جامبىل وبلىسى اكىمدىگىنىڭ بەلسەندى قولداۋىنىڭ ناتيجەسىندە اۋداندا «قۇلان اگروپاركى» اتتى ينتەنسيۆتى باۋ ەگىلىپ, ەل يگىلىگىنە پايدالانۋعا بەرىلدى. جالپى قۇنى 26 ميلليارد تەڭگەنى قۇرايتىن اتالعان جوبا اياسىندا بولاشاقتا ەكى مىڭعا جۋىق قۇلاندىقتار جۇمىسپەن قامتىلاتىن بولادى. وتكەن جىلدان باستاپ اۋدان ورتالىعى قۇلان اۋىلىندا مەردىگەر «ARNO AGRO» جاۋاپكەرشىلىگى شەكتەۋلى سەرىكتەستىگى 1000 گەكتار جەرگە جىلىنا 45 مىڭ توننا ءونىم بەرەتىن ۇدەمەلى جەمىس-جيدەك باۋىن وتىرعىزۋ جۇمىستارىن باستاپ, كۇز مەزگىلىندە 200 گەكتار جەرگە شيە اعاشىن وتىرعىزعان بولاتىن.
– «اگروپارك قۇلان» ينتەنسيۆتى باقشا الاڭىنا شيە كوشەتىن وتىرعىزۋدى وتكەن جىلدىڭ قازان ايىندا باستاعان بولاتىنبىز. ءدال قازىرگى ۋاقىتتا 100 گەكتار القاپقا پولشا مەملەكەتىنەن اكەلىنگەن «ليۋبسكايا» تۇقىمدى 166 مىڭ ءتۇپ شيە وتىرعىزىلدى. كوشەتكە بارلىعى 620 ميلليون تەڭگە جۇمسالدى. اۋداندا باۋ-باقشانى سالۋعا تولىقتاي جاعداي جاسالعان, – دەيدى «ARNO AGRO» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى ماقسات قۋانىش ۇلى.
بۇگىنگى تاڭدا «اگروپارك قۇلان» ينتەنسيۆتى باۋىندا 50-گە تارتا جۇمىسشى جۇمىس ىستەيدى. ال 2020 جىلعا دەيىن اۋداندا 600 گەكتار جەرگە الما, 200 گەكتار جەرگە جاڭعاق جانە 100 گەكتار جەرگە ءجۇزىم ەگۋ جوسپارلانىپ وتىر. اۋدان اكىمدىگىنىڭ مالىمەتىنشە, ەگەر جوبا تولىقتاي جۇزەگە اسقان جاعدايدا ەكى مىڭ ادام جۇمىسپەن قامتىلاتىن بولادى.
قازىرگى كەزدە ت.رىسقۇلوۆ اۋدانى مىڭداعان گەكتار جەرگە كوشەت وتىرعىزۋ جۇمىستارىن قارقىندى قولعا الۋدا. ماسەلەن تەرەڭوزەك اۋىلىنان 188 گەكتار جەرگە «KazAlma» جاۋاپكەرشىلىگى شەكتەۋلى سەرىكتەستىگى ينتەنسيۆتى الما باعىن وتىرعىزۋ جۇمىستارىن باستاپ كەتتى. كەلەشەكتە شاعىن اۋىل ايماعىندا الما ءوسىرىلىپ, ونىڭ جاقسىلىعىن حالىق كورەتىن بولادى.
– ساتىپ الىنعان شيە كوشەتتەرىنە بۇگىندە تامشىلاتىپ سۋارۋ ءادىسى قولدانىلۋدا. بۇل ماقساتقا نەسيەلىك قارجىلاندىرۋ ەسەبىنەن 386 ميلليون تەڭگە جۇمسالدى. پولشا تالىمباعىنان 139 مىڭ 944 دانا كوشەت جانە «SolDrip» برەندىنىڭ تامشىلاتىپ سۋارۋ قۇرالى الىندى. جوبانى جۇزەگە اسىرۋعا قۇلان اۋىلشارۋاشىلىعى كوللەدجى ءوز ۇلەستەرىن قوسىپ وتىر. اتالعان جوبا «قۇلان اگروپاركى» ينتەنسيۆتى باۋىنىڭ العاشقى نىسانى, – دەيدى ت.رىسقۇلوۆ اۋدانىنىڭ اكىمى اسقار قىرىقباەۆ.
سونىمەن قاتار اعىمداعى جىلى اۋداندا 40 گەكتار القاپقا ينتەنسيۆتى الما باعىن وتىرعىزۋ جوسپارلانىپ وتىر ەكەن. بۇگىنگى تاڭدا تارتىلعان ينۆەستيتسيا كولەمى 1,2 ميلليارد تەڭگەنى قۇراعان. بۇل دا جامبىل ءوڭىرىنىڭ ەكونوميكاسى ءۇشىن ماڭىزدى ستراتەگيالىق قادام, ايماقتا ورلەۋدىڭ جاڭا كەزەڭىنىڭ باستاۋى ءارى وتاندىق ءونىمدى وندىرۋگە دەگەن تىڭ قادام بولماق. سونداي-اق اگرارلىق اۋداننىڭ تۇرعىندارى ءۇشىن دە بۇل باستاما ناتيجەلى ەڭبەكتىڭ باستاۋى بولىپ وتىر. بولاشاقتا قۇلان جەرىنىڭ قالىڭ ورمانعا اينالعانىن كورەتىن كۇن الىس ەمەس...
حاميت ەسامان,
«ەگەمەن قازاقستان»
جامبىل وبلىسى
