سەناتورلار جالپاقتال اۋىلىنداعى № 15 ءورت ءسوندىرۋ بولىمشەسىندە بولدى. ونىڭ عيماراتى بىلتىر كۇردەلى جوندەۋدەن وتكەن بولاتىن. دەپۋتاتتار بايقوڭىر كوشەسىندە سالىنىپ جاتقان 2 قاباتتى 12 پاتەرلىك تۇرعىن ءۇي قۇرىلىسىمەن دە تانىستى. ەلباسىمىزدىڭ «رۋحاني جاڭعىرۋ» باعدارلاماسى اياسىندا جۇزەگە اسقان جاڭا نىسانداردى ارالاپ, اۋىل ساياباعىنداعى «باتىرلار اللەياسى» مەن قىلقالام شەبەرى ساكەن عۇماروۆتىڭ ەسكەرتكىشىندە بولدى.
سەناتورلار ن.تورەعاليەۆ پەن ە.مۇقاەۆ جالپاقتال مادەنيەت ۇيىندە جۇرتشىلىق وكىلدەرىمەن, اۋىل اقساقالدارىمەن جانە مەكەمە باسشىلارىمەن كەزدەستى. كەزدەسۋدە حالىق قالاۋلىلارى پارلامەنتتىڭ زاڭ شىعارۋ قىزمەتى مەن سەسسيا بارىسىندا قابىلدانعان جاڭا زاڭدار تۋرالى جان-جاقتى ايتىپ بەردى. سونداي-اق قويىلعان ساۋالدارعا جاۋاپ بەرىپ, ۇسىنىستارعا دەن قويدى.
دەپۋتاتتار سول كۇنى جاڭاجول اۋىلىندا بولىپ, كۇردەلى جوندەۋدەن ءوتىپ جاتقان الەۋمەتتىك نىساندارمەن جانە جول قۇرىلىسىمەن تانىستى.
سەنات دەپۋتاتتارى اۋدان ورتالىعى – قازتالوۆ اۋىلىندا تاياۋدا پايدالانۋعا بەرىلگەن 100 ورىندىق ينتەرناتتا بولدى. دەپۋتاتتار سونداي-اق ينتەرنات قاسىندا سالىنىپ جاتقان ساز مەكتەبىنىڭ قۇرىلىس الاڭىندا بولىپ, «جولاۋشى - جول» مەكەمەسىنىڭ قىزمەتكەرلەرىمەن دە كەزدەستى.
سەنات دەپۋتاتتارى «نۇر وتان» پارتياسىنىڭ ءماجىلىس زالىندا اۋدان اكتيۆىمەن كەزدەسىپ, ساپاردى قورتىندىلادى.
