كۇيدىرىلگەن بالشىقتان كىرپىش, باسقا دا ساپالى قۇرىلىس ماتەريالدارىن وندىرەتىن «بوشان» جاۋاپكەرشىلىگى شەكتەۋلى سەرىكتەستىگى 2008 جىلدان بەرى جۇمىس ىستەپ كەلگەن بولاتىن. مەملەكەت باسشىسىنىڭ قازاقستان حالقىنا ارناعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن ىسكە اسىرۋ جانە باسەكەگە قابىلەتتى كاسىپورىن قۇرۋ ماقساتىندا «Astana Ceramics» جاۋاپكەرشىلىگى شەكتەۋلى سەرىكتەستىگى ءوندىرىس ورنىن مودەرنيزاتسيالاۋدى, ءسويتىپ زايمدىق قاراجات پەن مەملەكەتتىڭ قولداۋىنا ارقا سۇيەپ, جاڭا تەحنولوگيا بويىنشا ءونىم شىعارۋدى قاراستىرا باستادى. «بيزنەستىڭ جول كارتاسى-2020» باعدارلاماسى بويىنشا العان 2,5 ميلليارد تەڭگەنىڭ سۋبسيدياسى زاۋىت جۇمىسىنا جاڭاشا سەرپىن بەردى. جوبانى ىسكە اسىرۋعا ءۇش جىل ۋاقىت جۇمسالعان.
وندىرىستە يسپانيانىڭ وسى زامانعى وزىق تەحنولوگياسى قولدانىلۋدا. جوبانىڭ جالپى قۇنى 3,8 ميلليارد تەڭگە. جىلىنا 3 ميلليون دانا كىرپىش شىعارۋعا مۇمكىندىكتەرى بار. زاۋىتتا بۇگىندە 50 ادام جۇمىسقا ورنالاسىپ, ەڭبەك ەتۋدە. اي سايىن تۇراقتى جالاقى بەرىپ, جەرگىلىكتى حالىقتى جۇمىسپەن قامتاماسىز ەتىپ وتىرعان جاڭا جوبانىڭ اۋدانداعى تۇرعىن ءۇي قۇرىلىسىن ورىستەتۋگە سەپتىگى مول بولماق.
بايقال ءبايادىل,
«ەگەمەن قازاقستان»
اقمولا وبلىسى
تسەلينوگراد اۋدانى
