بۇگىندە قىزىلوردا قالاسىندا ەلەكتر جانە اۋىزسۋمەن جابدىقتاۋشى كوممۋنالدىق كاسىپورىندارىندا «سمارت سيتي» ۇلگىسىندە جۇمىس ىستەۋ, ەنەرگوۇنەمدەگىش قوندىرعىلار, قاشىقتىقتان باسقارىلاتىن ەسەپتەۋىش قۇرالدارىن ورناتۋ, ءبىر ورتالىقتان باسقارۋ جۇيەسىن ەنگىزۋ جۇمىستارى قولعا الىندى.
ەلباسىنىڭ حالىقارالىق قارجى ۇيىمدارىنىڭ الەۋەتىن پايدالانۋ جونىندەگى تاپسىرماسىنا سايكەس, ەۋروپالىق قايتا قۇرۋ جانە دامۋ بانكىمەن بىرلەسىپ قىزىلوردا قالاسىنىڭ سۋمەن قامتۋ جانە سۋدى بۇرۋ جۇيەسىن قايتا جاڭعىرتۋ جوباسى ىسكە اسىرىلۋدا. جوبا بارىسىندا وبلىس ورتالىعىنىڭ اۋىزسۋمەن جابدىقتاۋ جانە سۋدى بۇرۋ جۇيەسىن باسقارۋ, جەراستى اقاۋلارىن انىقتايتىن زاماناۋي تەحنيكالار ساتىپ الىندى.
تۇتىنۋشىلار تاراپىنان كوممۋنالدىق تولەمدەردى وڭتايلاندىرۋ ماقساتىندا وتكەن جىلدان باستاپ بىرىڭعاي تولەم قۇجاتى ەنگىزىلدى. بۇگىندە قىزىلوردا قالاسى تۇتىنۋشىلارىنىڭ 80 پروتسەنتتەن استامى وسى قىزمەت ءتۇرىن پايدالانۋدا.
2017 جىلدىڭ 1 شىلدەسىنەن باستاپ قاناتقاقتى جوبا رەتىندە «اقمەشىت», «مەرەي» شاعىن اۋداندارىندا بىرىڭعاي تولەم قۇجاتىن ەنگىزۋ جوباسى باستالدى. بۇگىندە اتالعان جوباعا قاتىستى بارلىق كوممۋنالدىق قىزمەت كورسەتەتىن مەكەمەلەر اراسىندا بىرقاتار جۇمىس جۇرگىزىلدى.
قازىرگى تاڭدا اۆتوماتتى تۇردە تەلەفون جانە حابارلاما ارقىلى ەسكەرتۋ فۋنكتسياسى ازىرلەنۋدە. وتكەن جىلدىڭ قىركۇيەك ايىندا وتكەن مەملەكەتتىك كونكۋرستىڭ ناتيجەسىندە «قىزىلوردا تازالىعى» جشس, «تۇرعىن ءۇي قىزمەتى» مكك جانە «ەنەرگوسەرۆيس» جشس مەن بيللينگ باعدارلاماسىن ازىرلەۋ, بىرىڭعاي تولەم جۇيەسىنە ەنگىزۋ, تولەمدەردى قابىلداۋ بويىنشا كەلىسىمشارتتار جاسالىپ, بۇگىنگى تاڭدا «قىزىلوردا تازالىعى» جشس-ءنىڭ 15 مىڭ, «تۇرعىن ءۇي قىزمەتى» مكك-ءنىڭ 16 مىڭ تۇتىنۋشىسى بيللينگ باعدارلاماسىنا ەنگىزىلدى.
قاڭتار ايىندا ەلەكتر, جىلۋ ەنەرگياسى, «قىزىلوردا تازالىعى» جشس جانە «تۇرعىن ءۇي قىزمەتى» مكك, ءىشىنارا سۋ مەن سۋ بۇرۋ كوممۋنالدىق قىزمەتتەرى قالىپتاستىرىلعان 79 مىڭ بىرىڭعاي تولەم قۇجاتى تاراتىلدى.
«قاۋىپسىز ءۇي» جوباسى بويىنشا «قازاقتەلەكوم» اق فيليالىمەن كوپقاباتتى ۇيلەردىڭ كىرەبەرىسىنە بەينەباقىلاۋ جۇيەسىن ورناتۋ جوباسى جۇزەگە اسىرىلۋدا. جوبا اياسىندا اعىمداعى جىلى كوپقاباتتى ۇيلەردىڭ 588 كىرەبەرىسىنە جانە ءبىرىنشى قاباتتارىنا بەينەباقىلاۋ كامەرالارى ورناتىلدى. جوبا قىزىلوردا قالاسىنداعى كوپقاباتتى تۇرعىن ۇيلەردىڭ جانە تۇرعىنداردىڭ قاۋىپسىزدىگىن قامتاماسىز ەتۋگە مۇمكىندىك بەرەدى.
«اقىلدى» ەلەكتر جەلىلەرى بويىنشا 2018-2019 جىلدارى قىزىلوردا قالاسىندا جانە قالا اۋماعىندا ورنالاسقان 300-دەن اسا كوپقاباتتى ءۇيدىڭ 10/0,4 كۆ قوسالقى ستانسالارىنىڭ سورەلەرىندە ورنالاسقان 600 ەلەكتر ەنەرگياسى ەسەپتەگىش قۇرالىن ەلەكتر ەنەرگياسىن باقىلاۋدىڭ اۆتوماتتىق جۇيەسىنە ەنگىزۋ جوسپارلانۋدا.
اتالعان جۇمىستاردى جۇرگىزۋ كوپقاباتتى جانە جەكە تۇرعىن ءۇي سەكتورلارىنداعى ەلەكتر ەنەرگياسىنىڭ ۇرلىعىن تومەندەتۋگە جانە جەلى پارامەترلەرىن باقىلاۋ ارقىلى 10/0,4 كۆ قوسالقى ستانسالارىنداعى اقاۋدى جەدەل انىقتاۋعا جانە قالپىنا كەلتىرۋگە مۇمكىندىك بەرەدى.
قالا ينفراقۇرىلىمىنىڭ دامۋى جانە جاڭا سۋ قۇبىرلارى جەلىلەرى قۇرىلىستارىنىڭ جۇرگىزىلۋىنە بايلانىستى تۇرعىنداردىڭ سانى ارتىپ, تيىسىنشە سۋ تۇتىنۋ كولەمىنىڭ ارتۋى سالدارىنان ىسىراپقا جول بەرىلۋدە. وسى ورايدا سۋمەن قامتۋدى جانە سۋ بۇرۋدى باقىلاۋ جۇيەسى جوباسى اياسىندا سۋمەن قامتۋ جۇيەلەرىن جاڭعىرتۋ جانە جاقسارتۋ ماقساتىندا قىزىلوردا قالاسىنىڭ بيۋدجەتتىك مەكەمەلەرىندە مودەممەن جاساقتالعان سۋ ەسەپتەگىش قۇرالدارىن ورناتۋ جوسپارلانۋدا.
جوعارىدا اتالعان جۇمىستاردى جۇرگىزۋ ناتيجەسىندە سۋمەن قامتۋ جۇيەسىنىڭ پايدالانۋ سەنىمدىلىگى ارتادى, سۋمەن قامتۋ جۇمىسى ۇزدىكسىز بولادى. ەسەپتەگىش قۇرالداردى ورناتۋ ەسەبىنەن سۋمەن قامتۋ جۇيەسىنىڭ جانە تەحنولوگيالىق ۇردىستەرىنىڭ ماڭىزدىلىعى ارتادى. بۇل باعىتتاعى جۇمىستار بۇدان ءارى جالعاسىن تابۋدا.
مەدەت ۋساين,
قىزىلوردا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى
قىزىلوردا وبلىسى
