تە اتايدى. ونىڭ سەبەبى مىناۋ. «سەلەستينا» – سەرۆانتەستىڭ «دون كيحوتى» جازىلعانعا دەيىن يسپانياداعى وتە كەڭ تاراعان تراگيكومەديا. مۇنداعى باستى كەيىپكەر سەلەستينا اتتى ايلاكەر ايەل قوس عاشىق كاليستو مەن مەليبەيانى ءويتىپ-ءبۇيتىپ ءولتىرىپ تىنادى. فەرناندو دە روحاستىڭ بۇل كىتابى كەيىن فرانتسۋز تىلىنە اۋدارىلعاندا, يلليۋستراتسياسىن پابلو پيكاسسو جاساپتى. سودان بەزەندىرۋ باعىتىنداعى سۋرەتتەرى كلاسسيكاعا اينالىپ شىعا كەلگەن سىڭايلى.
قازاق قاۋىمىنا دۇنيەجۇزىلىك ءدۇلدۇل سۋرەتكەر پابلو پيكاسسو تۋىندىلارىنىڭ كورسەتىلۋى – شىن مانىندە جاعىمدى جاڭالىق. ەندەشە وسىناۋ جاقسى ءداستۇر جالعاسىن تابا بەرگەي.
ايتۋلى وقيعاعا ارنالعان سالتاناتتى راسىمدە ءسوز سويلەگەن مادەنيەت جانە سپورت ءمينيسترى ارىستانبەك مۇحامەدي ۇلى بۇل استانانىڭ مەرەيتويى اياسىندا ۇيىمداستىرىلعان شوقتىعى بيىك شارالاردىڭ ءبىرى ەكەندىگىن اتاپ ءوتتى. «پابلو پيكاسسو – تەك سۋرەت ونەرىنىڭ عانا ەمەس, سونىمەن بىرگە بۇكىل وركەنيەت كوشىنىڭ, جالپى ادامزاتتىڭ العا باسۋىنا قوماقتى ۇلەس قوسقان ادام. ويتكەنى مىناۋ بوزجايناق دۇنيەنىڭ سۇلۋلىعىن بار بوياۋىمەن قاعاز بەتىنە ءتۇسىرىپ, وعان ەرەكشە ءار بەرە ءبىلۋ اركىمنىڭ قولىنان كەلە بەرەتىن ءىس ەمەس», دەدى ول ويىن تۇيىندەپ.
بۇل كەشتە يتاليانىڭ قازاقستانداعى ەلشىسى پاسكۋالە د’اۆينو مەن ەلىمىزدەگى يسپانيا ەلشىلىگى ميسسياسى جەتەكشىسىنىڭ ورىنباسارى ايكي ماۋلەون مۋراماتسۋ مەملەكەتتەر اراسىنداعى مەيماندوستىق بەلگىسىندەي وسىناۋ يگى ءىستىڭ ويداعىداي جۇزەگە اسۋىنا تىلەكتەستىكتەرىن ءبىلدىردى. «الەمگە ايگىلى پيكاسسونىڭ جەكە كورمەسى قازاقستاندا تۇڭعىش رەت ۇيىمداستىرىلىپ وتىر. كوركەم شىعارمالار كوپتىڭ كوڭىلىنەن شىعىپ, مۇراجايعا كەلۋشىلەردى قۋانتارىنا سەنىمىمىز مول», دەستى ولار ورتاق پىكىرلەرىن جەتكىزىپ. ەكى بىردەي ەل رەسمي وكىلدەرىنىڭ قوسا قاباتتاسا سويلەۋى تەگىن ەمەس. سەبەبى پابلو پيكاسسو يسپانيانىڭ تۋماسى بولعانىمەن, ونىڭ وسى كورمەدەگى مۇرالارىن ساقتاۋشىلار يتاليالىق كوللەكتسيونەرلەر.
ال ۆەنەتسيالىق ونەرتانۋشى عالىم دجان كاميللو كۋستوزا بولسا, قازاقستاندىق كورەرمەندەر كوزايىمىنا اينالۋى ءتيىس 32 گراۆيۋرالىق جانە 66 كەراميكالىق جادىگەر ۇلى شەبەردىڭ ءومىرىنىڭ سوڭعى كەزدەرىندە دۇنيەگە كەلۋىمەن دە قۇندى ەكەندىكتەرىنە ەكپىن تۇسىرە ايتتى.
تالعات باتىرحان,
«ەگەمەن قازاقستان»
