– سالتانات, ءسىز ءبىرجان, اقان, ۇكىلى ىبىرايداي التى الاشتىڭ ارداعى اتانعان سال-سەرىلەر اسقاقتاتا ءان سالىپ وتكەن كوكشە وڭىرىندە تۋىپ-وسكەندىكتەن ونەرپاز بولماسقا قاقىڭىز دا جوق سياقتى ما, قالاي ءوزى؟
– قايدان بىلەيىن, جاڭاعى ايتقان جاقسى-جايساڭدار اۋناعان توپىراقتان ماعان دا بىردەڭە جۇققان شىعار. ونىڭ ۇستىنە ارقا اقيىقتارىنىڭ اندەرى ۇلكەن توي-جيىنداردا, وتباسىلىق داستارقان باسىنداعى وتىرىستاردا ۇلكەندەردىڭ ورىنداۋىندا ءجيى شىرقالاتىن. وسىنىڭ ءبارى اسەر ەتتى مە, ايتەۋىر ونەرگە قۇشتارلىعىم تىم ەرتە وياندى. كوزىمدى جۇمسام ساحنا تورىندە سانسىز قوشەمەتكە بولەنگەن ءارتىس كەيپىندەگى ءوزىمدى كورەتىنمىن. جان-دۇنيەمدى ارباعان سول سيقىردىڭ كۇشىن سەزدى بىلەم, انام قولىمنان جەتەكتەپ اپارىپ كوكشەتاۋ قالاسىنداعى شىعارماشىلىق ۇيىندەگى بالالار ستۋدياسىنا كىرگىزىپ جىبەردى. ودان سوڭ ءتاي-ءتاي باسقان تالابىمدى ۇشتاۋ ءۇشىن مۋزىكا مەكتەبىنە بەردى. پيانينو سىنىبىندا وقىپ جۇرسەم دە مۇعالىمدەرىم ءاۋ دەيتىن قابىلەتىمنىڭ بارىن بايقاپ قالىپتى. سويتسەك, مەنىڭ داۋىسىم كىشكەنتاي كەزىمنەن-اق اكادەميالىق ۆوكالعا بەيىم بولعان كورىنەدى.
– سوندا و باستان وپەرانىڭ اۋىلىنا باراتىن جولعا تۇسكەن بولدىڭىز عوي. كوپتەگەن قۇربىلارىڭىز سەكىلدى ەستراداعا قۇمارتپاعانىڭىز «قىزىق» ەكەن.
– ءسوزدىڭ شىنى كەرەك, وندا مەن وپەراڭىزدىڭ نە ەكەنىن بىلمەيتىنمىن. ەلدەن قالماي سول ۋاقىتتا كەڭىنەن تاراعان ەسترادالىق اندەردى ايتاتىنبىز. بىراق نەگە ەكەنىن قايدام, كۇمىس كومەي بيبىگۇل تولەگەنوۆانىڭ «بۇلب ۇلىن» تىڭداعاندا راديونىڭ ىشىنە كىرىپ كەتە جازدايتىنمىن. كەي تۇستارىندا ءتىپتى, قوسىلا كەتىپ, الىمە قاراماي جوعارى نوتالاردى الۋعا تالپىناتىنىمدى قايتەرسىز. كۇرمەۋى قيىن كۇردەلى ءاننىڭ يىرىمدەرى يكەمىمە كونسە توبەم كوككە ەكى-اق ەلى جەتپەي قۋاناتىنمىن. ءسىرا, الدەبىر ىشكى تۇيسىكپەن كلاسسيكالىق جانردىڭ جانىما جاقىندىعىن تۇسىنسەم كەرەك.
بىردە بىزگە وبلىستىق فيلارمونيانىڭ ارتىستەرى كەلىپ كونتسەرت قويدى. سوندا ءبىر تەنور داۋىسىن كوكتە تەربەپ تۇرىپ العان ساتتە كەرەمەتتەي عاجايىپ كۇي كەشكەنىم ەسىمنەن كەتپەيدى.
تۋرا سول جولى ماعان تۇڭعىش رەت انشىلىككە بەت بۇرۋ تۋرالى وي كەلدى-اۋ دەيمىن. الگىندە اڭگىمە بارىسىندا باياندالعانداي داۋىسىم اكادەميالىق اندەردى ايتۋعا لايىقتالىپ قويىلعاندىقتان ەسترادانىڭ ء«الاۋلايلارىن» اۋەلەتۋگە ادەتتەنە المادىم.
– سونىمەن مەكتەپ بىتىرگەن سوڭ كونسەرۆاتورياعا ءتۇستىڭىز...
– جوق. وعان دەيىنگى «وديسسەي وقيعالارىن» قايدا قوياسىز. اسىقپاي سولاردى ايتايىن.
– ەكى قۇلاعىم وزىڭىزدە ەندەشە.
– مەن ورتا ءبىلىم جونىندەگى اتتەستاتتى ون ءتورت جاسىمدا الدىم ەمەس پە.
– ويپىرماي, وندا ۆۋندەركيند بولدىڭىز عوي...
– مەكتەپ-ليتسەيدى جەدەلدەتىلگەن باعدارلامامەن وقىپ بىتىرگەنىم بولماسا, ەرەك قابىلەتپەن ەرەكشەلەنەتىندەي ەشتەڭەم جوق.
جارايدى, ەڭ باستىسى بۇل ەمەس. قۋانىشىم قوينىما سىيماي, جۇرەگىم الىپ-ۇشىپ جۇرگەندە كونشۋلى كوڭىلىمدى سۋ سەپكەندەي باسقان جاعىمسىز جاڭالىق ەستىدىك. جوعارى وقۋ ورىندارىنا ۆوكاليستەر ون جەتىگە تولعاننان كەيىن عانا قابىلدايدى ەكەن.
– مىنا قىرسىقتى قاراڭىز.
– ويلاماعان جەردەن وماقاسا قۇلاعانداي قاتتى ابىرجىپ قالدىم. ەندى نە ىستەۋ كەرەك؟ اينالامداعىلارمەن ءارى-بەرى اقىلداسىپ, ۋنيۆەرسيتەتتىڭ شەت تىلدەر فاكۋلتەتىنە قۇجات تاپسىرۋ جونىندە شەشىم قابىلدادىم. ەكى-ءۇش جىل ەرمەك قىلا تۇرايىن. سوسىن ءوزىمنىڭ ونەرىمدى ورىستەتەمىن. الايدا اكە-شەشەم مەنىڭ ەرەسەك قىز-جىگىتتەرمەن بىرگە وقىعانىمدى قالاماپتى. ويتكەنى مەن سول كەزدە اۋلادان الىس ۇزامايتىن ويىن بالاسى ەدىم.
اقىرى مامام امالىن تاۋىپ, كوكشەتاۋداعى ءبىرجان اتىنداعى مۋزىكالىق كوللەدجدىڭ بوساعاسىنان اتتاتتى. مەكتەپتى ۇزدىك بىتىرگەندىكتەن جانە مۋزىكالىق ساۋاتىم بولعاندىقتان مۇنداعىلار ەمتيحان الىپ قينامادى. تەك بەرىلگەن مۋزىكالىق شىعارمانى شىرايىن شىعارىپ ورىنداعانىمدى قاناعات تۇتتى.
كوللەدجدە قاناتىمدى قاتايتقان ۇستازدارىمنىڭ قاتارىنان جاقىپ مۇحامادي ۇلى كوشكىنباەۆتى بولە-جارا اتاعانىم ابزال. تالانتتىڭ تايىن مىنگەن تۇستا ءدال وسىنداي جايساڭ جاننىڭ كەزدەسكەنىنە شۇكىرشىلىك ەتەمىن. وكىنىشكە قاراي, قازىر ارامىزدا جوق. پاراساتتى پەداگوگىم كاسىبي شەبەرلىگىمدى ۇشتاپ قانا قويماي, ادامي اسىل قاسيەتتەردى بويىما ءسىڭىرىپ باققانىن قايتىپ ۇمىتايىن.
جاقىپ اعام استانادا وتكەن كونكۋرسقا كەلگەنىمىزدە قازىلار القاسىنىڭ ءتورايىمى بولىپ وتىرعان بەلگىلى وپەرا ءانشىسى حورلان قاليلامبەكوۆامەن تانىستىرىپ, مەنى تىڭداپ كورۋىن ءوتىندى. سونداي-اق كەلەسى جىلى وسى استاناداعى مۋزىكا اكادەمياسىنا وقۋعا تۇسكىم كەلەتىنىن ەسكەرتتى.
اقىرى ونىڭ ايتۋىمەن حورلان اپايدىڭ كلاسىنا قابىلداندىم. ءتيىستى سىناقتاردان سۇرىنبەي وتكەننەن كەيىن, ارينە. ساحنالىق تاجىريبەسى مول ساڭلاقتىڭ تاربيەسىن الۋ ءوز الدىنا ءبىر باقىت. ستۋدەنتتەرىنە كورسەتەر ونەگەسى كوپ. ۆوكال تەحنيكاسىن جەتىك بىلەدى. وبرازعا ەنۋ تاسىلدەرىن مەڭگەرۋگە, شاكىرتتەرىنىڭ وزدەرى نە جايىندا اندەتىپ تۇرعانىن تۇسىنە بىلۋگە باۋليدى. جالپى, ءوزىمدى تالىمگەرلەر جاعىنان جولى بولعانداردىڭ ساناتىنا قوسامىن.
– قازىرگى ەسترادا وكىلدەرىنە قاراعاندا وپەرا انشىلەرىنىڭ قاراپايىم حالىق اراسىنداعى تانىمالدىعى ازداۋ ەكەنى جاسىرىن سىر ەمەس. ستاديون تولى كورەرمەن جينايتىن دا, تەلەديدار ەكرانىنان تۇسپەيتىن دە, شوۋ-بيزنەستىڭ قىزىعىن كورەتىن دە سولار. قازاقتىڭ توي-تومالاعىندا قالتا تومپايتاتىن دا وسى داۋىس دياپازونى ەكى وكتاۆادان اسپايتىن جۇلدىزسىماقتار شەرۋى جۇيكەڭىزدى جۇندەي تۇتپەي مە؟
– ۇيرەنشىكتى ءۇردىس بولعاندىقتان بالەندەي باس اۋىرتىپ جاتپايمىن. دەگەنمەن ەپتەپ وكىنەتىن ساتتەرىمنىڭ بولاتىنىن مويىنداۋعا ءتيىسپىن. تاماعىمىزدى جىرتىپ اق تاڭنان قارا كەشكە دەيىن ازىرلىك جاسايمىز. ودان كوپشىلىكتىڭ الدىندا جاندى داۋىسپەن اۋىر پارتيالاردى ورىندايسىڭ. ال ەستراداداعى ارىپتەستەرىمىز فونوگراممامەن اۋىزدارىن جىبىرلاتىپ قانا قانجىعالارىن مايلاپ قايتادى. بىزدە نەلىكتەن ەكەنىن بىلمەيمىن, كلاسسيكالىق ونەر ءوز دارەجەسىندە باعالانبايدى. بۇل سالا كورەرمەننىڭ كوكىرەك كوزى اشىق, ينتەللەكتۋالدىق دەڭگەيى جوعارى بولعانىن سۇيەدى. راسىمەن دە وپەرا ورە تالعايتىن ونەر. وسىدان بارىپ ول بىرەۋگە ۇنايدى, بىرەۋگە ۇنامايدى.
– مۇمكىن قازاقتىڭ قانىنا سىڭبەگەن ويىن-ساۋىق ءتۇرى بولعاندىقتان جاتىرقايتىن شىعارمىز.
– ەۋروپادان ەنگەندىكتەن ءتول مادەنيەتىمىزدىڭ ءتورىن ۇسىنۋعا ۇمتىلمايتىنىمىز بايقالادى. بالكىم, تۇبىندە جاعداي تۇزەلەر.
– ۇلكەن ساحناعا العاش قاشان شىقتىڭىز؟
– بالالار شىعارماشىلىعىنا ارنالعان كونكۋرستارعا قاتىسىپ جۇرگەنىمدە كوكشەتاۋداعى مادەنيەت سارايىنىڭ ساحناسىنا كوتەرىلگەنىمدى مارتەبە سانادىم. كوللەدجدىڭ سوڭعى كۋرسىندا ءبىز جوعارىدا ەسكە الىپ وتكەن جاقىپ مۇحامادي ۇلىنىڭ جەتەكشىلىگىمەن «التىن كىلت» اتتى وپەرانى ساحنالادىق. سونىڭ ارقاسىندا اتىمىز ءبىراز جەرگە باردى. بىردە كوللەدجىمىزگە استاناداعى كۇلاش بايسەيىتوۆا اتىنداعى وپەرا جانە بالەت تەاترىنىڭ باس ديريجەرى ابزال مۇحيددينوۆ كەلىپ, سپەكتاكلىمىزدى كوردى. ءسىرا, ۇناعان بولۋى كەرەك, شىعارماشىلىق توبىمىزدى ەلورداعا شاقىردى. بۇل ەندى ءوڭىمىز تۇگىل تۇسىمىزگە كىرمەگەن جاعداي-تۇعىن. باقىتتان باسىمىز اينالدى. ۇلكەن تولقۋ ۇستىندە باس شاھارعا باردىق. وركەستردىڭ سۇيەمەلدەۋىمەن ويىن قويدىق. كورەرمەندەر ىقىلاسى كوڭىلىمىزدى كوككە ورلەتتى. زال تولى ورىمدەي ورەندەر بىزگە گۇل ورنىنا ءتاپ-ءتاتتى تورت سىيلاعاندارىن ءالى ۇمىتپايمىن.
– ايتپاقشى, اناۋ بالەت بيشىلەرى قاتاڭ ديەتا ۇستايدى. ءتاتتى-تاپسەر جەمەيدى. ارتىق اۋقات اۋىر تيەدى. دەنە سىمباتى بۇزىلادى دەگەندى ءجيى ەستيمىز. وسىنىڭ جايى وپەرا انشىلەرىندە قالاي؟
– ال مەن سىزگە ءدال وسى بالەت ارتىستەرى تاماقتى تالعاماي سوعادى دەسەم سەنەسىز بە؟! ويتكەنى جانكەشتى جاتتىعۋلاردان سوڭ اراندارى اشىلماي قايتەدى. شوكولادتى دا جەيدى, گازدالعان سۋسىنداردى دا ىشەدى. ويتكەنى كەيىن بۇل كالوريالار رەپەتيتسيالاردا شەلەكتەپ توگىلگەن تەرمەن شىعىپ كەتەتىنىن بىلەدى.
ارينە تاماقتانۋ مەن داۋىس اراسىندا بايلانىس بارى انىق. ەگەر ەتجەڭدىلەۋ بولساڭىز, ءان شىرقاۋ الەۋەتىڭىز دە ارتادى. ونى بىلتىر ورازا ۇستاعاندا بايقادىم. ىشپەسەڭ, جەمەسەڭ كۇشتى قايدان الاسىڭ دەگەندەي. كەيبىرەۋلەردىڭ پايىمداۋىنشا, انشىلەر اۋىزدارىن اشسا بولدى ادەمى اۋەندەر قۇيقىلجي جونەلەتىن ءتارىزدى. مۇلدەم ولاي ەمەس ەكەنىن قايدان ءبىلسىن. قانشاما قۋات قاجەت. ونىڭ ۇستىنە وپەرادا اريا ايتىپ قانا قويماي, وبرازعا ەنىپ وينايسىڭ عوي. قىرۋار قيمىل-قوزعالىس جاسايسىڭ. سپەكتاكلدە كيگەن كويلەگىڭ سىعىپ الارداي سۋ بولاتىنىنان بىلايعى جۇرت بەيحابار. بۇرىندارى وپەرا انشىلەرى نەگىزىنەن ءىرى بولاتىن. بۇگىندە ءسال باسقاشالاۋ. رەجيسسەرلەر باستى رولدەگىلەردىڭ قىپشا بەلدەرى قيىلىپ, قۋىرشاقتاي قۇلپىرىپ كورەرمەن كوزايىمىنا اينالعانىن قالايدى. دۇرىس قوي. بىراق سىرتقى سۇلۋلىققا باسا ءمان بەرىلىپ, داۋىس دياپازونى ەسكەرىلمەي قالماسا بولعانى دا.
– «استانا-وپەرا» تەاترىنا قالاي كەلىپ قالدىڭىز؟
– مۋزىكا اكادەمياسىنىڭ ءۇشىنشى كۋرسىن بىتىرگەندە كۇلاش بايسەيىتوۆا اتىنداعى وپەرا جانە بالەت تەاترىنا قابىلدانىپ, الدىمەن ستاجەر, سوسىن سوليست بولىپ جۇمىسقا ورنالاستىم. مۇنداعى ورىنداعان ءبىرىنشى پارتيام – قىز جىبەك. ەكى جىلدان كەيىن يتالياعا وقۋعا اتتاندىم. سونى بىتىرگەن سوڭ 2013 جىلى ارنايى ىرىكتەۋدەن ءوتىپ «استانا وپەرانىڭ» شاڭىراعىنا كىردىم.
– يتالياداعى وقۋ ءوز باسىڭىزعا نە بەردى؟
– وي, ونى ءبىر اۋىز سوزبەن تۇيىندەۋ قيىن. تالاي پايدا تاپتىم. قانشا ايتقانمەن وپەرانىڭ وتانى ەمەس پە, كورگەن-بىلگەنىم مەن كوڭىلگە تۇيگەنىم ۇشان-تەڭىز. يتاليانىڭ قاق ورتاسىنداعى وزيمو قالاسىنداعى جەكەمەنشىك اكادەميا ونەربايانىمدا وشپەس ءىز قالدىرعانىن ماقتان تۇتامىن.
– وسى تەاتردىڭ ساحناسىندا قانداي قويىلىمدارعا قاتىستىڭىز؟
– بۇل تەاترداعى قادامىمدى دج.ءپۋچچينيدىڭ «بوگەماسىنان» باستادىم. سونداي-اق مۇقان تولەباەۆتىڭ ء«بىرجان-ساراسىندا» التىنايدىڭ, احمەت جۇبانوۆ پەن لاتيف ءحاميديدىڭ «ابايىندا» اجاردىڭ پارتيالارىن ورىندادىم. قازىر «تۋراندوتقا» دايىندىق ۇستىندەمىن. بۇلاردىڭ سىرتىندا باسقا تەاترلاردا ويناعان رولدەرىم دە بارشىلىق. اسىرەسە اباي اتىنداعى وپەرا جانە بالەت تەاترىنىڭ رەپەرتۋارىنداعى گ.دونيتسەتتيدىڭ «ماحاببات شىرىنى» وپەراسىندا ادينانىڭ پارتياسىن ايتقانىمدى ابىروي كورەمىن. بۇل ءوزى تۋرا مەنىڭ داۋىسىما لايىقتاپ جازىلعانداي عاجاپ دۇنيە. قازىرگىدەي جان-جاقتان قاپتاعان قيىندىقتار قىسپاققا العان زاماندا ادامداردىڭ ءبىر ساتكە راحاتتانىپ دەمالۋىنا جاعداي تۋدىراتىن كومەديالار كەرەك سەكىلدى. سەبەبى كوڭىل كوتەرەتىن سيۋجەتتەر جانىڭدى جاي تاپتىرادى. مىناۋ «ماحاببات شىرىنى» سونداي ءمولدىر سەزىم سىيلايتىن كۇلكىلى وقيعاعا قۇرىلعان. مەن وسىناۋ تاماشا تۋىندىنىڭ ءوزىمىزدىڭ تەاتردا دا قويىلۋىن تىلەيمىن.
– «استانا وپەراعا» سىرتتان شاقىرتىلعان اتاقتى رەجيسسەرلەردىڭ اراسىنان كىمدەرمەن جۇمىس ىستەدىڭىز؟
– «ابايدى» قويعان يتاليالىق رەجيسسەر دجانكارلو دەل موناكونىڭ شەبەرلىگىنە ءتانتىمىن. تالانت! ول ماعان اجاردىڭ پارتياسىن ءبىرىنشى پرەمەرادا ايتۋ مۇمكىندىگىن بەردى. جاسىنىڭ ۇلعايعانىنا قاراماي تەپسىنىپ تۇرعان قاجىر-قايراتىنا قايران قالدىم. بويىنا سىيماي بۋىرقانعان ەموتسياسى قانداي!؟ تەمپەرامەنتى سۇمدىق تەگەۋرىندى. ءوزىنىڭ جۇرەگىنە وتا جاسالىپتى. سوعان قاراماي قاشان كورسەڭ دە جۇلقىنىپ جۇرەدى. ارينە ونىڭ «ابايىنا» قاتىستى ءارتۇرلى پىكىر ءبىلدىرىلدى. بازبىرەۋلەر «ابايدىڭ ءۇيىن التىنمەن اپتاپ جىبەرىپتى. قازاقتىڭ كيىز ۇيىندە ونداي ءسان-سالتانات بولماعان» دەگەن سىڭايداعى سىڭارجاق ويلارىن ورتاعا سالىپ ۇلگەردى. الگىندەي سىنامپازدار رەجيسسەردىڭ ابايدىڭ جايلى تۇرمىسىن ەمەس, رۋحاني بايلىعىن كورسەتكىسى كەلگەنىن تۇسىنە الماسا كەرەك. ۇلتتىق جاۋھارلارىمىزدى جاھانعا تانىتۋ ورايىندا ەۋروپالىقتار دا ۇعاتىنداي ەپتەگەن وزگەرىستەر جاساعاننىڭ ەش ايىبى جوق سياقتى. باجايلاپ قاراساق, قازاقتىڭ ۇلتتىق تاقىرىپتاعى وپەرالارى ءبىر-بىرىنەن اۋمايدى. ال گرۋزين ميحايل پانجيۆيدزە ء«بىرجان-سارانى» جاڭا رەداكتسيادا باسقاشا سويلەتتى. «تۋراندوتتى» قويعان داۆيد لەۆور موردىڭ دا قولتاڭباسى وزگەشە. اكتەرلىك شەبەرلىگىمىزدى ايشىقتاي ءتۇستى.
– كەزەكتى رولىڭىزگە قايتىپ دايىندالاسىز؟
– سيۋجەتپەن دۇرىستاپ تانىسامىن. ءماتىندى ميىما سىڭىرەمىن. مۋزىكالىق ماتەريالدىڭ ءمان-ماعىناسىن تۇسىنۋگە تىرىسامىن. وپەرالاردىڭ كوبىسى شەت تىلدەرىندە جازىلعاندىقتان ءبىراز ەڭبەكتەنۋگە تۋرا كەلدى.
– ءوزىڭىز نەشە ءتىل بىلەسىز؟
– قازاقشاعا قارا جاياۋ ەمەسپىن. ورىسشاعا اعىپ تۇرمىن. اعىلشىنشا جانە يتاليانشا ەركىن سويلەيمىن. فرانتسۋزشا تۇسىنىسۋگە جارايمىن. قيىنداۋ تيەتىنى – نەمىسشە.
– ونەر جولىنداعى ءبىراز بيىكتەردى باعىندىرعانىڭىزدى بىلەمىز. كوپتەگەن حالىقارالىق كونكۋرستاردا توپ جاردىڭىز. اسىرەسە ماسكەۋدەگى ايتۋلى «ۇلكەن وپەرا» تەلەجوباسىنىڭ ءۇشىنشى ماۋسىمىندا باس جۇلدەنى يەمدەنۋىڭىز اتاق-داڭقىڭىزدىڭ جاھانعا جايىلۋىنا سەپتىگىن تيگىزگەنى تالاسسىز.
– ول راس ەندى. ەگەر شىندىعىن ايتسام, بۇل ونەر دوداسىنا كەزدەيسوق جاعدايدا كىرىپ كەتتىم. قاشاندا قاناتىنىڭ استىنا الۋدان شارشامايتىن قامقورشىم حورلان قاليلامبەكوۆا تەلەبايگەگە قاتىسۋىمدى قالاپ, قولقا سالدى. بىراق وعان قۇلاق اسۋعا ق ۇلىقتى بولمادىم. «ماسكەۋ مەنى قايتسىن, بىرىنەن-ءبىرى وتكەن ءوز انشىلەرى جىرتىلىپ ايىرىلادى» دەپ جۇرە بەردىم.
سودان سول 2014 جىلعى تامىزدىڭ اياعىنا تامان ءبىزدىڭ تەاترعا قوڭىراۋ سوعىلىپتى. ماسكەۋدەن. وسىلاي دا وسىلاي احمەتوۆالارىڭىز «ۇلكەن وپەراعا» قاتىسۋى قاجەت. ەندى ەكى اپتادان كەيىن ماسكەۋگە كەلسىن. بايگەنى ۇيىمداستىرۋشىلار تىڭداپ كورەدى. ال كەرەك بولسا! مەن بولسام ەڭبەك دەمالىسىنان ەكى-ءۇش كۇن بۇرىن عانا كەلگەنمىن. داۋىسىم دا «ورنىندا» ەمەس. ۇياتقا قالۋىم مۇمكىن. اقىرى بارۋعا بەل بۋدىم. اتالارىمىز ايتپاقشى, «شاپانىمدى شەشىپ الماس. نارتاۋەكەل! جىعىلسام جەر كوتەرەر. نەدەن ۇتىلامىن؟ ەڭ بولماسا ماسكەۋدىڭ مۋزەيلەرىن ارالاپ بوي سەرگىتىپ قايتارمىن», دەدىم دە دەرەۋ ۇشاققا ءمىندىم.
بەدەلدى كوميسسيا الدىندا ء«تۇن پاتشايىمىنان» اريا ايتتىم. ىرىكتەۋگە قاتىسقان دميتري بەرتمان ءۇستى-ۇستىنە تاپسىرمالار بەرىپ ەسىمنەن تاندىردى. كانىگى كاسىبي رەجيسسەرلىگىنە سالىپ بىرەسە جىلايتىن, بىرەسە كۇلەتىن كەيىپكەرلەردىڭ بەينەسىن تالاپ ەتتى. ايتقانىنا كونىپ, ايداۋىنا جۇرگەندەي بولدىم. بىراق ءوز-وزىمە كوڭىلىم تولمادى. ويداعىداي ناتيجە كورسەتپەگەن سياقتىمىن. كۇدىك كوپ, ءۇمىت جوق. ەسەسىنە ارمانسىز قىدىرىپ, ەلورداما كوتەرىڭكى كوڭىل كۇيمەن قايتتىم.
ارتىنان ارنايى ىرىكتەۋدەن امان-ەسەن وتكەنىمدى ەستىگەندە اڭ-تاڭ بولدىم. ءسويتىپ وزا شاپقان ون ۇمىتكەردىڭ ءبىرى رەتىندە بايگەگە قاتىسىپ, باعىمدى سىنادىم.
مۇنايدا كەدەرگىلەردىڭ كەسە-كولدەنەڭدەيتىن ادەتىن قويساڭشى بۇل. تەلەجوبانىڭ بەل ورتاسىنا جاقىنداعاندا «استانا وپەرا» ۇجىمىنىڭ دۇنيەجۇزىلىك تۋرنەسى باستالدى. سوعان قاتىسۋىم كەرەك بولاتىن. ماسكەۋلىكتەرگە ءمان-جايدى ءتۇسىندىرىپ, جارىستى جالعاستىرۋدان باس تارتتىم. ونداعىلار جاتىپ كەپ جالىنادى, ءبىر امالىن تابۋىمدى سۇراپ. سونىمەن قويشى, تىعىرىقتان شىعار جولدى جان-جاقتان ىزدەپ تاپتىق-اۋ ايتەۋىر. اقىر سوڭىندا ابىرويىم اسىپ, جەڭىمپاز اتانعانىمدى بىلەسىزدەر.
– بۇل مارتەبەلى ونەر مارافونى نەسىمەن ەسىڭىزدە قالدى؟ شىعارماشىلىعىڭىزعا تيگىزگەن پايداسى قانداي؟
– نەگىزىنەن كەز كەلگەن باسەكە جىگەرىڭدى جانىپ, نامىسىڭدى قايرايدى. شابىتىڭنىڭ شاما-شارقىن بايقايسىڭ. قازىلار القاسىندا قازداي ءتىزىلىپ قاتار وتىرعان وبرازتسوۆا, حولدنەر, كالينينا, بەرتمان سەكىلدى بەدەلدى تۇلعالاردىڭ الدىندا الامانعا ءتۇسۋ وڭاي بولعان جوق. وپەرا جۇلدىزى ەلەنا وبرازتسوۆانىڭ جىلى لەبىزىن ەستۋىم جانە ونى ميلليونداعان تەلەكورەرمەن الدىندا ايتۋى بىلگەنگە از ولجا ەمەس. تانىمالدىعىمدى ارتتىرعان اتالمىش كونكۋرستان كەيىن رەسەيدىڭ ءبىرسىپىرا قالاسىندا كونتسەرت بەردىم. شاقىرىپ جاتقان جەرلەر ءالى دە جەتەرلىك.
– الەمنىڭ ايگىلى وپەرا تەاترلارىندا ءان سالعىڭ كەلە مە؟
– ول ءارتىس بىتكەننىڭ ارمانى عوي. بۇيىرعان جاقسىلىقتاردى كورە جاتارمىز.
– اسەرلى اڭگىمەڭىزگە راحمەت.
اڭگىمەلەسكەن تالعات باتىرحان,
«ەگەمەن قازاقستان»
