باعدارلامانىڭ وپەراتورلارى حولدينگتىڭ ەنشىلەس كومپانيالارى – «اگرارلىق نەسيە كورپوراتسياسى» اق جانە «اۋىل شارۋاشىلىعىن قارجىلاي قولداۋ قورى» اق. «اۋىل شارۋاشىلىعىن قارجىلاي قولداۋ قورى» اق باسقارما توراعاسى جاندار وماروۆ ەلباسىنىڭ بەس الەۋمەتتىك باستاماسىنىڭ ىشىندە شاعىن نەسيەلەۋ كولەمىن ۇلعايتۋ بويىنشا اتقارىلعان جۇمىستاردى اتاپ ءوتتى.
«وسى تاپسىرما اياسىندا اۋىلدىق مەكەندەرگە باراتىن شاعىن نەسيە كولەمى 30 ملرد-تان 44,7 ملرد تەڭگەگە ۇلعايعان. ونىڭ ىشىندە «اۋىل شارۋاشىلىعىن قارجىلاي قولداۋ قورى» 27,2 ملرد تەڭگەنى يگەرۋدى جوسپارلاپ وتىر. بۇرىنعى وسى باعدارلاما بويىنشا بەرىلگەن قاراجاتتى ەسكەرسەك, بيىلعا جالپى «ەڭبەك» باعدارلاماسى ارقىلى 30 ملرد تەڭگەدەن استام شاعىن قارجىلار بولىنەدى دەپ جوسپارلانعان. بۇگىنگى تاڭدا 10 ملرد تەڭگە يگەرىلدى. وعان 2835 نەسيە بەرىلدى. سونىڭ ارقاسىندا 3432 ادام جۇمىسپەن قامتىلدى. ونىڭ ىشىندە 78 پروتسەنتتى باستاپقى جوبالار قامتيدى. ايتا كەتەتىن تاعى ءبىر جايت, ءبىز بيىلدان باستاپ «سىباعا» باعدارلاماسىن قايتا ەنگىزىپ جاتىرمىز. بۇل باعدارلاما بويىنشا يمپورتتالعان اسىل تۇقىمدى ءىرى قارا جانە وتاندىق ۇساق ءمۇيىزدى مال, تەحنيكا مەن جابدىقتار ساتىپ الۋعا 40 ملن تەڭگە 15 جىلعا دەيىنگى مەرزىممەن جىلدىق ۇستەم اقىسى سۋبسيديامەن ەسەپتەگەندە 4 پروتسەنتكە دەيىن ءتۇسىرىلىپ بەرىلەتىن بولادى. قازىرگى ۋاقىتتا اتالعان باعدارلاماعا سۇرانىس جوعارى جانە جۇيەلى تۇردە ىسكە اسىرىلىپ جاتىر», دەدى ول.
«ەڭبەك» باعدارلاماسى شەڭبەرىندە جەڭىلدەتىلگەن شاعىن نەسيەلەر 5 جىلعا دەيىنگى مەرزىمگە بەرىلەدى, مال شارۋاشىلىعى سالاسىنداعى جوبالارعا جانە اۋىلشارۋاشىلىق كووپەراتيۆتەرىن قۇرۋ ءۇشىن – 7 جىلعا دەيىن, سىياقىنىڭ جىلدىق ءتيىمدى مولشەرلەمەسى – جىلىنا 6 پروتسەنتتەن اسپايدى. شارۋا قوجالىقتارى مەن فەرمەرلىك شارۋاشىلىقتار ءۇشىن اۋىلشارۋاشىلىق سالاسىنداعى جوبالارعا شاعىن نەسيەلەردىڭ كولەمى 19 ملن تەڭگەگە دەيىنگى سومانى قۇرايدى. اۋىل شارۋاشىلىعىنا جاتپايتىن بيزنەس تۇرلەرى ءۇشىن 6 ملن تەڭگەگە دەيىنگى نەسيە قاراجاتى بولىنەدى. نەسيەلەر مال, وسىمدىك شارۋاشىلىقتارىنا, سونداي-اق اۋىلدى جەرلەردەگى بيزنەستىڭ اۋىل شارۋاشىلىعىنان تىس تۇرلەرىنە بەرىلەتىن بولادى.
راۋان قايدار,
«ەگەمەن قازاقستان»
