«تۇلپارى وزعان ەلدىڭ تايى دا وزار» دەمەي مە, سول سەكىلدى بەلگيانىڭ دا بۇل جولعى قۇرامى جاقسى بولدى. كىلەڭ «سەن تۇر, مەن اتايىن» دەگەن جىگىتتەر ەدى. شيفو, گەررەرتس, ۆيلموتستاردىڭ سوڭىن الا شىققان ءبىر بۋىن تالانتتى ويىنشىلار دەسەك ارتىق ەمەس. بارلىعى الپاۋىت ءتورت چەمپيوناتتىڭ كوركىن كەلتىرىپ جۇرگەن شەبەرلەر. بىراق, تاجىريبە مە, ساتتىلىك پە, ايتەۋىر بەلگياعا بىردەڭە جەتىسپەدى. ماماندار ءارتۇرلى ءۋاج ايتىپ اقتالعانىمەن, ونىڭ جاۋابىن ەشكىم بەرە الماس.
بەلگيا بىرىنشىلىكتى كەرەمەت باستادى. پانامانى 3:0, ءتۋنيستى 5:2, انگليانى 1:0 ۇتتى. توپتىق كەزەڭدە ءۇش ويىننان 9 ۇپاي الدى. مۇنداي كوماندالار چەمپيوناتتا ءوزى ۇشەۋ-اق. توپتىق كەزەڭدى تاماشا وتكەرگەن بەلگيا پلەي-وففتى قيىن باستادى. ءمۋنديالدىڭ سەنساتسياسى تىركەلىپ, جاپونيا كەلەسى كەزەڭگە ءوتىپ كەتەر ەدى. ويىننىڭ 70 مينۋتىندا «قىزىل سويقاندار» 0:2 ەسەبىمەن جەڭىلىپ جاتتى. بىراق, باپكەر روبەرتو مارتينەس دەر كەزىندە الاڭعا تىڭ ويىنشىلاردى كىرگىزىپ, ويىننىڭ ءمان-ماعىناسىنا وزگەرىس ەنگىزدى. قالعان 20 مينۋت ىشىندە بەلگيا ەسەپتى تەڭەستىرىپ قانا قويماي, ءتىپتى جەڭىستى ج ۇلىپ اكەتتى. وسى كوڭىلمەن ولار كەلەسى ويىنعا دا سەنىمدى شىقتى. بۇل جولى ءىستى ناسىرعا شاپتىرماي-اق برازيليا قاقپاسىنا 2 دوپ سوعىپ, كەرىسىنشە وزدەرى قورعانىسقا مىقتاپ كىرىستى. برازيليانىڭ تەك ءبىر گولعا عانا شاماسى جەتتى. ازيا مەن لاتىن امەريكاسىنىڭ كوماندالارىن جارىستان ۇشىرعان سوڭ, بەلگيانىڭ الدىنان الپاۋىت فرانتسيا شىعا كەلدى. كورشىلەس جاتقان قوس ەلدىڭ قۇراماسىنداعى فۋتبولشىلار ءبىر-ءبىرىن بۇرىننان تانيدى. ءتىپتى كەيبىرەۋلەرى بالالار فۋتبولىنان باستاپ ءبىر-بىرىنە ءجۇزى تانىس. فرانتسيا مەن بەلگيا ساپىنداعى 20 فۋتبولشى وسى كۇننىڭ وزىندە ءارتۇرلى كوماندالاردا بىرگە وينايدى. مىسالى, فرانتسيا شابۋىلشىسى وليۆە جيرۋ مەن نگولو كانتە «چەلسي» ويىنشىلارى. اعىلشىننىڭ وسى كومانداسىندا بەلگيانىڭ قاقپاشىسى تيبو كۋرتۋا مەن ەدەن ازار ونەر كورسەتەتىنىن ۇمىتپايىق. سوندا جالپىلاما العاندا «مانچەستەر يۋنايتەد», «مانچەستەر سيتي», «بارسەلونا», «موناكو» سەكىلدى كوماندالاردا ەكى قۇرامانىڭ 20 فۋتبولشىسى ارالاس-قۇرالاس وينايدى ەكەن.
بەلگيا جارتىلاي فينالدا جەڭىلگەنىمەن, جارىستىڭ ءۇشىنشى ورنىن يەمدەنۋى مۇمكىن. قولا جۇلدە ءۇشىن وتەتىن جۇبانىش ماتچىنا قاتىسادى. جالىنداپ تۇرعان جاس كومانداعا ونىڭ ءوزى دە زور تابىس بولارى انىق. دەگەنمەن, الەمدىك دودادا تاماشا ونەر كورسەتكەن بەلگيا 2020 جىلى وتەتىن «ۇلتتار ليگاسىندا» كەرەمەت ناتيجەگە قول جەتكىزۋى عاجاپ ەمەس.
ال فينالعا شىققان فرانتسيا اراعا 20 جىل سالىپ چەمپيون اتانساق دەيدى. دەگەنمەن, 2006 جىلى دا فرانتسۋزدار فينالدا ونەر كورسەتكەنىن ەشكىم ۇمىتا قويعان جوق. زينەدين زيداننىڭ الاڭنان قۋىلىپ, ماتەراتسيدىڭ كەۋدەسىنەن ۇراتىن كەزى جايلى كىتاپتار جازىلىپ, ەسكەرتكىشتەر ورناتىلىپ تا قويدى عوي. ول فينالدى فرانتسيا جانكۇيەرلەرى اسا قاتتى ەسكە العىسى جوق. 1998 جىلى فرانتسيا قۇراماسى چەمپيون بولعان سوڭ, اراعا 3 اي سالىپ, ومىرگە كيليان مباپپە كەلىپتى. فرانتسيانى العا جەتەلەپ, ماڭىزدى گولداردى سوعىپ جۇرگەن 19 جاستاعى تالانت ەندى فينالدا گول سوعىپ, تاريحتا قالسام دەيدى. كەيبىر جۋرنالشىلار 1998 جىل فرانتسيا فۋتبولى ءۇشىن ايتۋلى جىل دەيدى. سەبەبى «فرانتسيا الەم چەمپيونى اتاندى, ءارى مباپپە دە سول جىلى دۇنيەگە كەلدى», دەيدى. كيليان تۋرالى وسىلاي ايتۋعا ازىرگە ەرتە دەسەڭىزدەر جاس پەرىنىڭ قولدى-اياققا تۇرماي ەكى-ءۇش ويىنشىنى الداپ وتەتىن كەزدەرىن كورگەندە ويلانىپ تا قالارسىز. الەم فۋتبولىنا تاعى ءبىر اڭىز ويىنشى كەلدى مە, جوق ءالى ولاي ايتۋعا ەرتە مە, ونى ءبىز 15 شىلدەدە بولاتىن فينالدا بايقارمىز. ال فرانتسيا قۇراماسى فينالدىڭ ءفاۆوريتى ەكەنى داۋسىز. ديدە دەشام فۋتبولشى كەزىندە كوتەرگەن كۋبوگىن, ەندى باپكەر بولىپ كوتەرە الا ما؟
ول ەندى ەكى كۇننەن كەيىن بەلگىلى بولادى
ەرمۇحامەد ماۋلەن,
«ەگەمەن قازاقستان»
