الايدا اۋتيزممەن كۇرەسۋ ايتارلىقتاي ناتيجە بەرمەيدى دەپ ەسەپتەلسە دە, ونى جەڭۋگە بولاتىنىنا ء«اۋتيزمدى جەڭەمىز» جوباسىنا قاتىسۋشىلاردىڭ كوزى جەتە باستادى. مۇنداي ناۋقاسپەن تۋىلعان بالالار دا, ولاردىڭ اتا-انالارى دا كۇن سايىن, ءسات سايىن مۇنىڭ مۇمكىن ەكەندىگىن دالەلدەۋگە كوشتى. ەڭ باستىسى دۇنيە ەسىگىن اشقان كىشكەنتاي ادام قانداي سىناقپەن تۋسا دا, ىشتەن شىققان ءسابيىڭدى ءسۇيىپ, ونىڭ ءوز قاتارىنا قوسىلۋى ءۇشىن قاجىرلى تۇردە كۇرەسكەندە وڭ ناتيجە بەرەتىنى بەلگىلى بولا باستادى.
ء«اۋتيزمدى جەڭەمىز» جوباسى جۇمىس ىستەي باستاعانىنا بيىل بەس جىل بولادى, وسى ارالىقتا وعان قوسىلعاندار سانى ءۇش ەسە وسكەن.
– از جىل بۇرىن عانا قازاقستاننىڭ ماماندارى اۋتيزم ماسەلەسىن قابىلداۋعا قۇلىقتى ەمەس ەدى. ەندىگى جەردە بۇل ىسكە مەملەكەت تە قاتىسا باستاعانىن بايقايمىز. بىراق بۇل ماسەلەمەن كۇرەسۋدە اتا-انالاردىڭ ءرولى ەرەكشە. ولار ەشتەڭەگە دە قاراماستان, بالاسىن ەمدەتۋدىڭ جولدارىن ىزدەيدى. وسىنىڭ جانە ارىپتەستەرىمىزدىڭ ارقاسىندا اۋتيزممەن تۋىلعان بالالار وزدەرىنىڭ ارماندارىنا بارىنشا جاقىنداپ, قوعامعا بەيىمدەلىپ كەلەدى, – دەيدى «مەيىرىمدىلىك ەرىكتى قوعامى» قوعامدىق قورىنىڭ جەتەكشىسى ارۋجان ساين.
ال ەندى اۋتيزمنەن ەمدەلۋ جولىندا باستى كەدەرگىلەردىڭ ءبىرى – بۇرىنعىداي ارناۋلى مامانداردىڭ, وڭالتۋ ورتالىقتارىنىڭ جەتىسپەۋشىلىگى بولىپ وتىر. ءدارى-دارمەكتەردىڭ قىمباتشىلىعى مەن سپورتتىق قۇرال-جابدىقتاردىڭ جوقتىعى دا قول بايلايدى.
وسىنداي ماسەلەلەردى شەشۋ ءۇشىن «اشىق جۇرەك» قايىرىمدىلىق باستاماسى قولعا الىنىپ, وعان «نوماد ينشۋرانس» ساقتاندىرۋ كومپانياسى كومەككە كەلۋگە دايىن ەكەندىگىن بىلدىرگەن ەدى. ناتيجەسىندە وسى ارالىقتا «مەيىرىمدىلىك ەرىكتى قوعامى» قوعامدىق قورى اتالعان جوبا اياسىندا ايتارلىقتاي قاراجات جيناپ, ءدارى-دارمەكتەر, سپورتتىق جاتتىعۋلارعا ارنالعان قۇرالدار مەن جالپى ناۋقاس بالالاردىڭ ءومىرىن جاقسارتۋعا باعىتتالعان كەرەك-جاراقتاردى ساتىپ الدى.
ايناش ەسالي,
«ەگەمەن قازاقستان»
الماتى
