دوڭگەلەك ۇستەلگە اقپارات جانە كوممۋنيكاتسيالار ۆيتسە-مينيسترلەرى نۇرگۇل ماۋبەرلينوۆا جانە دينارا ششەگلوۆا, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلايحان وسپانوۆ, ەىدۇ ساراپشىلارى قاتىستى.
ء ىس-شارانى اشقان اقپارات جانە كوممۋنيكاتسيالار ۆيتسە-ءمينيسترى ن.ماۋبەرلينوۆا ەلدەگى «اشىق ۇكىمەت» ساياساتىنىڭ قالاي جۇرگىزىلىپ وتىرعانىن اڭگىمەلەپ بەردى. ونىڭ ايتۋىنشا, ەلىمىزدە حالىققا قىزمەت كورسەتۋدىڭ ءتۇرلى جەڭىلدىكتەرى قاراستىرىلعان.
«قازاقستاندا «اشىق ۇكىمەت» باعىتىنداعى جۇمىس 2015 جىلدان باستاپ ىسكە اسىرىلىپ كەلەدى. ازاماتتىق قوعام وكىلدەرى مەن دەپۋتاتتاردىڭ بىرلەسكەن جۇمىسى ارقاسىندا اقپاراتتى قولجەتىمدى ەتۋ جونىندەگى زاڭ قابىلداندى. بۇگىندە وسى باعىتتاعى نورماتيۆتىك بازا قالىپتاسقان. ءاربىر تۇرعىن اقپاراتقا ەركىن قول جەتكىزۋ ماقساتىندا «اشىق ۇكىمەت» پورتالى اشىلعان. سونىمەن قاتار, زاڭنىڭ دۇرىس ورىندالۋىن قاداعالاۋ جانە قوعامدىق باقىلاۋمەن قامتاماسىز ەتۋ ءۇشىن ۇكىمەت جانىنان اقپاراتقا قولجەتىمدىلىك جونىندەگى كوميسسيا قۇرىلدى. كوميسسيانىڭ قۇرامىندا قوعامدىق كەڭەستەردىڭ بەلسەندىلەرى, ۇكىمەتتىك ەمەس ۇيىمنىڭ مۇشەلەرى بار. ايتسە دە, «اشىق ۇكىمەتتىڭ» جۇمىسىن جەتىلدىرۋدە شەشىمىن تاپپاعان بىرقاتار ماسەلەلەر بار», دەدى ن.ماۋبەرلينوۆا.
ۆيتسە-مينيستر «اشىق ۇكىمەت» ساياساتىن جۇرگىزۋ قازاقستاننىڭ دامىعان 30 ەلدىڭ قاتارىنا قوسىلۋ ءۇشىن قاجەتتى ەكەنىن اتاپ ءوتتى. سونداي-اق وسى باعىتتا اتقارىلعان جۇمىستار اشىقتىقتى قامتاماسىز ەتىپ, ەل دامۋىنا اسەر ەتەتىنىن جەتكىزدى.
بۇدان بولەك, جيىن بارىسىندا ەىدۇ ساراپشىلارى ءوز تاجىريبەلەرىمەن ءبولىستى. شەتەلدىك ماماندار ەلدەگى «انىق ۇكىمەت» جۇمىسىنا قاتىستى بىرقاتار ۇسىنىستار ايتتى. ماسەلەن, ولاردىڭ قاتارىندا بىرىڭعاي انىقتاما بەرۋ, «اشىق ۇكىمەت» ستراتەگياسىن جاساۋ, ۆەدومستۆوارالىق بايلانىس, بۇقارالىق اقپارات قۇرالدارى مەن ۇكىمەتتىك ەمەس ۇيىمداردىڭ تاۋەلسىزدىگىن قامتاماسىز ەتىپ, ءسوز ەركىندىگىنە كەدەرگى كەلتىرمەۋ سەكىلدى ۇسىنىستار بار.
ء«بىز بيىلعى ساۋىردەن باستاپ استانا مەن باتىس قازاقستان وبلىستارىنداعى «اشىق ۇكىمەت» جانە «قوعامدىق كەڭەس» جۇمىستارىمەن تانىستىق. قازاقستانداعى قوعامدىق كەڭەستەردىڭ جۇمىستارىن ساراپتاي كەلە, ءوز تاجىريبەمىزدى ۇسىنىپ وتىرمىز. الەمنىڭ دامىعان ەلدەرىندە ساياسات پەن ەكونوميكاداعى, جالپى قوعامداعى ءاربىر جاعدايعا قاتىستى ءار ازاماتتىڭ وزىندىك وي-پىكىرىن بىلدىرۋىنە مۇمكىندىك جاسالعان. قازاقستاندا بۇل باعىتتاعى جۇمىس ءبىر ىزگە قويىلعان, الايدا جەتىلدىرەتىن تۇستار دا بارشىلىق», دەدى ەىدۇ ساراپشىسى حيلل گينسبەرگ.
جيىندا باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ ازاماتتىق قوعامنىڭ جەرگىلىكتى باسقارۋشى ورگانداردىڭ شەشىم قابىلداۋىنا اسەرى تۋرالى بايانداما جاسادى. ونىڭ پايىمداۋىنشا, قوعامدىق كەڭەستەر شەشىم قابىلداۋداعى جانە ونى ورىنداۋداعى بۇكىل كەزەڭدەرگە اتسالىسۋى قاجەت.
«مەملەكەتتىك قىزمەتكەرلەردى ەڭ ماڭىزدى باقىلاۋشى – قوعامدىق, ازاماتتىق باقىلاۋ. ەگەر ازاماتتىق باقىلاۋدى ەنگىزسەك, كوپ جاعداي قالىپقا تۇسەدى. ياعني, اقىر سوڭىندا تۇرعىنداردىڭ وزدەرى سونىڭ جەمىسىن جەيدى. حالىق ەلدەگى ۇدەرىستى باقىلاپ, وعان باعا بەرىپ وتىرۋى ءتيىس. قازىرگى تاڭدا الەۋمەتتىك جەلى ارقىلى ماسەلەلەر كوتەرىلىپ وتىرعانىنا كۋا بولىپ كەلەمىز. الايدا بۇل ۇدەرىستى ءبىر ىزگە ءتۇسىرۋ ءۇشىن قوعامدىق كەڭەستەردىڭ الاڭدارىن قولدانۋ قاجەت», دەدى ع.وسپانقۇلوۆ.
«ەلەكتروندىق ۇكىمەت» پەن مەملەكەتتىك قىزمەتتەردىڭ دامۋى» تاقىرىبى اياسىندا وتەتىن سەسسيادا مەملەكەتتىك قىزمەت كورسەتۋ سالاسىنداعى جاڭاشىلدىقتار مەن وزەكتى ماسەلەلەر تالقىلاندى. ءىس-شارا بارىسىندا ەىدۇ ساراپشىلارى قوعامدىق سالاداعى تسيفرلاندىرۋ ماسەلەلەرى, پاريج قالاسىنداعى جاستار كەڭەسىنىڭ قىزمەتى, حالىققا قىزمەت كورسەتۋدى ازاماتتاردىڭ باقىلاۋى سەكىلدى تاقىرىپتاردا باياندامالار جاسادى. بۇدان بولەك, مەملەكەتتىك قىزمەتتى جانە «ەلەكتروندى ۇكىمەتى» دامىتۋ, «اشىق ۇكىمەت» مەحانيزمدەرى جونىندە تالقىلاۋلار بولدى.
بۇگىندە قازاقستاندا «اشىق ۇكىمەت» قۇرىلىپ, ازاماتتاردىڭ قوعامدىق ماڭىزدى ماسەلەلەرگە قاتىستى وزىندىك پىكىرى مەن ويىن بىلدىرەتىن قوعامدىق كەڭەستەر جۇمىس ىستەپ وتىر. قوعامدىق كەڭەستەر مەن قوعامدىق قابىلداۋ بولمەلەرىنىڭ جۇمىسى بۇكىل رەسپۋبليكا بويىنشا ءبىر ىزگە كەلتىرىلگەن.
اباي اسانكەلدى ۇلى,
«ەگەمەن قازاقستان»
