قاتىسۋشىلار 6 مىڭ شاقىرىم جولدى ءجۇرىپ ءوتىپ, 6 ەلدىڭ 30 قالاسىن قامتيدى. ونىڭ ىشىندە رەسەي, بەلارۋس, پولشا, گەرمانيا سەكىلدى ەلدەر بار. جوبانى تانىستىرۋ, دوستىق قارىم-قاتىناستى نىعايتۋ جانە تاجىريبە الماسۋ ماقساتىندا 11 ۇلكەن قالادا قوعام بەلسەندىلەرىمەن, ەرەكشە قاجەتتىلىگى بار ادامدارمەن, سپورتشىلارمەن جانە باق وكىلدەرىمەن كەزدەسۋ وتكىزۋ جوسپارلانعان. ۆەلوشەرۋدىڭ نەگىزگى ماقساتى – سالاماتتى ءومىر سالتىن ناسيحاتتاۋ, ۆەلوسيپەدتى ەكولوگيالىق تازا كولىك ءتۇرى رەتىندە دارىپتەۋ, الەۋمەتتىك جانە ەكوتۋريزمدى دامىتۋ. سونىمەن قاتار پاراليمپيالىق سپورت ءتۇرى رەتىندە مۇگەدەك جاندار اراسىندا بۇل سپورت ءتۇرىنىڭ دامۋىنا ىقپال ەتۋ, جاستاردى پاتريوتتىققا تاربيەلەۋ.
«2016 جىلى مۇگەدەكتىگى بار ازاماتتارعا ارنالعان سپورتتىق جارىسقا قاتىستىم, شارانىڭ ۇيىمداستىرىلۋ دەڭگەيى وتە تومەن بولدى, ەشقانداي جاعداي جاسالماعان, قازىر بۇل سپورت ءتۇرى ءبىر ىزگە قويىلعان. سول كەزدە مەن وزىمىزدەن باستاماساق بولمايتىنىن ءتۇسىندىم. مىنە, بۇگىنگى ۆەلومارافون سونىڭ جەمىسى دەپ ايتقىم كەلەدى. ياعني ماقساتىمىز – زاعيپ جانە ناشار كورەتىن جاندار دا قوعامنىڭ مۇشەسى ەكەنىن, ءبىزدىڭ دە وزدىگىمىزدەن ءجۇرىپ-تۇرىپ, قوعامعا پايدامىزدى تيگىزە الاتىنىمىزدى دالەلدەۋ. سونىمەن قاتار نەگىزگى كوزدەگەنىمىز – ۆەلوسپورت پەن پاراسپورتتى ناسيحاتتاۋ. مۇنداي جوبا قازاقستاندا تۇڭعىش رەت ۇيىمداستىرىلىپ وتىر», دەيدى «شەكاراسىز سپورت» جوباسىنىڭ باسشىسى, «استانا – پاريج» ۆەلوشەرۋىنىڭ كاپيتانى باحتيار بازاربەكوۆ.
ۆەلومارافون استانا اكىمدىگى, «نۇر وتان» پارتياسى, قوعامدىق دامۋ مينيسترلىگى, «ا.ۆينوكۋروۆ اتىنداعى سپورتتى دامىتۋ جانە قولداۋ» قورى, پاراليمپيالىق كوميتەت, قازاقستان رەسپۋبليكاسى سپورت ۆەلوسيپەدى فەدەراتسياسى جانە «ەل تىرەگى» شاعىن جانە ورتا بيزنەس قاۋىمداستىعىنىڭ قولداۋىمەن ۇيىمداستىرىلىپ وتىر.
«Blind Race Astana – Paris» ۆەلومارافونىن 4 تامىزدا استاناداعى «قازاق ەلى» مونۋمەنتىنىڭ الدىندا رەسمي تۇردە باستالدى. سپورتتىق شارانى 2018 جىلدىڭ قىركۇيەك ايىنىڭ ورتاسىندا ۆەلوجارىستىڭ وتانى سانالاتىن فرانتسيانىڭ پاريج قالاسىندا اياقتاۋ جوسپارلانۋدا. ۆەلومارافون قازاقستان اۋماعىندا استانا, اتباسار, اۋليكول جانە قوستاناي ارقىلى ءوتىپ, ءارى قاراي رەسەي تاسجولدارىمەن پاريجگە دەيىن جالعاسادى.
ءالي بيتورە,
«ەگەمەن قازاقستان»
