اققايىڭ اۋدانىندا جالعاسقان جۇمىس ساپارىندا حالىق قالاۋلىلارى رۋبلەۆكا اۋىلىندا «يۆان زەنچەنكو» جشس-ءنىڭ قاراجاتىنا سالىنىپ جاتقان مال شارۋاشىلىعى كەشەنىنىڭ قۇرىلىسىندا بولدى. 600 باس سيىرعا ارنالعان ءسۇت فەرماسى كۇزگە سالىم پايدالانۋعا بەرىلمەك. ءسۇتتى باعىتتاعى 596 مال اكەلىنىپتى.
«دايىندىق اگرو» سەرىكتەستىگى تۇرعىنداردىڭ سۇرانىسى بويىنشا جانسۇگىر باتىردىڭ كەسەنەسىن سالۋعا قىزۋ كىرىسكەن. قۇرىلىسقا قاجەتتى ماتەريالدار اقتاۋ جاعىنان جەتكىزىلىپتى. شارۋاشىلىق باسشىسى ءبىرجان شايمەردەنوۆ دەپۋتاتتاردى 800 مالعا ارنالعان كەشەن جوباسىمەن تانىستىردى. ەلدى مەكەندە مادەنيەت ءۇيى, فەلدشەردىك-امبۋلاتوريالىق پۋنكت, بالاباقشا, تاعى باسقا الەۋمەتتىك نىساندار جۇمىس ىستەپ تۇر. مەكتەپتىڭ كۇردەلى جوندەۋىنە 58 ميلليون تەڭگە باعىتتالىپ, جاڭا سپورت زالى ىسكە قوسىلماق.
تۇرعىندارمەن كەزدەسۋدە ەرىك سۇلتانوۆ سولتۇستىك وڭىرلەردى تابيعي گازبەن قامتۋ جۇمىس باستالىپ كەتكەنىن, 3-4 جىلدا قىزىلجار ءوڭىرى دە جەتكىزىلەتىنىن حابارلادى.
تايىنشا اۋدانىندا وتكەن جۇزدەسۋلەردە سەناتورلارعا بىرقاتار الەۋمەتتىك نىساندار تانىستىرىلدى. ۆيشنەۆكا مەكتەبىنىڭ پايدالانۋعا بەرىلگەنىنە 60 جىلدان اسىپتى. 80 ورىندى ءبىلىم وشاعىندا 120 بالا وقيدى. ونىڭ اپاتتى جاعدايدا تۇرعانىن كورگەن دەپۋتاتتار پارلامەنتتىڭ ىقپال ەتۋىمەن بولىنگەن 40 ميلليارد تەڭگە مەكتەپتەر مەن اۋرۋحانار سالۋعا باعىتتالاتىنىن, كەلەسى جىلى وسى اۋىلدا 150 ورىندى ەڭسەلى عيمارات بوي تۇزەيتىنىن ايتتى.
«پارلامەنتتە 84 زاڭ قابىلداندى. ولاردىڭ ىشىندە كاسىپكەرلىك, كەدەن, سالىق كودەكستەرى سەكىلدى ماڭىزدى قۇجاتتار بار. 2018-2020 جىلدارعا ارنالعان رەسپۋبليكالىق بيۋدجەتتى بەكىتۋ بارىسىندا وبلىس جولدارىن قالپىنا كەلتىرۋ ءۇشىن قوسىمشا 5 ميلليارد تەڭگە الۋعا قول جەتكىزىلدى. بۇل قاراجات جەرگىلىكتى جولداردى جوندەۋگە جۇمسالاتىن بولادى», دەدى حالىق قالاۋلىلارى.
«تايىنشا-استىق» جشس-ءى ءىرى اگروقۇرىلىمداردىڭ ءبىرى سانالادى. قازاقستان نارىعىندا 2005 جىلدان بەرى جۇمىس ىستەپ كەلەدى. 800 ادام جۇمىسپەن قامتىلعان. ەگىنشىلىكپەن دە, مال وسىرۋمەن دە اينالىسادى. سەرىكتەستىكتىڭ باس ديرەكتورى اناتولي رافالسكي كانادادان ورالعانىن ايتا كەلىپ, العان اسەرلەرىمەن, ءىس-تاجىريبەلەرمەن ءبولىستى. اگروقۇرىلىمدا سۇيىق مينەرال تىڭايتقىشتار وندىرەتىن زاۋىت ىسكە قوسىلىپتى. ەندى وسىمدىكتەر مەن قوعامدىق مالداردىڭ يممۋنيتەتىن جاقسارتاتىن پايدالى ميكروورگانيزمدەر شىعاراتىن كاسىپورىن سالۋ جوسپارلانىپ وتىر.
سەناتورلار مۇنداي وزىق جوبالار مەن جاڭاشىلدىقتاردى قولداپ, اتقىرىلعان جۇمىستارعا جوعارى باعا بەردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
