ماڭعىستاۋ وبلىسىندا قولعا الىنعان «نۇر-كاپيتال» باعدارلاماسى كوپشىلىكتىڭ قىزىعۋشىلىعىن تۋدىرعان بولاتىن. ءبىر پايىزدىق نەسيەگە قول جەتكىزۋدەن ۇمىتتەنگەندەر سانى كوپ بولدى, ولار ۇسىنعان جوبالار دا ءارالۋان.
جۋىردا اقتاۋ قالاسىندا اتالمىش باعدالاما بويىنشا العاشقى نەسيە ءوز يەسىن تاپتى. بۇل جاڭالىق وبلىس ورتالىعىندا ForteBank فيليالىنىڭ سالتاناتتى اشىلۋ راسىمىمەن تۇسپا-تۇس كەلدى.
سالتاناتتى اشىلۋ ءراسىمى اياسىندا ForteBank پەن ماڭعىستاۋ وبلىسىنىڭ اكىمدىگى اراسىندا ءوڭىردىڭ دامۋىنا ىقپال جاسايتىن جوبالاردى ىسكە اسىرۋ, سونداي-اق حالىققا ساپالى بانك قىزمەتتەرىن كورسەتۋ ماقساتىنداعى ىنتىماقتاستىق تۋرالى مەموراندۋمعا قول قويىلدى.
– قارجى ينستيتۋتتارىنىڭ اراسىندا ForteBank ايرىقشا ورىن الىپ وتىر جانە ەلدەگى ەڭ ءوتىمدى ءارى تۇراقتى بانكتەردىڭ ءبىرى بولىپ تابىلادى. ءبىز ForteBank پەن ماڭعىستاۋ وبلىسى اكىمدىگىنىڭ ءوڭىردىڭ ودان ءارى دامۋى بويىنشا ورتاق جوسپارلارىنىڭ بار ەكەندىگىنە جانە تىعىز ىنتىماقتاستىقتا جۇمىس ىستەيتىنىمىزگە قۋانىشتىمىز, مۇنى ەكەۋارا قول قويىلعان مەموراندۋم كۋالاندىرىپ وتىر. سونداي-اق «نۇر-كاپيتال» باعدارلاماسى بويىنشا ورتاق جوبامىز ىسكە اسۋدا, – دەدى ە.توعجانوۆ.
ForteBank باسقارماسىنىڭ توراعاسى گۋرام اندرونيكاشۆيلي بولسا «ForteBank قارجىلاندىرعان «نۇر-كاپيتال» باعدارلاماسى بويىنشا سۋبسيديالاۋدىڭ ءبىرىنشى شارتىنا قول قويۋ جاڭا ءوفيستىڭ اشىلۋىنداعى ەڭ باستى ساتتەردىڭ بىرىنە اينالدى. ForteBank ەلدىڭ ەڭ تۇراقتى, ءوتىمدى جانە جاقسى كاپيتالداندىرىلعان بانكتەرىنىڭ ءبىرى بولىپ تابىلادى» دەي كەلە, بانككە 2 000 000 استام كليەنت تىركەلگەندىگىن, بانكتىڭ19 فيليالى مەن 100-گە جۋىق بولىمشەسىنىڭ بار ەكەندىگىن اتالمىش بانك جۇمىسىنىڭ ناتيجەلىلىگىمەن بايلانىستىرا جەتكىزدى. ايتۋىنشا, بانك وڭىردە حالىققا جانە كومپانيالارعا قىزمەتتەر كورسەتۋ بويىنشا كوشباسشى ورىنعا يە. ماڭعىستاۋ وبلىسىندا ForteBank فيليالى كليەنتتەرىنىڭ سانى 34 000 استام جەكە كليەنتتەر جانە 3000-عا جۋىق كاسىپكەرلەردى قۇرايدى. سونداي-اق ForteBank «بيزنەستىڭ جول كارتاسى-2020» باعدارلاماسىنىڭ بەلسەندى قاتىسۋشىسى بولىپ تابىلادى, ال ماڭعىستاۋ وبلىسىنداعى فيليال بىرنەشە رەت بولىنگەن قاراجاتتاردى يگەرۋ قارقىنى بويىنشا كوشباسشى بولدى. 2017 جىلدىڭ قورىتىندىسى بويىنشا بانك 2,5 ملرد تەڭگەگە 28 جوبانى قارجىلاندىردى.
سالتاناتتى راسىمدە «نۇر-كاپيتال» وڭىرلىك باعدارلاماسى بويىنشا العاشقى بولىپ 1 پايىزبەن نەسيە العان كاسىپكەر اسحاتجان يبراەۆ اتالمىش باعدارلاما جەرگىلىكتى كاسىپكەرلەرگە ۇلكەن دەمەۋ بولاتىنىن ايتادى.
– ءبىز قازاقستانداعى تۇيە ءسۇتىنىڭ نارىعىن تالدادىق جانە ۇلكەن مولشەردە ەشكىمنىڭ تۇيە ءسۇتىن الىپ وندىرمەيتىنى تۋرالى قورىتىندىعا كەلدىك. ءبىزدىڭ زاۋىت تۇپقاراعان اۋدانى سايىن شاپاعاتوۆ اۋىلىندا ورنالاسقان, ءبىز پاستەرلەنگەن تۇيە ءسۇتى, يوگۋرت, ىرىمشىك, شۇبات, ايران, قايماق, شالاپ, ءتاتتى جانە باسقا دا قىشقىل ءسۇت ونىمدەرىن شىعارامىز. «اsiaMilk» زاۋىتى تۇيە ءسۇتىن قايتا وڭدەۋ ءۇشىن 7 جىل مەرزىمگە 1%-پەن 30 ملن تەڭگە نەسيە الدى. تۇيە ءسۇتىن زاۋىت كونتەينەرىندە شەتەلگە ەكسپورتتاۋعا مۇمكىندىك تۋىپ وتىر, – دەدى كاسىپكەر.
ءبىر پايىزدىق نەسيەگە ءۇمىت ارتقاندار العاشقى ۇمىتكەردىڭ انىقتالىپ, ءوز ءىسىن باستاعانىنا قۋانىپ, ءوز كەزەكتەرىن اسىعا كۇتۋدە.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
