دۇيسەنبى كۇنى «بومبا», «باحروما» مەن «ميشكا نا پوليۋسە» سەكىلدى قازاقستاندا شىعارىلاتىن بالمۇزداقتاردىڭ 10 تونناسى الماتىدان شانحايعا جونەلتىلدى». ەندىگى جەردە شانحايدا جوعارىداعى برەندتەردىڭ يەسى, ياعني «شين-لاين» كومپانياسىنىڭ ءوز قويماسى بار. بۇدان بىلاي قىتايداعى ورتالىق حابتان قازاقستاندىق بالمۇزداقتار ەلدىڭ سولتۇستىك ايماعىنا, شىعىس جانە وڭتۇستىك-شىعىس وڭىرىنە جەتكىزىلەدى.
اتالمىش كومپانيا بيىل قىتاي نارىعىنا 200 توننا بالمۇزداق اپارۋدى جوسپارلاپ وتىر. «شين-لاين» بالمۇزداقتارىن قىتايلىقتار اسىعا كۇتۋدە. ويتكەنى 2017 جىلى بۇل كومپانيا ءۇش بىردەي مامانداندىرىلعان كورمەگە قاتىسىپ 100 ديستريبيۋتورمەن كەلىسىمگە كەلگەن.
«بۇل دەگەنىڭىز – جىل وقيعاسى. ءبىز قىتايعا بالمۇزداق وندىرەتىن العاشقى قازاقستاندىق كومپانيامىز. كورشىلەس مەملەكەتتىڭ نارىعىنا شىعۋ – ۇلكەن ەڭبەكتىڭ ناتيجەسى. ەلىمىزدىڭ اۋىل شارۋاشىلىعى مينيسترلىگى مەن «اتامەكەن» ۇلتتىق كاسىپكەرلەر پالاتاسى قازاقستاندىق ءونىمنىڭ قىتاي نارىعىنا شىعۋىنا سەپتەسىپ, بالمۇزداقتى ەكسپورتتاۋداعى ءبىراز شەكتەۋلەردى الىپ تاستاۋعا كومەگىن تيگىزدى. بۇگىننەن باستاپ ءبىز قىتايعا ەكسپورتتى باستاپ, ءوز ونىمدەرىمىزدىڭ كورشى ەلدەگى ۇلەسىن 3 پايىزعا ارتتىردىق» – دەدى «شين-لاين» كومپانيالار توبىنىڭ پرەزيدەنتى اندرەي شين.
ەكسپورتتىڭ ءوسۋ كەلەشەگى سۇرانىسپەن تىكەلەي بايلانىستى. جالپى الەمدە وندىرىلەتىن بارلىق بالمۇزداقتىڭ ۇشتەن ءبىرىن قىتايلىقتار جەيدى. 2014 جىلى قىتايدىڭ بالمۇزداق نارىعى اقش-تى باسىپ وزعان.
اندرەي ءشيننىڭ ايتۋىنشا, رەسەي مەن قىتايدىڭ ەكسپورت نارىعىندا ۇسىنىس وتە كوپ. سوندىقتان وتاندىق كومپانياعا نارىق سۇرانىسىنا ساي كەلەتىن ءونىم ۇسىنۋ ماڭىزدى.
ناتيجەسىندە اتالمىش كومپانيا ابدەن زەرتتەۋ جۇرگىزىپ, ءونىمنىڭ جاڭا قۇرامىن جاساپ, تەحنولوگيالىق ورىندالۋىن وزگەرتىپ, بالمۇزداقتاردىڭ قاپتاماسىنا دەيىن جاڭارتقان. ۇجىم جوعارى ساپالى ءونىم دايىنداۋعا 1,5 جىل ۋاقىت جۇمساپ, جالپى سوماسى 5 ميلليون ەۋرو قاراجات قۇيعان.
«شين-لاين» بالمۇزداقتارىنىڭ قىتايعا ەكسپورتتالۋىندا وزگە دە ماڭىزدى تۇستار بار. ەلباسى بەكىتكەن مەملەكەتتىك باعدارلامالاردا ەلگە ينۆەستيتسيا تارتۋ تۋرالى ءجيى ايتىلادى. بۇل ءوز كەزەگىندە قازاقستاندىق ءونىمنىڭ الەۋەتىن ارتتىرماق. وتاندىق بالمۇزداقتىڭ ساپاسىن كوتەرۋ ارقىلى ەكسپورتقا شىعۋ سياقتى قيىن ماسەلە شەشىلدى. بولاشاقتا ءوندىرىس كولەمى ارتا بەرەدى دەگەن سەنىم مول.
ايناش ەسالي,
«ەگەمەن قازاقستان»
الماتى
