ماجىلىستە ءبىلىم جانە عىلىم مينيسترلىگى مەن «اتامەكەن» ۇلتتىق كاسىپكەرلەر پالاتاسى جوعارى وقۋ ورىندارىنىڭ ءبىلىم بەرۋ باعدارلامالارىن باعالاۋدا بىرلەسىپ جۇمىس اتقارىپ وتىرعاندىعى ايتىلدى. بۇگىندە 33 ماماندىقتىڭ رەيتينگى دايىندالعان. زەرتتەۋ جۇمىسقا ورنالاسقان تۇلەكتەر پروتسەنتى مەن ولاردىڭ ورتاشا ەڭبەكاقىسى, باعدارلامانىڭ وزەكتىلىگىن باعالاۋ, سونداي-اق تۇلەكتەردىڭ ساۋالداما قورىتىندىسى ماڭىزدى ولشەم بولاتىن ادىستەمەگە سايكەس جۇرگىزىلەدى. تۇلەكتەر مەن ولاردىڭ جۇمىسقا ورنالاسۋى تۋرالى مالىمەتتەر جوعارى ءبىلىمدى باسقارۋدىڭ بىرىڭعاي جۇيەسىنەن الىندى. سونداي-اق ءبىلىم جانە عىلىم مينيسترلىگى بەرگەن مالىمەتپەن سالىستىرىلىپ تەكسەرىلدى.
جيىندا بەلگىلى بولعانداي ءبىرىنشى كەزەڭدە ءبىلىم جانە عىلىم مينيسترلىگىنەن الىنعان يەسى كورسەتىلمەگەن مالىمەتتەرمەن راستالعان بىلتىرعى تۇلەكتەردىڭ جۇمىسقا ورنالاسۋ پروتسەنتى مەن ورتاشا ەڭبەكاقىعا ساراپتاما, پروفەسسور-وقىتۋشىلىق قۇرامنىڭ ءىس جۇزىندەگى تاجىريبەسىنە, جوعارى وقۋ ورىندارىنىڭ ءبىلىم بەرۋ باعدارلامالارىنا سالاتىن ينۆەستيتسيالارىنا, ءبىلىم بەرۋ باعدارلامالارىن دايىنداۋ دەرەگىنە, ەلەكتيۆتى پاندەر كاتالوگىنا, سالالىق قاۋىمداستىقتار مەن جۇمىس بەرۋشىلەر بىرگە جاساعان سيللابۋستارعا, ءبىلىم بەرۋ باعدارلامالارىنىڭ حالىقارالىق اككرەديتاتسيادان ءوتۋى تۋرالى مالىمەتتەرىنە ساراپتاما جۇرگىزىلگەن.ال ەكىنشى كەزەڭدە سالالىق ساراپشىلاردى قاتىستىرا وتىرىپ, ءبىلىم بەرۋ باعدارلامالارىنىڭ مازمۇندىق الشاقتىعى باعالانىپ تالدانعان. ايتالىق, «قۇرىلىس» ماماندىعى 35 جوعارى وقۋ ورنىندا بار. ولاردى ساراپشىلار مەملەكەتتىك ورگانداردىڭ ەسكىرگەن اتاۋلارىن قولدانۋ, نورماتيۆتىك-قۇقىقتىق بازانىڭ وزەكتى بولماۋى, ءبىلىم بەرۋدىڭ جالپى تەوريالىق دەڭگەيى سياقتى فاكتىلەرگە سۇيەنە وتىرىپ باعالاعان.
سونىمەن قاتار ساراپشىلار بەرىلگەن باعدارلامالار ءبىلىم جانە عىلىم مينيسترلىگى بەكىتكەن فورماعا سايكەس ەمەستىگىن سونداي-اق ورفوگرافيالىق جانە ستيليستيكالىق قاتەلىكتەرى بار ەكەنىن اتاپ ءوتتى.
نەگىزىنەن پروفەسسورلىق-وقىتۋشىلىق قۇرامنىڭ ءىس جۇزىندەگى تاجىريبەلىك ءوتىلى زور ماڭىزعا يە. ايتالىق, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتى تاجىريبەلى مامانداردى تارتۋعا ەرەكشە كوڭىل بولەدى. ال ورتالىق ازيا ۋنيۆەرسيتەتى, كاسپي قوعامدىق ۋنيۆەرسيتەتىنە ءىس جۇزىندە تاجىريبەسى بار وقىتۋشىلاردى ىزدەستىرۋگە كوپ كوڭىل بولۋگە كەڭەس بەرىلدى.
ماجىلىستە كوتەرىلگەن تاعى ءبىر ماسەلە ەڭبەكاقى دەڭگەيىنىڭ ەڭبەك نارىعىنا شىققان تۇلەكتەردىڭ كاسىبي دايىندىعىنا تىكەلەي بايلانىستىلىعى جايى بولدى. بۇل فاكتور جوعارى وقۋ ورىندارىن بىلىكتىلىگى جوعارى پروفەسسورلىق-وقىتۋشىلىق قۇرام مەن ساپالى ءبىلىم باعدارلاماسىمەن اياقتاعان تۇلەكتەر نارىقتا باسەكەگە قابىلەتتى بولاتىنىن كورسەتەدى, تيىسىنشە ولار الدەقايدا جوعارى ەڭبەكاقى الادى.
ەلىمىز بويىنشا جوعارى ەڭبەكاقى «مۇناي-گاز ءىسى» ماماندىعىندا تىركەلگەن, ورتاشا ەڭبەكاقى 250 000 تەڭگە, ال ەڭ تومەنگى ەڭبەكاقى – «بيوتەحنولوگيا» ماماندىعىن تامامداعان (ورتاشا ەڭبەكاقى – 70 000 تگ) تۇلەكتەر ۇلەسىندە ەكەن.
سونىمەن قاتار جوعارى وقۋ ورنىن بىتىرگەننەن كەيىنگى العاشقى جىلى جۇمىسقا ورنالاسۋ دەرەگى دە ماڭىزدى. «مۇناي-گاز ءىسى» ماماندىعى بويىنشا ءبىلىم العان تۇلەكتەردە ۇزدىك كورسەتكىش – 84%; «بيوتەحنولوگيا» ماماندىعىن بىتىرگەن تۇلەكتەردىڭ جۇمىسقا بىردەن ورنالاسۋ كورسەتكىشى تومەن 56%-ءتى قۇرايدى.
ايتا كەتەيىك, وسى جىلدىڭ سوڭىنا دەيىن ۇلتتىق كاسىپكەرلەر پالاتاسى 50-دەن استام ماماندىقتىڭ رەيتينگىن ۇسىناتىن بولادى.
«ەگەمەن-اقپارات»
