«الەم اۋەندەرى» ەڭبەگىندە ءتۇرلى حالىقتارعا ارنالعان قىزىقتى جىرلارى توپتاستىرىلسا, «قىرعىزىم, ءبىر تۋعانىم...» اتتى جيناعىندا باۋىرلاس قىرعىز ەلىنە ارناعان ولەڭ, جىرلارى, قىرعىز اقىندارىمەن ايتىستارى, «ماناس» ەپوسىنىڭ وزىنشە جىرلاعان ەكى تاراۋى, سۇحباتتارى ەنگىزىلگەن. «مەيىرىمدى اسقار» دەپ اتالعان قازاق, اعىلشىن, ورىس, نەمىس تىلدەرىندە, بالالار مەن جاسوسپىرىمدەرگە ارناپ جازىلعان ەرتەگىسىندە, قازاق بالاسى الەم حالىقتارى ەرتەگىلەرىنىڭ بارلىق كەيىپكەرلەرىمەن دوس بولاتىندىعىن سۋرەتتەگەن. ال «سكاز ستولەتنەگو ستەپنياكا» اتتى رومان-اڭىزىندا اۆتور ورىس-گەرمان سوعىسى جانە حالىقتار دوستىعى تۋرالى بايانداعان.
جيىن بارىسىندا جانە كىتاپحاناعا تارتۋ ەتكەن ەڭبەكتەرى جايىندا ويلارىن ورتاعا سالىپ, سىيعا تارتقان شىعارمالارىنا شولۋ جاساعان بايانعالي ءالىمجانوۆ: «بۇل ەڭبەكتەرىم ۇزاق جىلدان بەرى كوز مايىمدى تاۋىسقان جۇمىسىمنىڭ جەمىسى. جۇزگە كەلگەن قارتتىڭ ءومىرىن ورىسشا جازعان سەبەبىم, ءبىزدىڭ تاريحىمىز ءورىستىلدى اۋديتورياعا دۇرىس جەتپەيدى. وزگەرىپ, ادام تانىماستاي قۇبىلادى. سول سەبەپتى دە «ابىلاي حان جانە ونىڭ باتىرلارى» دەگەن كىتابىمدى دا ورىسشا جازعان بولاتىنمىن. قازاق تاريحى ەشبىر بۇرمالاۋسىز ءورىستىلدى قاۋىمعا جەتسە ەكەن دەگەن تىلەك. كىتاپتارىمدى ادەيى تۇرسىنبەك كاكىشەۆ اتىنداعى زالعا تاپسىرىپ وتىرمىن. ول كىسى مەنىڭ ۇستازىم بولعان. كىتاپ وقىرمان قاۋىمعا قىزمەت ەتەدى دەپ سەنەمىن» دەدى.
سونداي-اق جيىندا ءسوز العان اقىن قورعانبەك امانجول قالامداسىنا ارناعان ولەڭىن وقىپ, جىلى لەبىزىن ءبىلدىردى. «بايانعالي ءالىمجانوۆتىڭ بۇل ىستەپ جۇرگەن جۇمىستارى ۇلكەن ەرلىك. قازاق ادەبيەتىنىڭ ءار جانرىندا قالام تەربەپ جۇرگەن ويى جۇيرىك بايانعالي ورىس تىلىندە دە ەش قينالماي كوركەم شىعارما جازادى. بۇل كوپ قالامگەردە جوق قاسيەت. ونىڭ ون ەكى تومدىق قازاق تىلىندە جازعان شىعارمالارى بار. سونىڭ ءوزى قازاق ادەبيەتى ءۇشىن ۇلكەن ولجا», دەدى ول.
ۇلتتىق اكادەميالىق كىتاپحانا ۇجىمى بايانعالي ءالىمجانوۆتىڭ شىعارماشىلىعىنا زور تابىس تىلەپ, العىستارىن ايتتى. اۆتور شىعارمالارىن iزدەگەن وقىرمان كىتاپتاردى ەلەكتروندى كiتاپحانادان دا تابا الادى.
باعاشار تۇرسىنباي ۇلى,
«ەگەمەن قازاقستان»
