كەزدەسۋ بارىسىندا پاتريارح قازاقستان پرەزيدەنتى نۇرسۇلتان نازارباەۆتىڭ قوعامداعى كونفەسسياارالىق كەلىسىمدى نىعايتۋعا باعىتتالعان ساليقالى ساياساتىن ەرەكشە اتاپ ءوتتى. مەملەكەت پەن دىندەر اراسىنداعى, ونىڭ ىشىندە پراۆوسلاۆ دىنىمەن دە اراداعى ءوزارا سۇحبات سىندارلى تۇردە دامىپ كەلە جاتقاندىعىن ەرەكشە اتاپ ءوتتى.
مينيستر قازىرگى ۋاقىتتا تالقىلاۋدان ءوتىپ جاتقان ءدىني قىزمەت جانە ءدىني بىرلەستىكتەر تۋرالى زاڭ جوباسىنا پراۆوسلاۆ شىركەۋى وكىلدەرىنىڭ دە قاتىسقانىن ايتتى. «زاڭ جوباسىنا ەنگىزىلەتىن وزگەرتۋلەر مەن تولىقتىرۋلار ءدىندى دەسترۋكتيۆتى ماقساتتا پايدالانۋ جاعدايلارىن بارىنشا ازايتۋعا جانە ءدىني راديكاليزمنىڭ الدىن الۋعا باعىتتالعان», دەپ اتاپ ءوتتى مينيستر.
پاتريارح مەملەكەتتىڭ ءدىن سالاسىنداعى نەگاتيۆتى پروتسەسستەردى باقىلاۋ قاجەتتىگىمەن كەلىسەتىنىن اتادى. ورىس پراۆوسلاۆ شىركەۋىنىڭ باسشىسى جات ءدىني يدەولوگيانىڭ الدىن الۋ, پاتريوتتىق تاربيە بەرۋ جانە رۋحاني تۇلعانى قالىپتاستىرۋ ماقساتىندا جالپى ءبىلىم بەرەتىن مەكتەپتەردە ءدىن تاقىرىبىنداعى پاندەردى وقىتۋ تاجىريبەسىمەن ءبولىستى.
دارحان كالەتاەۆ پاتريارح كيريللگە دىنارالىق جانە مادەنيەتارالىق ديالوگتى دامىتۋعا قوسقان ۇلەسى ءۇشىن العىسىن ءبىلدىرىپ, ورىس پراۆوسلاۆيە شىركەۋىنىڭ وكىلدەرىنە استانادا وتكەن دىنارالىق فورۋمداردىڭ, سونداي-اق اتالعان فورۋمداردىڭ حاتشىلىعى مەن جۇمىس توبىنىڭ قىزمەتىنە قاتىسقانى جانە قولداۋ بىلدىرگەنى ءۇشىن ريزاشىلىعىن جەتكىزدى.
كەزدەسۋ سوڭىندا ماسكەۋ جانە بۇكىل رەسەي پاتريارحى كيريلل رەسەيدە قازاقستاننىڭ تۇراقتى دامۋىنا جانە ونىڭ حالىقارالىق ارەناداعى بەدەلىنىڭ نىعايۋىنا قۋانىشتى ەكەنىن ايتا كەلە, قازاقستان بيلىگىنىڭ كونفەسسياارالىق جانە ەتنوسارالىق كەلىسىمدى نىعايتۋعا باعىتتالعان ساياساتىنا تولىق قولداۋ ءبىلدىردى.
