اعىمداعى جىلدان باستاپ ەلىمىزدە «نۇر وتان» پارتياسىنىڭ باستاماسىمەن قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى مەن «مەملەكەتتىك الەۋمەتتىك ساقتاندىرۋ قورى» اكتسيونەرلىك قوعامىمەن بىرلەسە «قازاقستاننىڭ ۇزدىك الەۋمەتتىك جوبالارى» بايقاۋى قولعا الىنعان بولاتىن. اتالعان بايقاۋ ءساۋىر ايىندا جاريالانىپ, جوبانىڭ ىرىكتەۋ كەزەڭى ايماقتاردا باستاۋ العان ەدى. تاراز قالاسىندا وسى ءىسشارانىڭ ايماقتىق كەزەڭىنىڭ ىرىكتەۋ سالتاناتى بولىپ ءوتتى.
سالتاناتتى شاراعا «نۇر وتان» پارتياسى جامبىل وبلىستىق جانە تاراز قالالىق فيليالدارىنىڭ باسشىلىعى مەن قىزمەتكەرلەرى, مەملەكەتتىك ورگانداردىڭ وكىلدەرى, ۇكىمەتتىك ەمەس ۇيىمدار وكىلدەرى مەن جوبا اۆتورلارى, باستاۋىش پارتيا ۇيىمدارىنىڭ توراعالارى, مۇمكىندىگى شەكتەۋلى ازاماتتار مەن «جاس وتان» جاستار قاناتىنىڭ مۇشەلەرى مەن بەلسەندىلەرى قاتىستى. جيىندا «نۇر وتان» پارتياسى جامبىل وبلىستىق فيليالى توراعاسىنىڭ ءبىرىنشى ورىنباسارى, كوميسسيا توراعاسى مۇراتحان شۇكەەۆ ءسوز الىپ, ومىرلىك قيىن جاعدايعا تاپ بولعان تۇلعالارعا كورسەتىلەتىن قىزمەتتەردى قوسا العاندا, وزەكتى الەۋمەتتىك ماسەلەلەردى شەشۋگە باعىتتالعان باستاماشىل الەۋمەتتىك جوبالاردى قولداۋ بايقاۋدىڭ باستى ماقساتى ەكەنىن, اتالعان بايقاۋ ارقىلى ەلىمىزدە ىسكە اسىرىلاتىن ۇزدىك باستاماشىل الەۋمەتتىك جوبالاردى انىقتاپ, ۇسىنىلعان الەۋمەتتىك جوبالاردا قولدانىلعان ۇزدىك تاجىريبەلەردى كەڭىنەن تاراتىپ, وزەكتى الەۋمەتتىك ماسەلەلەردى شەشۋدە مەملەكەتتىڭ, ازاماتتىق قوعامنىڭ, بيزنەستىڭ جانە ازاماتتاردىڭ كۇشىن بىرىكتىرۋ ماقسات ەكەنىن اتاپ ءوتتى. سونداي-اق اتالعان بايقاۋدىڭ وڭىرلىك كەزەڭىنىڭ وتۋىنە دەمەۋشىلىك جاساعان «قازفوسفات» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى, قازاقستاننىڭ ەڭبەك ەرى مۇقاش ەسكەندىروۆكە العىس ءبىلدىردى. ءوز سوزىندە جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ وڭىردە بۇگىندە 43 مىڭ مۇمكىندىگى شەكتەۋلى ازاماتتىڭ بار ەكەنىن, ولارعا لايىقتى قولداۋ كورسەتىلىپ كەلە جاتقانىن, بۇل ماقساتقا وتكەن جىلى 45 ميلليون تەڭگە قاراستىرىلسا, بيىل 29 جوباعا وبلىستىق بيۋدجەتتەن 271 ميلليون تەڭگە ءبولىنىپ وتىرعانىن جەتكىزدى. بۇدان كەيىن «قازاقستاننىڭ ۇزدىك جوباسى-2014» بايقاۋىنىڭ جەڭىمپازى, «امازونكا» قايىرىمدىلىق قورىنىڭ جەتەكشىسى انجەليكا ساريان ءسوز الىپ, قولداۋى ءۇشىن ءتيىستى ازاماتتارعا العىس ايتتى.
بايقاۋدىڭ ەرەجەسى بويىنشا جوبا اۆتورلارى «الەۋمەتتىك پروبلەمالاردى شەشۋدەگى اقپاراتتىق ىلگەرىلەتۋ», «الەۋمەتتىك سالادا ەرىكتىلەر قوزعالىسىن دامىتۋ», «تەڭ مۇمكىندىكتەرمەن قامتاماسىز ەتۋ», «مۇگەدەكتىگى بار تۇلعالاردى قوسا العاندا, ازاماتتاردى جۇمىسپەن قامتۋعا ىقپال جاساۋ» جانە وزگە دە باعىتتار بويىنشا تاراز قالاسى مەن اۋدانداردان ءوز جوبالارىن ۇسىنىپ, وبلىستىق كەزەڭگە جولداما العان بولاتىن. اتاپ ايتار بولساق, تاراز قالاسىنان 4, شۋ اۋدانىنان 3, قورداي جانە مەركى اۋداندارىنان 2 جوبادان, بايزاق, جامبىل, ت.رىسقۇلوۆ, تالاس جانە سارىسۋ اۋداندارىنان 1 جوبادان بارلىعى 16 جوبا ۇسىنىلعان. بايقاۋ قورىتىندىسى بويىنشا ءبىرىنشى ورىندى «تاراز قالالىق مۇگەدەكتەر قوعامى» قوعامدىق بىرلەستىگىنىڭ ءتورايىمى اقبوپە قالەنوۆا جەڭىپ الدى. اتالعان بىرلەستىكتىڭ «جۇرەكتەن – جۇرەككە» جوباسى بويىنشا دايىنداعان بەينەروليگى كوپشىلىككە كورسەتىلدى. بۇدان سوڭ كوپشىلىك «اينالايىن» بالالار مەن جاسوسپىرىمدەر ورتالىعى» جاستار كلۋبى» قوعامدىق بىرلەستىگى» يۋنەسكو-كلۋبىنىڭ «ەتنو ارت فەست» جوباسى بويىنشا دايىنداعان بەينەروليكتى تاماشالادى. ناتيجەسىندە اتالعان كلۋب ءتورايىمى ايگۇل رازاقوۆا ەكىنشى ورىنمەن ماراپاتتالدى. «قازاقستاننىڭ ۇزدىك جوبالارى» رەسپۋبليكالىق بايقاۋىنىڭ وبلىستىق كەزەڭىنە بەلسەندى قاتىسقانى ءۇشىن ءۇشىنشى ورىندى جامبىل وبلىستىق «ونكولوگتار اسسوتسياتسياسى» قوعامدىق بىرلەستىگىنىڭ توراعاسى ابىلايحان باتىروۆ يەلەندى. كوپشىلىك نازارىنا اتالعان بىرلەستىكتىڭ «ۋاقتىلى دياگنوستيكا – دەنساۋلىق كەپىلى» جوباسى بويىنشا دايىنداعان بەينەروليگى ۇسىنىلدى. بايقاۋ جەڭىمپازدارى مەن جۇلدەگەرلەرىنە قارجىلاي سىيلىقتار مەن ارنايى ديپلومدار تابىس ەتىلدى.
بۇدان كەيىن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ پەن وبلىستىق ىشكى ساياسات باسقارماسىنىڭ باسشىسى بەرىك قۇرمانعالي «قازاقستاننىڭ ۇزدىك الەۋمەتتىك جوبالارى» رەسپۋبليكالىق بايقاۋىنىڭ وبلىستىق كەزەڭىنە بەلسەنە قاتىسقانى ءۇشىن تاراز قالاسىنان «جاندانۋ» مۇگەدەكتەر قوعامدىق بىرلەستىگىنىڭ توراعاسى زايتجان يۋلداشەۆ, مەركى اۋدانىنان «پارىز-مەركى» جاستار قوعامدىق بىرلەستىگىنىڭ ءتورايىمى عاليا قاجىعاليەۆا, شۋ اۋدانىنان «مار-نۇر كومپانياسى» جاۋاپكەرشىلىگى شەكتەۋلى سەرىكتەستىگىنىڭ قۇرىلتايشىسى عاليا ابىتاەۆا, قورداي اۋدانىنان «پارىز» مۇگەدەكتەرگە قولداۋ كورسەتۋ» قوعامدىق بىرلەسىگىنىڭ ءتورايىمى بايان قارامولداەۆا جانە ت.رىسقۇلوۆ, تالاس, بايزاق اۋداندارىنان وزگە دە قوعامدىق بىرلەستىكتەر توراعالارىن ماراپاتتاپ, ولارعا ارنايى ديپلومدار مەن باعالى سىيلىقتار تابىس ەتتى. بايقاۋ بارىسىندا گۇلدەرايىم نۇرمولداەۆا, نۇربول دۇيسەنقۇل, اقتورە اسقار, نۇراي عانيقىزى سياقتى ونەرپازدار اننەن شاشۋ شاشتى. ال ىرىكتەۋ كەزەڭىندە ۇزدىك دەپ تانىلعان جەڭىمپاز جوبالار كوميسسيا شەشىمىمەن الداعى قىركۇيەك ايىندا استانا قالاسىندا وتەتىن بايقاۋدىڭ رەسپۋبليكالىق كەزەڭىنە جولداندى.
حاميت ەسامان,
«ەگەمەن قازاقستان»
جامبىل وبلىسى
