كولىك سالاسىنا قىزىعۋشىلىقتى ارتتىرۋ ماقساتىندا قولعا الىنعان جاڭا جوبا ء بىلىمدى تەرەڭدەتۋ, سونىمەن قاتار وقۋشىلاردىڭ ماماندىقتى سانالى تۇردە تاڭداۋىنا ىقپال ەتەدى. كونكۋرستىڭ ەرەكشەلىگى, جەڭىمپاز اتانعان وزات وقۋشىلار ۇلىبريتانيانىڭ كرەنفيلد ۋنيۆەرسيتەتىنىڭ اەروكوسموس مەكتەبىنە تاعىلىمدامادان وتۋگە بارادى. كونكۋرستىڭ قاتىسۋشىلارى نەگىزىنەن بارلىق وبلىستىڭ جالپى ءبىلىم بەرۋ مەكتەپتەرىنىڭ 16 مەن 18 جاس ارالىعىنداعى وقۋشىلارى.
وڭىرلىك ىرىكتەۋ تۋرلارىن وبلىس اكىمدىكتەرى مەن استانا, الماتى جانە شىمكەنت قالالارىنىڭ اكىمدىكتەرى ۇيىمداستىرعان. ولاردىڭ ىشىنەن بۇگىندە فينالدىق ىرىكتەۋ كەزەڭىنە 85 ادام ءوتىپ وتىر. ءار كوماندا 4 وقۋشىدان جانە 1 كوماندا جەتەكشىسىنەن تۇرادى. فينالدىق ىرىكتەۋ تۋرىن كرەنفيلد ۋنيۆەرسيتەتىنىڭ وكىلدەرى وتكىزبەك. فينالدىق ىرىكتەۋ قورىتىندىسى بويىنشا 40 وقۋشى وقۋ-تانىمدىق ساپارعا جىبەرىلەدى.
كوميسسيا مۇشەلەرى قاتىسۋشىلاردى شىعارماشىلىق ويى جانە ۇسىنىستىڭ تيىمدىلىگى, اعىلشىن ءتىلىن قولدانۋى جانە بەرىلگەن تاپسىرمالارعا دۇرىس جاۋاپ بەرۋى بويىنشا باعالاپ وتىر.
بۇل شاراعا تۇڭعىش پرەزيدەنت – ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ, ادىلەت ۆيتسە-ءمينيسترى ناتاليا پان, ۇلىبريتانيانىڭ قازاقستانداعى ەلشىسى مايكل دجون گيففورد جانە نازارباەۆ ۋنيۆەرسيتەتتىڭ ۆيتسە-پرەزيدەنتى ەردەن قۇسايىن قاتىستى. سونداي-اق مەكتەپ وقۋشىلارى ءۇشىن تابىس تاريحى تۋرالى جانە اۆياترانسپورت ينجەنەرى ماماندىعى تۋرالى «ەير استانا» وكىلدەرى مۇحامەدجان مۇستافين جانە تەحنيكالىق قىزمەت كورسەتۋ بويىنشا اعا مەنەدجەر رۋسلان شاياحمەتوۆ لەكتسيالار وقىدى. ءوز كەزەكتەرىندە كرەنفيلد ۋنيۆەرسيتەتىنىڭ اەروكوسموس مەكتەبىنىڭ وكىلدەرى يان حوللينگۆورت اەروكوسموس ديناميكاسىنىڭ الەمى تۋرالى, فرەنك يۋكەس ۇشاقتاردى مودەلدەۋ تۋرالى, لەيتەنانت-پولكوۆنيك ەندريۋ حوۋلتون تىكۇشاق وپەراتسيالارى تۋرالى اڭگىمەلەپ بەردى.
«اتالعان كونكۋرس بالالارعا تەحنيكالىق ماماندىقتاردى دۇرىس تاڭداۋعا, اعىلشىن ءتىلىنىڭ دەڭگەيىن ارتتىرۋعا كومەكتەسەدى, سونداي-اق الەمنىڭ ۇزدىك اەروكوسموس مەكتەبىنە بارۋعا مۇمكىندىك بەرەدى. ءبىزدىڭ مىندەتىمىز – جاس ونەرتاپقىشتارعا قولداۋ كورسەتۋ», دەيدى تۇڭعىش پرەزيدەنت – ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ.
ايتا كەتۋىمىز كەرەك, اۋقىمدى شاراعا «ەير استانا» ۇلتتىق تاسىمالداۋشى جانە «Samruk-Kazyna Trust» كورپوراتيۆتىك قورى سەرىكتەس بولىپ وتىر.
ميراس اسان,
«ەگەمەن قازاقستان»
