سونداي ۇستازداردىڭ ءبىرى كليمەن بالابەك ۇلى, سوناۋ كسرو كەزىنەن باستاپ, كەيىن ەلىمىزدىڭ تاۋەلسىزدىك العان جىلدارىندا ەلوردانىڭ ءبىلىم بەرۋ سالاسىنا ەلەۋلى ۇلەسىن قوسقان, 40 جىل بويى ءبىر مەكتەپتە سانالى عۇمىرىن سارپ ەتىپ, ۇرپاققا ساپالى ءبىلىم بەرۋ سالاسىندا ايانباي ەڭبەك ەتكەن ۇلكەن جۇرەكتى, ىزگى نيەتتى جان. وسىعان بايلانىستى قولىما قالام الىپ, وسىنداي ۇلاعاتتى ۇستازدىڭ بولعانى جايلى ءوسىپ كەلە جاتقان ۇرپاققا ءبىر-ەكى اۋىز ءسوز جازۋدى ءجون كوردىم.
وتباسىندا جالعىز تاربيەلەنىپ, اتا-اناسىن قادىرلەگەن جانە سوڭعى ساتتەرىنە دەيىن بالالىق پارىزىن وتەپ, باتالارىن العان بۇل ازامات الماتىداعى اباي اتىنداعى پەداگوگيكا ينستيتۋتىن حيميا, بيولوگيا جانە اۋىل شارۋاشىلىعى نەگىزدەرى ماماندىعى بويىنشا ءبىتىردى. ەڭبەك جولىن بۇرىنعى تسەلينوگراد, اقمولا, بۇگىنگى استاناداعى ىبىراي التىنسارين اتىنداعى №26 مەكتەپتە (بۇرىنعى م.عابدۋللين اتىنداعى №62 قازاق ورتا مەكتەبى) باستاپ, وسى ءبىلىم ورداسىندا 40 جىل تابان اۋدارماي ەڭبەك ەتتى.
1960-2000 جىلدارى مەكتەپتە قاتارداعى مۇعالىم, مەكتەپ ديرەكتورىنىڭ وقۋ-تاربيە ءىسى جونىندەگى ورىنباسارى, كەيىن مەكتەپتىڭ ديرەكتورى بولىپ قىزمەت اتقاردى. ءار وقۋشىعا ەرەكشە كوڭىل ءبولىپ, بار كۇشىن تەرەڭ ءبىلىم بەرۋگە باعىتتادى. قازىرگى كەزدە شاكىرتتەرى پارلامەنت دەپۋتاتى, جوعارى وقۋ ورىندارىنىڭ عىلىمي قىزمەتكەرلەرى, اۋىل شارۋاشىلىعى, مەديتسينا سىندى قوعامنىڭ سان ءتۇرلى سالاسىندا ەڭبەك ەتۋدە.
زەينەت دەمالىسىنا شىققاننان كەيىن دە اتتان تۇسپەدى. استانانىڭ ىرگەتاسىن بەكىتۋگە ءوزىنىڭ از دا بولسىن ۇلەسىن قوسۋعا تىرىستى. اسىرەسە جاس بۋىن بولاشاق سپورتشىلاردى تاربيەلەۋگە ات سالىستى. ەل سپورتىنا ەڭبەگى سىڭگەن تالاي داڭقتى سپورتشىلاردى تاربيەلەپ شىعارعان قاجىمۇقان مۇڭايتپاسوۆ اتىنداعى سپورتتاعى دارىندى بالالارعا ارنالعان رەسپۋبليكالىق مەكتەپ-ينتەرناتىندا ديرەكتوردىڭ تاربيە ءىسى جونىندەگى ورىنباسارى قىزمەتىن اتقاردى.
ەلدىڭ تۇكپىر-تۇكپىرىنەن جينالعان قىزۋقاندى سپورتشى بالالارعا اقىلىن ايتىپ, اكەسىندەي تاربيەسىن بەردى. تاربيە ءىسىن قولعا الىپ, اقىل-پاراساتىمەن, ادالدىعىمەن, ۇستازدىق ونەگەسىمەن رەسپۋبليكالىق مەكتەپ-ينتەرناتتىڭ سىيلى ازاماتتارىنىڭ بىرىنە اينالدى. كليمەن بالابەك ۇلىنان ءتالىم العان جۇزدەگەن سپورتشى بالا وليمپيادا ويىندارىنا, الەم جانە ازيا چەمپيوناتتارىنا قاتىسىپ, ەل نامىسىن قورعاپ, جاڭا استانامىزدىڭ اتىن قازىرگى ۋاقىتقا دەيىن الەمگە تانىتىپ ءجۇر. ۇستازدارىنىڭ ايتقان اقىل-كەڭەسى مەن بەرگەن تاربيەسى ولاردىڭ ءومىر جولىنا پايداسىن تيگىزگەنى انىق. ويتكەنى ادام قانداي دارىندى بولماسىن, بۇل ومىردە كوپ دۇنيە العان تاربيەگە بايلانىستى.
ومىرلىك سەرىگى ساۋلە يساقىزى دا جولداسىمەن بىرگە ءبىر مەكتەپتە قىرىق جىل ۇستازدىق ەتتى. ەلگە ۇلگى بولعان ەرلى-زايىپتىلار ءتورت بالا تاربيەلەپ ءوسىردى. بالالارى دا اتا-اناسىنىڭ جولىن قۋىپ, ومىردە ءوز جولدارىن تابا ءبىلدى. ءتورت بالادان 11 نەمەرە, 6 شوبەرە ءسۇيىپ بايتەرەكتەي ۇلكەن اۋلەتكە اينالدى.
«ەلدىڭ دامۋى ونىڭ ءبىلىم بەرۋ جۇيەسى ارقىلى باعالاناتىن بولادى» دەگەن ەلباسىنىڭ دانا ءسوزى بار. سەبەبى ءار مەملەكەتتىڭ ەڭ باستى بايلىعى ادام بولسا, سول ادامدى مامان قىلىپ شىعاراتىن, شىنىقتىراتىن مەكتەپ. سول سەبەپتى دە كليمەن بالابەك ۇلىنىڭ قازاقستاننىڭ بولاشاعى ءۇشىن ايانباي ەڭبەك ەتىپ, ەل ءۇمىتىن اقتايتىن بىلىكتى, ءبىلىمدى جاس مامان دايىنداۋ جولىندا سىڭىرگەن ەڭبەگى ءۇشىن العىسىمىز شەكسىز. وسىنداي جاندار ەلىمىزدىڭ بولاشاعىنا جارقىن جول سالىپ, كەلەسى ۇرپاققا ونەگە بولاتىنىنا كامىل سەنەمىن.
كليمەن بالابەك ۇلىنىڭ بەينەسى تاعىلىمىن كورگەن شاكىرتتەرىنىڭ, كىسىلىگىن كورگەن ارىپتەستەرىنىڭ, كومەگىن كورگەن اعايىن-تۋىسقانى مەن دوس-جارانىنىڭ ماڭگى جادىندا بولماق.
جەكسەنباي دۇيسەباەۆ,
پارلامەنت ءماجىلىسىنىڭ دەپۋتاتى
