ەگەر ءار ادام ءوزىنىڭ ساۋلىعىن جاس كەزىنەن كۇتپەسە, ونى قاداعالاماسا ەرتەڭ ورشىگەن دەرت كۇش بەرمەي كەتۋى ابدەن مۇمكىن. بۇل رەتتە استانا مەن الماتى قالاسىندا ستۋدەنتتەرگە ارنالعان ەمحانالار بولاشاق مامانداردىڭ دەنساۋلىعىنىڭ كۇزەتۋشىسى مىندەتىن ابىرويمەن اتقارىپ كەلەدى. 1999 جىلى ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ جانىنان اشىلعان ستۋدەنتتەر ەمحاناسى وڭىرلەر اراسىندا تۇڭعىش رەت قۇرىلدى. اتالعان ەمحانا 19 جىل بۇرىن ستۋدەنتتەرگە ساپالى امبۋلاتوريالىق-ەمحانالىق كومەك بەرۋ جانە ونىڭ قولجەتىمدىلىگىن كوتەرۋ ءۇشىن عىلىمي كەڭەستىڭ شەشىمى بويىنشا ۇيىمداستىرىلعان بولاتىن. سول ۋاقىتتان بەرى مۇندا اۋرۋ تۇرلەرىن ەرتە باستان انىقتاۋ مەن دياگنوستيكالاۋ جۇمىستارى جۇيەلى تۇردە جۇرگىزىلىپ كەلەدى. اۋىرىپ ەم ىزدەگەنشە, اۋىرمايتىن جولدى ىزدەگەننىڭ ارتىقشىلىعى الدەقايدا كوپ. وسى ورايدا وڭىرلىك ستۋدەنتتەر ەمحاناسىنداعى 32 جوعارى جانە ورتا ارناۋلى ءبىلىمى بار مەديتسينا قىزمەتكەرلەرى جۇرگىزگەن پروفيلاكتيكالىق ساۋىقتىرۋ شارالارىنىڭ شوقتىعى بارىنەن دە بيىك تۇرادى. ونىڭ اياسى جوعارى وقۋ ورنىنداعى 11 مىڭنان استام ستۋدەنتتى قامتيتىنىن ەسكەرسەك, مەرەيلى قىزمەتتىڭ مارتەبەسى ودان ءارى بيىكتەي تۇسەدى. ارنايى مەديتسينالىق مەكەمە ءتيىستى ماتەريالدىق بازامەن, زاماناۋي قوندىرعىلارمەن جانە بىلىكتى مەديتسينالىق كادرلارمەن قامتاماسىز ەتىلگەن. وڭىردە قۇرىلعان ستۋدەنتتەر ەمحاناسىنىڭ باستى قىزمەتى كليەنتتەرگە تەگىن مەديتسينالىق كومەكتىڭ كەپىلدى كولەمىن بەرۋگە باعىتتالعان.
مۇندا مەديتسينا مەكەمەسىنىڭ باستاۋىندا, ياعني اشىلۋى مەن قالىپتاسۋ كەزىندە بولعان بىلىكتى ماماندار توبى ءالى كۇنگە دەيىن ستۋدەنتتەرگە ساپالى مەديتسينالىق كومەكتەر كورسەتىپ كەلەدى. سولاردىڭ ءبىرى ق.جۇبانوۆ ۋنيۆەرستيتەتى ستۋدەنتتەر ەمحاناسىنىڭ مەڭگەرۋشىسى جۇماگۇل جۇماعازينا.
– بۇگىنگى دەنساۋلىق ساقتاۋ سالاسىنداعى باسىم باعىتتاردىڭ ءبىرى – ستۋدەنت جاستاردىڭ دەنساۋلىعىن ساقتاۋ مەن قاداعالاۋ بولىپ وتىر. بۇل ءىس بارىمىزگە كۇردەلى مىندەتتەر جۇكتەيدى. وعان كاسىبي بىلىكتىلىك پەن شەبەرلىككە قوسا ەرەكشە مەيىرىم ايالى الاقان قاجەت دەپ بىلەمىز. ۇجىمداعى بارلىق قىزمەتكەرلەرگە وسىنداي ۇيلەسىم بولۋىن ىلعي ايتىپ جۇرەمىن. ويتكەنى تۋعان توپىراعى مەن اتا-اناسىنان, ءارى تۋىپ وسكەن باۋىرلارىنان جىراقتا جۇرگەن جاس دەنساۋلىعىنان كىنارات تابىلا قالسا ەڭ الدىمەن بىزدەن جىلى ءسوز كۇتەدى. ءبىز وسى ۇدەدەن شىعا بىلۋگە ءتيىسپىز, دەيدى ول.
جوعارعى وقۋ ورنىنداعى ستۋدەنتتىك ءوزىن ءوزى باسقارۋ ۇيىمىنىڭ وكىلدەرى ستۋدەنتتىك ەمحانانىڭ قىزمەتىنە ءدان ريزا ەكەندىكتەرىن جەتكىزدى.
