ايتۋلى مەرەيتويعا وراي جامبىل وبلىسىندا استانا كۇندەرى ءوتتى. مەرەيتوي اياسىندا اۋليەاتا وڭىرىنە استانا قالاسىنان قالا اكىمىنىڭ ورىنباسارى ەرمەك امانشاەۆ باستاعان ارنايى دەلەگاتسيا كەلىپ, جامبىلدىقتارمەن جۇزدەستى. اۋەلى ەلوردالىق دەلەگاتسيا وڭىردەگى «كازۋپاكترەيد» جاۋاپكەرشىلىگى شەكتەۋلى سەرىكتەستىگىنىڭ جانە «قازفوسفات» جاۋاپكەرشىلىگى شەكتەۋلى سەرىكتەستىگىنىڭ «مينەرالدى تىڭايتقىشتار زاۋىتىندا» بولىپ, ولاردىڭ جۇمىس بارىسىمەن تانىستى. ءوندىرىس ورىندارىن ارالاعان استانالىقتار جامبىل ءوڭىرىنىڭ ەكونوميكالىق-الەۋمەتتىك دامۋىن وڭ باعالاپ, وزدەرىنىڭ پىكىرلەرىن ءبىلدىردى.
بۇدان كەيىن ەلوردالىق دەلەگاتسيا م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە وتكەن «ايماقارالىق ىنتىماقتاستىق بيزنەس – فورۋمىنا» قاتىستى. مۇندا ءاربىر دەلەگاتسيا مۇشەلەرى ءوز سالالارى بويىنشا تاجىريبە الماستى. جيىندى اشىپ, جۇرگىزىپ وتىرعان جامبىل وبلىسى اكىمىنىڭ ورىنباسارى ەرقانات مانجۋوۆ استانا – بارلىق ءوڭىردىڭ, سونىمەن قاتار ءاربىر قازاقستاندىقتىڭ ماقتانىشى ەكەنىن ايتىپ ءوتتى. سونداي-اق, ول اۋليەاتا وڭىرىندەگى ەلوردا كۇندەرى اياسىندا ۇيىمداستىرىلعان بۇل بيزنەس-كەزدەسۋ ءوزارا ىنتىماقتاستىقتى دامىتۋعا جانە تاجىريبە الماسۋعا تاپتىرماس مۇمكىندىك ەكەنىن جەتكىزدى.
ءوز سوزىندە استانا قالاسى اكىمىنىڭ ورىنباسارى ەرمەك امانشاەۆ تاريحى تەرەڭ تاراز جەرىنىڭ, الەۋەتى ارتقان اۋليەاتا ءوڭىرىنىڭ قوناقجايلىلىعىنا العىسىن ءبىلدىردى. سونىمەن قاتار, استانا قالاسىنىڭ الەم شاھارلارى اراسىنداعى ابىرويى مەن بەدەلىن قالىپتاستىرۋداعى ەلباسىنىڭ ەرەن ەڭبەگىن اتاپ ءوتىپ, باس قالانىڭ گۇلدەنۋى جولىندا جامبىل وبلىسىنىڭ دا ۇلەسى مول ەكەنىن ايتتى. «بۇل كەزدەسۋ ايماقتاردىڭ اراسىنداعى ساۋدا-ەكونوميكالىق قارىم-قاتىناستاردىڭ ودان ءارى دامۋىنا سەرپىن بەرەدى» دەپ اتاپ ءوتتى ەرمەك ءامىرحان ۇلى.
كەزدەسۋ بارىسىندا استانا قالالىق ينۆەستيتسيا جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ەرلان بەكمۇرزاەۆ, «استانا» اكك» ۇك» اكتسيونەرلىك قوعامى توراعاسىنىڭ ورىنباسارى دوسبول كۇشەرباەۆ, «استانا Innovations» اق باسقارما توراعاسىنىڭ ورىنباسارى سەرىك قۇسايىنوۆ, «سمارتنەت» جەكە كاسىپكەرلىگىنىڭ ديرەكتورى تاير قوجاحمەتوۆ جانە «لەد سوليۋشن» جاۋاپكەرشىلىگى شەكتەۋلى سەرىكتەستىگىنىڭ ديرەكتورى قانىبەك ايتاقوۆ ءسوز الىپ, استانا قالاسىندا اتقارىلىپ جاتقان كەلەلى جوبالار مەن جارقىن ىستەرگە توقتالدى. سونداي-اق, بۇگىندە دامۋدىڭ داڭعىل جولىنا تۇسكەن تاراز قالاسىندا دا ءتۇرلى يگى جوبالاردى بىرلەسە اتقارۋعا نيەت ءبىلدىردى. اتالعان فورۋم اياسىندا قوس تاراپتىڭ وكىلدەرى اراسىندا ىنتىماقتاستىق جونىندەگى مەموراندۋمدارعا قول قويىلدى.
بۇدان كەيىن استانالىق دەلەگاتسيانىڭ قاتىسۋىمەن وبلىستىق ولكەتانۋ مۋزەيىندە «اق تىلەكپەن, استانا!» اتتى كورمەنىڭ اشىلۋ سالتاناتى ءوتتى. مۇندا قوناقتار ەلوردانىڭ جانە اۋليەاتانىڭ تاريحىنا قاتىستى دۇنيەلەردى تاماشالادى. باس قالانىڭ بايتاق مەرەيتويىنا وراي جامبىل وبلىسىنداعى استانا كۇندەرى اياسىندا «بالاساعۇن» ورتالىق كونتسەرت زالىندا استانا قالاسى اكىمدىگىنىڭ مەملەكەتتىك اكادەميالىق فيلارمونياسى اۋليەاتالىق كوپشىلىككە «استانادان اق تىلەك...» اتتى كونتسەرتتىك باعدارلاماسىن ۇسىندى. كونتسەرت بارىسىندا استانا قالاسى فيلارمونياسىنىڭ «شالقىما» بي ءانسامبلى, ەسترادا بي ءانسامبلى, قازاق وركەسترىمەن قاتار, گۇلميرا اقۇرپەكوۆا, كلارا تولەنباەۆا, الماس كىشكەنباەۆ سىندى تانىمال انشىلەر ونەر كورسەتتى.
حاميت ەسامان,
«ەگەمەن قازاقستان»
جامبىل وبلىسى
