فورۋمنىڭ نەگىزگى ماقساتى – قازاقستان اگروونەركاسىبى سالاسىندا حالىقارالىق ىنتىماقتاستىقتى كەڭەيتۋ. فورۋمدى وتكىزۋگە باستاماشىلىق جاساعان «قازاق ەلى» حالىقتىق پالاتاسى باسقارماسىنىڭ توراعاسى باقىتبەك نۇعىمان ءوزىنىڭ قۇتتىقتاۋ سوزىندە ەلىمىزدىڭ اگرارلىق سەكتورى – ەكونوميكامىزدىڭ قوزعاۋشى كۇشى بولىپ تابىلاتىندىعىن اتاپ كورسەتتى. وسىعان بايلانىستى, ەلباسىمىز قازىرگى زاماناۋي جەتىستىكتەردى قولدانا وتىرىپ, الداعى بەس جىلدا اگروونەركاسىپ كەشەنىنىڭ ونىمدىلىگىن ەكى جارىم ەسە ارتتىرۋ ماقساتىن العا قويىپ وتىر. ناتيجەسىندە اۋىل شارۋاشىلىعى سالاسىنداعى كاسىپكەرلىكتىڭ دامۋى ارقىلى ەلىمىزدىڭ دامىعان وتىز ەل قاتارىنا قوسىلۋىنا ۇلكەن جول اشىلماق.
ء«بىزدىڭ «قازاق ەلى» حالىقتىق پالاتاسىنىڭ باستى ماقساتىنىڭ ءبىرى اگروونەركاسىپ كەشەنىنىڭ دامۋىنا جاردەم جاساۋ. حالقىمىزدىڭ باستى بايلىعىنىڭ ءبىرى, ول – ءبىزدىڭ جەرىمىز. ءبىزدىڭ جەرىمىزدەي تابيعي بايلىعى مول جەرگە يە ەلىمىزدىڭ الەمنىڭ دامىعان مەملەكەتتەرىندەگىدەي ءومىر ءسۇرۋ دەڭگەيىنە جەتەرىنە سەنىمىمىز مول. سول سەبەپتى ءوز جەرىمىزدە ءونىپ شىققان تازا ازىق-ت ۇلىكتى تۇتىنىپ, ۇلكەن ءوندىرىس كەشەندەرىن تۇرعىزساق, ءال-اۋقاتى جوعارى, دەنى ساۋ ۇرپاق تاربيەلەيتىنىمىزگە سەنىم زور. وسىعان وراي ءبىز دەنساۋلىق سالاسىن دامىتۋعا دا قولعابىس تيگىزۋدى وزىمىزگە ماقسات ەتىپ الدىق. تازا ءونىم – دەنساۋلىق كەپىلى. ال دەنى ساۋ, ءبىلىمدى, باسەكەگە قابىلەتتى ۇرپاق تاربيەلەسەك, بۇل ءبىزدىڭ جارقىن بولاشاعىمىزعا اينالارى انىق», دەدى ب.نۇعىمان. ول دەنساۋلىق ساقتاۋ سالاسىنداعى شەتەلدىك وزىق تاجىريبەلەرگە ءمان بەرۋمەن قاتار حالىق مەديتسيناسىنىڭ ءتيىمدى تۇستارىن دا جەتىلدىرە بەرۋدىڭ قاجەت ەكەندىگىن اتاپ ءوتتى.
«قازاق ەلى» حالىقتىق پالاتاسى, «جىبەك جولى» ساۋدا پالاتاسى سەكىلدى قوعامدىق ۇيىمداردىڭ قولداۋىمەن وتكىزىلىپ وتىرعان حالىقارالىق اگروفورۋم قازاق دالاسىنىڭ ءتورى – ارۋ استانانىڭ 20 جىلدىعىمەن تۇسپا-تۇس كەلدى. سوندىقتان مۇندا وسى ۋاقىت ارالىعىندا استانانىڭ تورتكۇل دۇنيە كوز تىككەن كوپتەگەن الەمدىك جانە حالىقارالىق فورۋمداردىڭ مەكەنىنە اينالعانى دا ايتىلدى. جەر-جاھانعا استانادان اقجولتاي اقپارات تاراتىلىپ, باس قالامىزدىڭ مارتەبەسى مەن مەرەيى تالاي اسقاقتاعانى راس. قالاي بولعاندا دا, وسى ۋاقىت ولشەمىنىڭ ىشىندە قازاقستان حالقىنىڭ ەرەن ەڭبەگىنىڭ ناتيجەسىندە ازيانىڭ وسىناۋ بولىگىندە سالتاناتتى جاڭا قالانىڭ بوي كوتەرگەندىگىن شەتەلدەردەن كەلگەن قوناقتار تاڭداي قاعا تامسانا ايتىپ جاتتى.
فورۋمدا ل.ن.گۋميلوۆ اتىنداعى ەۇۋ-ءدىڭ پروفەسسورى ج.تايبازاروۆ پەن ۇلتتىق بانكتىڭ تۇڭعىش توراعاسى عالىم باينازاروۆ بايانداما جاساپ, كەلۋشىلەرگە قازاقستان اگروونەركاسىپ كەشەنىنىڭ دامۋ ديناميكاسى جانە وعان قاراجات سالعان شەتەلدىك ينۆەستورلاردى قولداۋدىڭ زاڭدى تەتىكتەرىمەن تانىستىردى.
باسقوسۋ بارىسىندا ەكونوميكالىق ىنتىماقتاستىقتىڭ ەۋرازيالىق ۇيىمى باس حاتشىسىنىڭ ورىنباسارى دجە جان (قحر), «Invictus Trading» ديرەكتورلار كەڭەسىنىڭ توراعاسى كريس يوحانسەن, «نۋرو Vorarlber» كومپانياسىنىڭ قىزمەتكەرى ولگا حەنيكشنابل جانە باسقالارى ءسوز سويلەپ, ءوز ويلارىمەن ءبولىستى.
باسقوسۋ بارىسىندا بىرلەسكەن ءوندىرىستى ينۆەستيتسيالاۋداعى, قازىرگى ساۋدا جۇيەسىندەگى, قازاقستاننىڭ بارلىق اۋماعىنداعى اگرارلىق سەكتور دامۋىنا باعىتتالعان كاپيتالدىڭ ەركىن اينالىمىنداعى ىنتىماقتاستىقتىڭ پەرسپەكتيۆالارى قارالدى.
فورۋم جۇمىسىنا ەۋروپا مەن ازيا قۇرلىقتارىنىڭ (نورۆەگيا, اقش, يتاليا, نيدەرلاند, اۋستريا, قىتاي جانە باسقالارى) وزدەرىن قازاقستاننىڭ اگرارلىق سەكتورىنا قارجىلىق قولداۋشى رەتىندە كورسەتىپ جۇرگەن جيىرمادان استام ءىرى كومپانيالاردىڭ, ەلىمىزدىڭ بارلىق وبلىستارىنىڭ اگروونەركاسىپ كەشەنىنىڭ ورتا جانە شاعىن بيزنەس وكىلدەرى قاتىستى. سونداي-اق ەلىمىزدىڭ مەملەكەت جانە عىلىم قايراتكەرلەرى, حالىقارالىق ۇيىمداردىڭ, قارجى ينستيتۋتتارىنىڭ, باق پەن مەملەكەتتىك ەمەس ۇيىمداردىڭ وكىلدەرى دە شاقىرىلىپ, پىكىرلەرىن ورتاعا سالدى.
شارانىڭ سوڭىندا فورۋمنىڭ ۇسىنىسى قابىلدانىپ, اگروفورۋمعا قاتىسۋشى كاسىپكەرلەرمەن بىرلەسكەن مەموراندۋمعا قول قويىلدى.
سۇڭعات ءالىپباي,
«ەگەمەن قازاقستان»
