قول قويۋ بارىسىندا بەلگىلى بولعانىنداي, قازىرگى زامانعى قازاقستاندىق ادەبيەت ۇلگىلەرىنىڭ جيناعى «جاھاندىق الەمدەگى زاماناۋي قازاقستاندىق مادەنيەت» جوباسى اياسىندا بىرىككەن ۇلتتار ۇيىمىنىڭ 6 تىلىنە اۋدارىلماق. بۇل جوبا قازاقستان پرەزيدەنتى نۇرسۇلتان نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ قۇرامداس بولىگى سانالادى. جوبانىڭ مىندەتى – بۇگىنگى الەمگە تاۋەلسىزدىك جىلدارىنداعى كينو مەن تەاتر, حورەوگرافيا, ونەر, بەينەلەۋ جانە مۋزىكا ونەرى مەن ادەبيەت جەتىستىكتەرىن تانىستىرۋ.
قازاقستان تاراپىنان مەموراندۋمعا «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيانىڭ حاتشىسى ايدا بالاەۆا قول قويدى. «بريتاندىق كەڭەس تاراپىنان قولداۋ, سونداي-اق CambridgeUniversityPress سياقتى بەلگىلى ۇيىممەن ارىپتەستىك پەن ونىڭ 500 جىلدىق تاجىريبەسى جانە تالاسسىز بەدەلى ءبىزدىڭ جوبامىزدىڭ ءساتتى بولۋىنا جاقسى نەگىز بولادى دەپ ويلايمىن. بۇل اۋدارمانىڭ جوعارى ساپاسىنا, سونداي-اق ۇلىبريتانيادا عانا ەمەس, اعىلشىن ءتىلدى الەمدە كەڭىنەن تارالۋىنا مۇمكىندىك بەرەدى. ءبىز ءدال وسى ىسپەتتى كەلىسىمدى انتولوگيانى يسپان, فرانتسۋز, ورىس, قىتاي جانە اراب تىلدەرىندە دە باسىپ شىعارۋ ءۇشىن جۇرگىزۋدەمىز. الەۋەتتى ارىپتەستەرىمىزگە تالاپ جوعارى. باسىمدىق تاجىريبەگە, بەدەلگە جانە باسپانىڭ مۇمكىندىكتەرىنە قاراي بەرىلەدى», دەدى سالتاناتتى شارادا ايدا بالاەۆا.
ءوز كەزەگىندە CambridgeUniversityPress ءبىلىم جانە رەفورما بويىنشا ديرەكتورى دجەين مانن قازاقستانمەن ماڭىزدى مادەني جوبادا ارىپتەس بولعانىنا قۋانىشتى ەكەنىن جەتكىزدى. ء«بىز قازاقستاندىق پروزا مەن پوەزيا اۆتورلارىن اعىلشىن ءتىلدى الەمنىڭ وقىرماندارىمەن جاقىن تانىستىرۋ ءۇشىن بارلىق كۇش-جىگەرىمىزدى سالامىز. CambridgeUniversityPress جوباعا تىكەلەي قاتىسۋ مۇمكىندىگىن العانىنا ريزاشىلىعىن بىلدىرەدى» دەدى ول.
جوبا تۋرالى ايتار بولساق, «رۋحاني جاڭعىرۋ» باعدارلاماسىنىڭ ءبىر باعىتى سانالاتىن «جاھاندىق الەمدەگى زاماناۋي قازاقستاندىق مادەنيەت» جوباسىن جۇزەگە اسىرۋ اياسىندا قازىرگى زامانعى قازاقستاندىق ادەبيەتتىڭ ەكى انتولوگياسىن باسىپ شىعارۋعا دايىندىق جانە اۋدارما جۇمىستارى جۇرگىزىلۋدە. ءار انتولوگيانىڭ كولەمى شامامەن 500 بەتتەن تۇرادى. ءار انتولوگياعا 30 قازاقستاندىق اۆتوردىڭ شىعارمالارى ەنەدى. انتولوگيانىڭ قۇرىلىمى مەن مازمۇنى قازاقستان جازۋشىلار وداعىنىڭ ارنايى وتىرىسىندا بەكىتىلدى.
اعىلشىن تىلىندەگى انتولوگيانى اۋدارۋ جانە باسۋ جوباسىنىڭ ستراتەگيالىق سەرىكتەسى رەتىندە «بريتاندىق كەڭەس» جوباعا ساراپشىلىق قولداۋ كورسەتەدى. كەمبريدج ۋنيۆەرسيتەتىنىڭ باسپاسى شەشۋشى ارىپتەس-باسپا رەتىندە جولما-جول ادەبي وڭدەۋ, باسپاعا دايارلاۋ, باسۋ, تاراتۋ, سونداي-اق اعىلشىن ءتىلدى ەلدەرگە ۇسىنۋ مەن تاراتۋ بويىنشا جۇمىس كەشەنىنىڭ بارلىعىن جۇرگىزەدى.
قازىرگى كەزدە جولما-جول اۋدارۋعا, سونداي-اق جولما-جول ادەبي وڭدەۋدى ءتيىستى كوركەمدىك دەڭگەيىنە دەيىن جەتكىزەتىن ادەبي اۋدارماشىلار پۋلىن جاساقتاۋ جۇمىسى جۇرگىزىلۋدە. CambridgeUniversityPress بازاسىندا دايارلانعان انتولوگيا اعىلشىن ءتىلى رەسمي مارتەبەگە يە بارلىق ەلدە تاراتىلادى دەپ جوسپارلانىپ وتىر.
«ەگەمەن-اقپارات»
