قاتارىنان التىنشى جىل ەۋروكۋبوك باسەكەلەرىنە قاتىسىپ جاتقان ەلوردانىڭ «استانا» كومانداسى چەمپيوندار ليگاسىنىڭ ەكىنشى ىرىكتەۋ كەزەڭى اياسىندا ءوز الاڭىندا دانيانىڭ «ميدتيۋللاند» كومانداسىن قابىلداپ, 2:1 ەسەبىمەن باسىم ءتۇستى. كەزدەسۋ قازاقستاندىق مانەرلەپ سىرعاناۋشى, سوچي وليمپياداسىنىڭ جۇلدەگەرى دەنيس تەننىڭ مەزگىلسىز قايتىس بولۋىنا بايلانىستى 1 مينۋتتىق ەسكە الۋمەن باستالدى. جازعى ترانسفەر كەزەڭىندە قۇرامىن بىرنەشە فۋتبولشىلارمەن كۇشەيتكەن «استانا» بۇل ماتچقا تاس-ءتۇيىن دايىن ەدى. ءتىپتى ويىننىڭ العاشقى مينۋتىنان باستاپ الاڭعا ازەربايجاننىڭ «كاراباح» كومانداسىنان اۋىسىپ كەلگەن برازيليالىق فۋتبولشى پەدرو ەنريكەنى شىعاردى. بۇل پەدرونىڭ «استانا» ساپىنداعى العاشقى ويىنى بولعانىمەن, جانكۇيەرلەرگە جاقسى ويىن ورنەگىمەن كوزگە ءتۇستى.
«استانا ارەنا» ستاديونىندا وتكەن ەكى كوماندا اراسىنداعى العاشقى ويىن لاسلو كلياينحايسلەردىڭ بەنەفيسىنە اينالدى دەسەك ارتىق ايتقاندىق ەمەس. ويتكەنى بۇكىل ويىندى ۇيىمداستىرعان ءدال وسى لاسلو ەدى. بىلايشا ايتقاندا, جاسىل الاڭداعى بارلىق «قارا جۇمىستى» تاپ وسى ۆەنگريالىق جارتىلاي قورعاۋشى اتقاردى. ءسويتىپ ءجۇرىپ قارسىلاس قاقپاسىنا ەكى بىردەي تاماشا گول سوعىپ, كومانداسىنا ماڭىزدى جەڭىس سىيلادى. ءبىرىنشى تايمنىڭ 31 جانە 94-مينۋتىندا كلياينحايسلەردىڭ ەكى گولىنا قوناقتاردان گۋستاۆ ۆيكحەيم ويىننىڭ 51-مينۋتىندا ءبىر گولمەن جاۋاپ قاتتى. قورىتىندى ەسەپ – 2:1. بۇل ناتيجە سىرت الاڭداعى قارىمتا كەزدەسۋ الدىندا «استانا» ءۇشىن وتە قاۋىپتى ەسەپ. ويتكەنى قوناقتاردىڭ سىرت الاڭدا سوققان ءبىر گولى ەكى گول سوققانمەن پارا-پار. ەندى «استانا» قارىمتا ماتچتا قورعانىسقا ءمان بەرىپ, گول وتكىزبەۋدىڭ امالىن جاساۋ كەرەك. سونداي-اق تەڭ ەسەپ تە «استانا» ءۇشىن قاناعاتتانارلىق ناتيجە. ەكى كوماندا اراسىنداعى قارىمتا كەزدەسۋ 1 تامىز كۇنى دانيانىڭ حەرنينگ قالاسىندا وتەدى.
ەۋروپا ليگاسىندا باق سىناپ جاتقان الماتىنىڭ «قايرات» كومانداسى «ورتالىق» ستاديوندا «از» (الكماار) كومانداسىمەن كەزدەسىپ, نيدەرلاندى كلۋبى قازاقستاننان ەكىنشى رەت ەلدەرىنە جەڭىلىسپەن قايتتى. بۇلاي ايتۋىمىزدىڭ سەبەبى, «از» كومانداسى بۇعان دەيىن ءبىزدىڭ كلۋبتارمەن بىرنەشە رەت شەبەرلىك بايقاسقان. ناقتىراق ايتار بولساق, 2010 جىلعى ەۋروپا ليگاسىندا «اقتوبە» كومانداسىمەن ويناپ, 2:1 ەسەبىمەن جەڭىلىپ قالعان. سول ويىندا مۇرات تىلەشوۆ ەكى گول سوققان ەدى. اراعا 4 جىل سالىپ «از» فۋتبولشىلارى قاراعاندىنىڭ «شاحتەرىنە» تاپ كەلىپ, 1:1 ەسەبىمەن تەڭ تارقاسۋعا ءماجبۇر بولعان. بۇل كەزدەسۋدە اندرەي فينونچەنكو مەرگەندىگىمەن كوزگە تۇسكەن بولاتىن. ەندى, مىنە, قازاقستانعا كەلگەن ءۇشىنشى ساپارىندا دا جەڭىس بىلاي تۇرسىن, قاقپامىزعا گول سوعا الماي كەتتى.
كەزدەسۋدىڭ 12-مينۋتىندا جازعى ترانسفەردە «اقجايىقتان» «قايراتقا» اۋىسقان جارتىلاي قورعاۋشى ادەرينسولا ەسەولا مەرگەندىگىمەن كوزگە ءتۇسىپ, كومانداسىن ەسەپتە العا شىعاردى. ءبىرىنشى تايمدا ەسەپ وزگەرىسسىز قالدى. ماتچتىڭ ەكىنشى بولىگىن «قايرات» بەلسەندى باستادى. ويىننىڭ 50-مينۋتىندا ادەرينسولا ەسەولا ەسەپتى ەسەلەپ, ءوزىنىڭ ماتچتاعى ەكىنشى گولىن سالدى. ويىننىڭ قالعان بولىگىندە «قايرات» قورعانىسقا كوبىرەك كوڭىل ءبولىپ, ەسەپتى ۇستاپ تۇرۋعا تىرىستى. «از» كومانداسى ەسەپتى قىسقارتۋعا قانشا تىرىسقانىمەن, «قايرات» كومانداسىنا گول سوعۋ بۇيىرمادى. ەكى كوماندا اراسىنداعى قارىمتا كەزدەسۋ 2 تامىز كۇنى نيدەرلاندىدا وتەدى.
«قايرات» بۇگىنگە دەيىن ەۋروكۋبوك ويىندارىندا 29 ويىن وتكىزىپ, ءبىرشاما تاجىريبە جيناقتادى. 15 كەزدەسۋدە جەڭىسكە جەتسە, 5 ماتچتا تەڭ ءتۇسىپ, 9 ويىندا جەڭىلگەن. دەگەنمەن, 2002 جىلدان بەرى ەۋرودودا ويىندارىندا سىنعا تۇسكەنىمەن, ءالى بىردە-ءبىر رەت توپتىق كەزەڭگە شىعا الماي ءجۇر. بۇعان دەيىن الماتىنىڭ كومانداسى 2015-2016 جىلدارى ەۋروپا ليگاسىنىڭ پلەي-وفف كەزەڭىندە فرانتسيانىڭ «بوردو» كومانداسىنان جەڭىلىپ, توپتىق كەزەڭنەن قاعىلعان ەدى. ازىرشە بۇل «قايراتتىڭ» ەۋروكۋبوگتاعى ەڭ ۇزدىك ناتيجەسى. بيىل ولقىلىقتىڭ ورنىن تولتىرۋعا تولىق مۇمكىندىكتەرى بار.
ەۋروپا ليگاسى دا ويدا-جوقتا توپ ەتە قالعان قوستانايدىڭ «توبىل» كومانداسى دا ءتاپ-ءتاۋىر, جيناقى ويىن كورسەتىپ ءجۇر. نەگىزى بۇل سىندا ءاۋ باستا بىلتىر ەل چەمپيوناتىندا ءۇشىنشى ورىن العان شىمكەنتتىڭ «ورداباسى» كومانداسى قاتىسۋى كەرەك بولعان. الايدا قازاقستان فۋتبول فەدەراتسياسىنىڭ مالىمەتى بويىنشا, «ورداباسى» ۋەفا تۋرنيرلەرىنە قاتىسۋ ءۇشىن قارجىلىق فەير-پلەي ەرەجەسىن ساقتاماعان. ءسويتىپ جولداما «ورداباسىدان» كەيىنگى ورىندى يەلەنگەن «توبىل» كومانداسىنا بۇيىردى.
ۆلاديمير نيكيتەنكو دا جازعى ترانسفەر ماۋسىمىندا كومانداسىن ءبىرشاما كۇشەيتتى. «پيۋنيككە» قارسى وتكەن كەزدەسۋدە نيكيتەنكو ارگەنتينالىق لەگيونەر حۋان لەسكانو مەن رەسەيلىك مارات بىستروۆتى ءبىرىنشى مينۋتتان الاڭعا شىعاردى. ەكى ويىنشى دا وزدەرىنىڭ شەبەرلىكتەرىن كورسەتىپ, كومانداسىنىڭ جەڭىسىنە ماڭىزدى كومەكتەرىن تيگىزدى. سونىمەن قاتار «توبىل» ساپىندا «قايراتتان» اۋىسىپ كەلگەن تاجىريبەلى فۋتبولشىلار اسلان داراباەۆ پەن باۋىرجان تۇرىسبەك بار. ودان بولەك كوماندادا وڭتۇستىك افريكا رەسپۋبليكاسىنان كەلگەن فەرناندەر كاسساي, ليتۆالىق ارتۋراس جۋلپا سياقتى مىقتى لەگيونەرلەر بار.
قوستانايدا وتكەن العاشقى كەزدەسۋدە ءۇش گول سوعىلعانىمەن, كوماندالار العاشقى تايمدا ءبىر-ءبىرىنىڭ قاقپا كىلتىن تابا المادى. ال ەكىنشى تايمنىڭ 49-مينۋتىندا ماكسيم فەدين ەسەپتى اشسا, ماتچ اياقتالۋىنا 10 مينۋت قالعاندا كوماندا كاپيتانى ازات نۇرعاليەۆ ەسەپتى 2:0-گە جەتكىزدى. دەگەنمەن, «توبىل» كلۋبى ماتچ سوڭىنا دەيىن ەسەپتەگى باسىمدىقتى ساقتاپ قالا المادى. 90-مينۋتتا ارمەنيا قۇراماسىنىڭ شابۋىلشىسى رۋسلان كوريان ەسەپتى قىسقارتىپ, قارىمتا ويىن الدىندا كومانداسىنا ءۇمىت وتىن سىيلادى. ەندى ەكى ۇجىم 2 تامىز كۇنى ارمەنيادا كەزدەسەدى.
ءالي بيتورە,
«ەگەمەن قازاقستان»
