كەزدەسۋگە سونداي-اق قازاقستان رەسپۋبليكاسى قورعانىس جانە اگروعارىش ونەركاسىبى ءمينيسترى بەيبىت اتامقۇلوۆ پەن قىزىلوردا وبلىسىنىڭ اكىمى قىرىمبەك كوشەرباەۆ قاتىستى. كەزدەسۋ بارىسىندا تاراپتار «بايتەرەك» عارىشتىق زىمىران كەشەنىن قۇرۋ, بىرلەسكەن ينۆەستيتسيالىق جوبالاردى جۇزەگە اسىرۋ جانە بايقوڭىر قالاسىن ءارى قاراي دامىتۋ ماسەلەلەرىن تالقىلادى.
تاراپتار جاڭا بۋىنداعى ۇشاتىن كولىك كورابلدەرىن عارىش كوگىنە اتتاندىراتىن «بايتەرەك» جوباسىن جۇزەگە اسىرۋدى جەدەلدەتۋگە ۋاعدالاستى. وسى ماقساتتا قازاقستان رەسپۋبليكاسى قورعانىس جانە اەروعارىش ونەركاسىبى مينيسترلىگىنىڭ اەروعارىش كوميتەتى, «روسكوسموس» پەن «س7 عارىشتىق كولىك جۇيەسى» كومپانياسى وكىلدەرىنىڭ قاتىسۋىمەن مەملەكەت-جەكەشەلىك ارىپتەستىگى اياسىنداعى ىنتىماقتاستىقتى جۇزەگە اسىرۋ ءۇشىن جۇمىس توبى قۇرىلادى.
ا.مامين كاسىپكەرلىكتى دامىتۋ ءۇشىن جاعدايلار جاساۋ, بايقوڭىر قالاسىنا ينۆەستيتسيالار تارتۋ, جاڭا جۇمىس ورىندارىن قۇرۋ ىنتىماقتاستىقتىڭ باسىم باعىتتارى بولىپ تابىلاتىنىن اتاپ ءوتتى.
قىزىلوردا وبلىسىنىڭ اكىمى ق.كوشەرباەۆ بايقوڭىر قالاسىندا ينجەنەرلىك ينفراقۇرىلىمدار نىساندارىن جاڭعىرتۋ جانە قايتا قۇرۋ بويىنشا اتقارىلىپ جاتقان جۇمىستار تۋرالى اقپارات بەردى. ينۆەستيتسيالار تارتىپ, بيزنەس ءۇشىن وڭتايلى جاعدايلار جاساۋ ماقساتىندا «بايقوڭىر» كەشەنى اۋماعىندا ارنايى ەكونوميكالىق ايماق قۇرۋ مۇمكىندىگىن قاراستىرۋ ۇسىنىلدى. وبلىس اكىمى عارىش ءتۋريزمىن دامىتۋ ماقساتىندا وبلىستا «بايقوڭىر» ويىن-ساۋىق-تۋريستىك ايماق قۇرۋ تۇجىرىمداماسى جاسالعانىن ايتىپ ءوتتى.
بىرقاتار كوكەيكەستى ماسەلەلەر بويىنشا الدا وتەتىن «بايقوڭىر» كەشەنى بويىنشا 6-شى قازاقستان-رەسەي ۇكىمەتارالىق كوميسسياسىنىڭ ماجىلىسىندە قاراستىرۋ ءۇشىن ۇسىنىستار دايىندالدى.
